මත්පෙති සන්තකයේ තබා ගැනීමේ වරදට අත්අඩංගුවට ගත් සැකකරුවන් දෙදෙනෙකු මුදා ගැනීම සඳහා රුපියල් 50,000 (පනස්දහසක) අල්ලස් මුදලක් පොලිසිය තුළදීම පොලිස් නිලධාරින් වෙත ලබා දීමට තැත් කළ යුද හමුදා සෙබළෙකු බව කියන පුද්ගලයෙකු පෙරේදා (13) රාත්‍රි අත්අඩංගුවට ගත් බව නාගොල්ලාගම පොලිසිය පවසයි.
සිද්ධිය සම්බන්ධයෙන් මෙසේ අත්අඩංගුවට ගෙන ඇත්තේ හිරියාල අඹගස්වැව ප්‍රදේශයේ පදිංචි ඉබ්බාගමුව යුද හමුදා කඳවුරට අනුයුක්තව සේවය කරන බව කියන සාමාන්‍ය සෙබළෙකි. මත්පෙති ළඟ තබා ගැනීම සම්බන්ධයෙන් අත්අඩංගුවට ගෙන ඇත්තේ තලමල්ගම පොලිස් වසමේ හිරියාල අඹගස්වැව හා කුඹුක්ගැටේ පොලිස් වසමේ කිඹුල්වානා ඔය කුඹුක්ගැටේ ලිපිනයේ පදිංචි 20 හැවිරිදි හා 28 හැවිරිදි පුද්ගලයින් දෙදෙනෙකි.
පොලිස්පතිතුමාගේ සංකල්පයකට අනුව ක්‍රියාත්මක වන යුක්තිය මෙහෙයුමට සමගාමීව නාගොල්ලාගම පොලිස් වසමේ අපරාධ වැළැක්වීමේ හදිසි සෝදිසි මෙහෙයුමක් සිදු කරන ලෙස මහව සහකාර පොලිස් අධිකාරි බණ්ඩාර මහතාගෙන් ලැබුණු උපදෙස්වලට අනුව නගොල්ලගම පොලිසිය විසින් මෙම මෙහෙයුම ක්‍රියාත්මක කළ බව නාගොල්ලගම පොලිසිය පවසයි.
ඒ අනුව නාගොල්ලාගම නරමනාකොටුව මුල්වක්කඩ නමැති ස්ථානයේ දී සවස 6.00ට පමණ අධික වේගයෙන් පැමිණි යතුරුපැදියක් නවතා පරීක්ෂා කිරීමේදී යතුරුපැදියෙන් පැමිණි දෙදෙනා සතුව තිබී වර්ග තුනකට අයත් මත්පෙති 310 (තුන්සිය දහයක් ) අත්අඩංගුවට ගැනීමට හැකිවූ බව පොලිසිය පවසයි. එම මත්පෙති මානසික රෝගීන් සඳහා දෙන ඒවා බවට සැක කරන බව ද පරීක්ෂණ පවත්වන නිලධාරීහු සඳහන් කරති.
අල්ලස් දීම සම්බන්ධයෙන් අත්අඩංගුවට ගත් සැකකරු මත්පෙති ළඟ තබා ගත් පුද්ගලයන් දෙදෙනා පොලිස් අත්අඩංගුවේ සිටියදී ඔවුන් අමතා දුරකතන ඇමතුමක් ලබා දෙමින් තමන් ඔවුන්ව බේරා ගැනීම සඳහා පැමිණෙන බව සඳහන් කර තිබූ බව පොලිසිය පවසයි. ඒ බව ඔවුන්ට ලැබුණු දුරකතන ඇමතුමට සවන් දීමෙන් තහවුරු වූ බව ද පොලිසිය සඳහන් කරයි.
ඒ අනුව පොලිස් ස්ථානයට පැමිණ අල්ලස් ලබා දීමට උත්සාහ කළ සැකකරු මෙම මෙහෙයුමට සම්බන්ධ වූ නිලධාරීන් අමතා තම මිතුරන් දෙදෙනා මුදාහරින ලෙස දිගින් දිගටම ඇවිටිලි කළ බවත් ඔවුන් එම ඉල්ලීම ප්‍රතික්ෂේප කිරීම නිසා අපරාධ මර්දන අංශයේ ස්ථානාධිපති පොලිස් පරීක්ෂක කරුණාරත්න මහතා හමුවී දිගින් දිගටම තම මිතුරන් නිදහස් කරන ලෙසට පවසා සිටි බවත් ඒ අවස්ථාවේදී අල්ලස් ලබා දීමට උත්සාහ කළ මෙම සැකකරු අත්අඩංගුවට ගත් බවත් මෙහෙයුමට සම්බන්ධ නිලධාරීහු පවසති.
පොලිසිය සඳහන් කරන්නේ සැකකරු පොලිසියට අල්ලස් ලෙස ලබා දීමට උත්සාහ කල රුපියල් 5000 නෝට්ටු දහයක් සමඟ පොලිස් ස්ථානය තුළදීම රාත්‍රී 8.25ට පමණ සැකකරු අත්අඩංගුවට ගත් බවත්ය. මෙම පුද්ගලයා සත්‍ය වශයෙන්ම යුද හමුදා සාමාජිකයකු ද යන්න පිළිබඳවද සොයා බැලීම සඳහාද පරීක්ෂණයක් ආරම්භ කළ බව පොලිසිය පවසයි.
සැකකරුවන් මහව මහේස්ත්‍රාත් අධිකරණයට ඉදිරිපත් කිරීමට නියමිතව ඇත.
කුරුණෑගල සුනිල් එස්. පැල්ලන්දෙණිය මහව - සංජීවනී ආරියරත්න
