සංවර්ධන නිලධාරිනියක විසින් රඹුක්කන ප්‍රාදේශීය ලේකම් කාර්යාලයේ වැසිකිළියක අමතකව දමා ගොස් තිබුණු මුදල් පසුම්බියේ තිබූ රුපියල් 72,000ක් හා රුපියල් 45,000ක් වටිනා රන් පෙන්ඩනයක් සමඟ ලියකියවිලි කිහිපයක් සොරකම් කරගෙන ගොස් නිවෙසේ දර මඩුවේ සඟවා තබාගත් සමෘද්ධි සංවර්ධන නිලධාරියකු මෙම 20 වැනිදා දක්වා රක්ෂිත බන්ධනාගාරගත කරන ලෙස කෑගල්ල මහේස්ත්‍රාත් සශිකා මිතුනආරච්චි මහත්මිය ඊයේ (13) නියෝග කළාය.
මෙලෙස රක්ෂිත බන්ධනාගාරගත කළේ රඹුක්කන, යටගම, පුවක්මොටේ ප්‍රදේශයේ පදිංචිව සිටින 56 හැවිරිදි හෙට්ටිවීදිය මුදියන්සේලාගේ ශාන්ත දර්ශන විජේබණ්ඩාර නමැති සමෘද්ධි සංවර්ධන නිලධාරියෙකි.
රඹුක්කන ප්‍රාදේශීය ලේකම් කාර්යාලයේ සේවය කරන හේවාදිවෙල ප්‍රදේශයේ පදිංචිව සිටින සංවර්ධන නිලධාරිනියක පෙරේදා (12) රුපියල් 72,000ක් සහ රුපියල් 45,000ක් වටිනා රන් පෙන්ඩනයක් සමඟ වටිනා ලියකියවිලි තිබුණු මුදල් පසුම්බිය රැගෙන ප්‍රාදේශීය ලේකම් කාර්යාලයේ ඇති වැසිකිළියකට ගොස් ඇති බව පොලිසිය පැවැසීය. මුදල් පසුම්බිය පසුව වැසිකිළියේ කවුළුවක තබා ශරීර අවශ්‍යතාව සිදු කරගෙන ආපසු වැසිකිළියෙන් පිටව ගොස් තිබේ. වැසිකිළියෙන් පිට වන අවස්ථාවේදී සංවර්ධන නිලධාරිනියට මුදල් පසුම්බිය අමතක වී ඇති බවත් ඇයට පසුව තවත් සංවර්ධන නිලධාරිනියක වැසිකිළියට ගොස් ඇති බවත් පොලිසිය පැවැසීය.
දෙවැනියට වැසිකිළියට ගිය නිලධාරිනිය වැසිකිළියේ කවුළුවක තිබුණු මුදල් පසුම්බිය නොදැක ඇය ද ශරීර අවශ්‍යතාව සිදු කරගෙන ආපසු පිටව යන අවස්ථාවේදී සමෘද්ධි නිලධාරියකු වැසිකිළියට ගොස් ඇති බවත් පොලිසිය පැවැසීය.
සමෘද්ධි නිලධාරියා වැසිකිළියේ කවුළුවේ තිබුණු මුදල් පසුම්බිය දැක පරීක්ෂා කර බලා රුපියල් 72,000ක් හා රන් පෙන්ඩනයක් ඇති බවට හඳුනාගෙන මුදල් පසුම්බිය ගෙන සාක්කුවක දමාගෙන දෙවැනියට වැසිකිළියට ගිය සංවර්ධන නිලධාරිනියගෙන් යමක් වැසිකිළියේ අමතක වී ආවා ද යන්න පිළිබඳ විමසීමක් කර ඇති බවත් ඇය තමන්ගේ කිසිම දෙයක් වැසිකිළියේ අමතක නොවුණු බවත් සමෘද්ධි නිලධාරියාට දන්වා ඇති බවත් පොලිසිය පැවැසීය.
පසුව මුදල් පසුම්බිය හිමිකාර සංවර්ධන නිලධාරිනියට තම මුදල් පසුම්බිය ගැන මතක් වීමෙන් පසුව වැසිකිළියට ගොස් බලා තමාගේ මුදල් පසුම්බිය නැති බව කාර්යාලයට ගොස් සෙසු නිලධාරීන්ට දන්වා ඇති බවත් පොලිසිය පැවැසීය. පසුව දෙවැනියට වැසිකිළියට ගිය නිලධාරිනිය පළමුව ගිය නිලධාරිනියට කියා ඇත්තේ තමන්ගෙන් අහවලා යමක් වැසිකිළියේ අමතක වී ආවා ද නැද්ද පිළිබඳ විමසා සිටි බව දන්වා ඇති බවත්ය. පසුව මුදල් පසුම්බිය අතුරුදන්ව ඇති නිලධාරිනිය සමෘද්ධි නිලධාරියාගෙන් ඒ සම්බන්ධයෙන් විමසා ඇති අතර තමන් මුදල් පසුම්බියක් දුටුවේ නැති බව ද දන්වා තිබේ.
සංවර්ධන නිලධාරිනිය මුදල් පසුම්බිය අතුරුදන්ව ඇතැයි පවසා රඹුක්කන පොලිසියට පැමිණිල්ලක් ඉදිරිපත් කර තිබුණු අතර පසුව සමෘද්ධි නිලධාරියා ද පොලිසියටත් ගෙන්වා ඒ සම්බන්ධයෙන් ඔහුගෙන් විමසීමක් සිදු කර තිබේ. එහිදී සමෘද්ධි නිලධාරියා පොලිසිය එල්ල කරන චෝදනා කළ ද පසුව එය සිය නිවෙස අසල දර මඩුවක තිබී පොලිසියට භාර දී ඇත.
