ගල්කිස්ස පොලිස් කොට්ඨාසයට අයත් කැස්බෑව කහතුඩුව හා මත්තේගොඩ පොලිස් වසම්වල මත්ද්‍රව්‍යවලට ඇබ්බැහි වූ පුද්ගලයන් පුනරුත්ථාපන කිරීම සඳහා මධ්‍යස්ථානයක් කැස්බෑව මාකන්දන සංකල්ප විහාරස්ථාන භූමියේ දී පසුගියදා ආරම්භ කෙරිණි.
පොලිස්පති දේශබන්දු තෙන්නකෝන් මහතාගේ සංකල්පයක් මත මත්ද්‍රව්‍යවලට ඇබ්බැහි වූවන් යහපත් පුරවැසියන් ලෙස සමාජගත කිරීමේ වැඩපිළිවෙළට සමගාමීව කැස්බෑව පොලිසියේ ස්ථානාධිපති ප්‍රධාන පොලිස් පරීක්ෂක රංජන සමරසිංහ මහතා කැස්බෑව මාකන්දන සංකල්ප විහාරාධිපති උග්ගොඩ ධම්මින්ද හිමියන්ගෙන් කරන ලද ඉල්ලීමක් මත එම භූමියේ ගොඩනැඟිල්ලක මධ්‍යස්ථානය ආරම්භ කෙරිණි.
එම පොලිස් වසම් 3න් තෝරාගත් මත්ද්‍රව්‍යවලට ඇබ්බැහි වූ පුද්ගලයන් 60 දෙනෙකු මෙම මධ්‍යස්ථානය සඳහා යොමු කර නවාතැන් පහසුකම් ලබා දී අන්තරාදායක ඖෂධ පාලක මණ්ඩලයේ හා ප්‍රජා විශෝධන දෙපාර්තමේන්තුවේ මෙන්ම ප්‍රාදේශීය ලේකම් කාර්යාලයට අනුබද්ධ නිලධාරීන් මධ්‍යස්ථානයේ නේවාසිකව රැඳී සිටින මත්ද්‍රව්‍යවලට ඇබ්බැහි වූ පුද්ගලයන්ට අවශ්‍ය ප්‍රතිකාර උපදෙස් සහ මඟ පෙන්වීම දින 14ක කාලයක් තුළ නොකඩවා සිදු කරනු ඇත.
එකී කාලය තුළ ඔවුන්ට අවශ්‍ය ආහාර පාන සහ අනෙකුත් පහසුකම් සැපයීම කැස්බෑව ශාසනාරක්ෂක බලමණ්ඩලය මඟින් සිදු කරනු ඇත.
තවද ඔවුන්ට අවශ්‍ය ව්‍යායාම කටයුතු ක්‍රීඩා කටයුතු සහ විනෝදාස්වාදය සඳහා අවශ්‍ය සංගීත ශිල්පීන් ද එකී කාලය තුළ එම මධ්‍යස්ථානය වෙත ගෙන්වා එම තරුණයන්ට මානසික සුවයක් ද ලබා දීමට කටයුතු කරන බව කැස්බෑව පොලිසියේ ස්ථානාධිපති ප්‍රධාන පොලිස් පරීක්ෂක රංජන සමරසිංහ මහතා පැවසීය.
මෙහිදී පිරිස පන්සිල්හි පිහිටුවීම කොළඹ මහා දිසාවේ ප්‍රධාන සංඝනායක කෝට්ටේ ශ්‍රී කල්‍යාණි සාමග්‍රී ධර්ම මහා සංඝ සභාවේ ජ්‍යෙෂ්ඨ කර්මාචාර්ය මාකන්දන ශ්‍රී සූදානස්සනා ලංකාරාම විහාරය ඇතුළු චතුර් මහා විහාරාධිපති වල්ගම රතනසිරි හිමි, කැස්බෑව ශාසනාරක්ෂක බලමණ්ඩලයේ ප්‍රධාන ලේඛකාධිකාරි හල්විටිගල යසස්සි නාහිමි හා කැස්බෑව මාකන්දන සංකල්ප විහාරාධිපති කැස්බෑව ශාසනාරක්ෂක බලමණ්ඩලයේ නියෝජ්‍ය ලේඛකාධිකාරි උග්ගොඩ ධම්මින්ද හිමි, පැලැන්වත්ත සත්බුදු විහාරාධිකාරී කැස්බෑව ශාසනාරක්ෂක බලමණ්ඩලයේ නියෝජ්‍ය ලේඛකාධිකාරී පැලැන්වත්ත සෝභිත හිමි ඇතුළු මහා සංඝයා වහන්සේ, සහකාර පොලිස් අධිකාරි සාරනාත් සමරකෝන්, කහතුඩුව පොලිසියේ ස්ථානාධිපති ප්‍රධාන පොලිස් පරීක්ෂක කේ.එච්.එස්. ප්‍රියංකර මහත්වරුන් ඇතුළු ගිහි පැවිදි විශාල පිරිසක් සහභාගී වූහ.
සහකාර පොලිස් අධිකාරී සාරනාත්
සමරකෝන් මහතා සහ පුනරුත්ථාපන
මධ්‍යස්ථානයේ තරුණයන්ට උපදෙස් ලබා දීම සඳහා පැමිණි රාජ්‍ය නිලධාරීන්
