විස්සයි20 ලෝක කුසලාන ක්‍රිකට් තරගාවලියේදී අත්වූ දරුණු පරාජය හේතුවෙන් සීමිත ඕවර නායකත්වයෙන් ඉවත් වීමට නවසීලන්ත කණ්ඩායමේ නායක කේන් විලියම්සන් තීරණය කර තිබේ.
මෙවර ලෝක කුසලාන තරගාවලියේදී ඇෆ්ගනිස්තානය සහ කොදෙව් පිල හමුවේ පරාජය වීමෙන් සුපිරි 8 වටයට එක්වීමේ අවස්ථාව නවසීලන්තයට අහිමි වී ගියේය.
සිය ජාත්‍යන්තර ක්‍රිකට් දිවිය දීර්ඝ කර ගැනීමේ අරමුණෙන් නායකත්වයෙන් ඉවත්වූ ඔහු ඊට අමතරව 2024-25 තරග වාරය වෙනුවෙන් එරට ක්‍රිකට් ආයතනය ලබාදෙන මධ්‍යම කොන්ත්‍රාත් ගිවිසුම ප්‍රතික්ෂේප කිරීමට ද කටයුතු කර ඇත. කෙසේ වෙතත් ඒ විදෙස් විස්සයි20 ලීග් තරගාවලි සඳහා එක්වීමේ අරමුණෙනි.
කණ්ඩායම ඉදිරියට ගෙන යෑමට උපකාර කිරීම තමා ආසා කරන දෙයක් බවත්, එය තමාට දිගටම දායක වීමට අවශ්‍ය දෙයක් බවත් පවසන විලියම්සන් නවසීලන්ත ගිම්හාන ඍතුවේදී විදෙස් තරගාවලි වෙනුවෙන් අවස්ථාවක් තබා ගැනීම නිසා මධ්‍යම කොන්ත්‍රාත්තුව පිළිගැනීමට නොහැකි බව ද කියා සිටී.
පසුගිය තරග වාරයට පෙර ඔහු ටෙස්ට් නායකත්වයෙන් ඉවත් වූ අතර, ඒ වෙනුවට ටිම් සවුති නායකත්වයට පත් කෙරිණි.
මේ වසර මුලදී 100 වැනි ටෙස්ට් තරගය ක්‍රීඩා කළ විලියම්සන් එක්දින තරග 165ක් සහ විස්සයි20 තරග 93ක් ක්‍රීඩා කර තිබේ. 2019 එක්දින ලෝක කුසලාන ක්‍රිකට් තරගාවලියේ අනුශූරතාව, 2021 විස්සයි20 ලෝක කුසලාන තරගාවලියේ අනුශූරතාව සහ 2021 අයිසීසී ලෝක ටෙස්ට් ශූරතාව නවසීලන්තයට හිමිවූයේ විලියම්සන්ගේ නායකත්වය යටතේයි.
