2023/2024 අධ්‍යයන වර්ෂයට අදාළව විශ්වවිද්‍යාල ප්‍රවේශය සඳහා ඔන්ලයින් අයදුම්පත් කැඳවීම අද (14) සිට ආරම්භ කරන බව විශ්වවිද්‍යාල ප්‍රතිපාදන කොමිෂන් සභාව නිවේදනය කරයි.
ඒ අනුව අද (14) පෙරවරු 6.00 සිට www.ugc.ac.lk වෙත පිවිස අයදුම්පත් ඉදිරිපත් කිරීමට හැකියාව තිබේ.
විශ්වවිද්‍යාල ප්‍රවේශය සඳහා අවශ්‍ය අවම සුදුසුකම්, ලියාපදිංචිය ඇතුළු අනෙකුත් සියලු උපදෙස් අද (14) ‘දිනමිණ’ පුවත්පතේ 7 වැනි පිටුවේ පළ කර තිබේ.
අයදුම්පත් කැඳවීමේ අවසාන දිනය 2024 ජූලි 05 වැනිදා බව විශ්වවිද්‍යාල ප්‍රතිපාදන කොමිෂන් සභාවේ සභාපති ජ්‍යෙෂ්ඨ මහාචාර්ය සම්පත් අමරතුංග මහතා පැවසීය. සරසවි ප්‍රවේශ අත්පොත මාර්ගගත ක්‍රමය ඔස්සේ හෝ ලබා ගැනීමට අවස්ථාව ලබා නොදුන්නේ නම් විශ්වවිද්‍යාලවලට සිසුන් බඳවා ගැනීමේ ක්‍රියාවලිය ප්‍රමාද වීමට ඉඩ තිබෙන බව හෙතෙම කීවේය.
අනධ්‍යයන සේවක වර්ජනය අවසන් වී සරසවි ප්‍රවේශ අත්පොත මුද්‍රණය කර ලබා දීමට සිටියේ නම් සිසුන් බඳවා ගැනීමේ ක්‍රියාවලිය බරපතළ අර්බුදයකට ලක්වන බවත් මාර්ගගත ක්‍රමය ඔස්සේ මෙය ලබා දීමට පියවර ගැනීම විවේචනය කරන්නන් මෙය තේරුම් ගැනීම වැදගත් බවත් ඒ මහතා කීය.
මේ අවස්ථාවේ පීඩිතයා බවට පත්ව සිටින්නේ සිසු ප්‍රජාව බවත් ජනමාධ්‍යයේ වගකීම පීඩකයාගේ නොව පීඩිතයාගේ පැත්ත ගැනීම බවත් සභාපතිවරයා පැවසුවේය.
