– බී වාර්තා දෙක ගැන සැකයි
– අත්තනගල්ල මහේස්ත්‍රාත් මංජුල කරුණාරත්න කියයි
දින අටකට පසුව තරුණයකු මියගිය අනතුරකට අදාළ අධිසුඛෝපභෝගී ජීප් රථය තුළ පාර්ලිමේන්තු මන්ත්‍රී නලින් බණ්ඩාර මහතා සිටි බවට අධිකරණයට කරුණු වාර්තා නොකිරීමත් ඊට අදාළ පරීක්ෂණ කටයුතු අපක්ෂපාතීව සිදු නොකිරීමත් සම්බන්ධයෙන් පරීක්ෂණයක් පවත්වා වාර්තා එවන ලෙසටත් සම්පූර්ණ නඩු වාර්තාවේ පිටපතක් පොලිස්පතිවරයාට යවන ලෙසටත් අත්තනගල්ල අංක 02 මහේස්ත්‍රාත් මංජුල කරුණාරත්න මහතා අධිකරණයේ රෙජිස්ට්‍රාර්වරියට පෙරේදා (12) පස්වරුවේ නියෝග කළේය.
සිද්ධියට අදාළ සැකකාර රියැදුරාට පෙර නියම කර තිබූ ඇපවලට අමතරව අලුතින් නැවත දැඩි කොන්දේසි සහිත රුපියල් ලක්ෂ දහයක ශරීර ඇපයක් ද මහේස්ත්‍රාත්වරයා මෙහිදී නියම කළේය.
කොළඹ මහනුවර ප්‍රධාන මාර්ගයේ මහනුවර දෙස සිට කොළඹ දෙසට ධාවනය වෙමින් තිබූ පාර්ලිමේන්තු මන්ත්‍රීවරයා ගමන්ගත් අධි සුඛෝපභෝගී ජීප් රථයක් පසුගිය 03 වැනිදා රාත්‍රියේ නිට්ටඹුව කෝන්ගස්දෙණිය ප්‍රදේශයේදී යතුරුපැදියක හැපී ඇති අතර යතුරුපැදිය පදවාගෙන ආ තිහාරිය පහලගම පදිංචිව සිටි ශානුක රවිඳු පෙරේරා නමැති විසි දෙහැවිරිදි තරුණයකු බරපතළ තුවාල ලබා කොළඹ ජාතික රෝහලට ඇතුළත් කර සිටියදී දින අටකට පසුව ප්‍රකාශයක් නොකරම ඉකුත් 11 වැනිදා පෙරවරුවේ මිය ගොස් තිබිණි.
අනතුර සිදු වී දින හතකට පසුව නලින් බණ්ඩාර මන්ත්‍රීවරයාගේ කාර්ය මණ්ඩල රියැදුරකු වන අසංක හසිත බණ්ඩාර ජයවර්ධන නමැත්තා නිට්ටඹුව පොලිසියේ රථ වාහන අංශය මඟින් ඉකුත් 10 වැනිදා සාමාන්‍ය අනතුරකට අදාළ සැකකාර රියැදුරකු වශයෙන් අධිකරණයට ඉදිරිපත් කළ අවස්ථාවේ නීතිඥ සචින්ත කරුණානායක මහතා කරන ලද කරුණු දැක්වීම්වලින් අනතුරුව තුවාලකරු වෙනුවෙන් රුපියල් පනස් දහසක සානුකම්පිත දීමනාවක් ගෙවීමේ කොන්දේසිය යටතේ ශරීර ඇප මත මුදා හැර තිබිණි.
මේ අතර පසුදින (11 වැනිදා) තුවාලකාර තරුණයා මියයෑමෙන් පසුව පොලිසිය වැඩිදුර බී වාර්තාවක් සමඟ ඇප මත මුදා හැර සිටි සැකකාර රියැදුරා පෙරේදා (12) පස්වරුවේ අධිකරණයට ඉදිරිපත් කළේය. මෙහිදී මහේස්ත්‍රාත්වරයා පෙර දින අධිකරණයට ඉදිරිපත් කරන ලද බී වාර්තාව හා නැවත අලුතින් ඉදිරිපත් කරන ලද වැඩිදුර වාර්තාව පරීක්ෂා කිරීමේදී පළමුව ඉදිරිපත් කරන ලද බී වාර්තාවේ පාර්ලිමේන්තු මන්ත්‍රීවරයා සිටි බවට සඳහන් කර නොතිබීමත් අලුතින් ඉදිරිපත් කරන ලද වැඩිදුර වාර්තාවේ අනතුර සිදු වූ අවස්ථාවේ නලින් බණ්ඩාර පාර්ලිමේන්තු මන්ත්‍රීවරයා ජීප් රථය තුළ සිට වෙනත් වාහනයකින් එම ස්ථානයෙන් පිටව ගිය බවට සඳහන් කර තිබීමත් එම වාර්තා දෙක පිළිබඳ සැකයක් මතු වී නිට්ටඹුව පොලිසියේ රථ වාහන අංශයේ උප පොලිස් පරීක්ෂක ජී.ඩී. මංජුල රාජපක්ෂ මහතාගෙන් ප්‍රශ්න කළේය.
මේ අවස්ථාවේ උප පොලිස් පරීක්ෂක ජී.ඩී. මංජුල රාජපක්ෂ මහතා කරුණු දක්වමින් අනතුර සිදු වී ඇති අවස්ථාවේ පරීක්ෂණ කටයුතු සිදු කොට ඇත්තේ පොලිස් සැරයන්වරයකු බවත් පසුගිය 10 වැනිදා සැකකාර රියැදුරා සමඟ අධිකරණයට ඉදිරිපත් කරන ලද බී වාර්තාව පොලිසියෙන් ගෙනවිත් දෙන ලද බවත් එම වාර්තාව තමා ඉදිරිපත් කළ බවත් කියා සිටියේය.
අධිකරණය:-
අනතුර සිදු වූ දිනයේ සැකකාර රියැදුරා අධිකරණයට ඉදිරිපත් නොකර දින හතකට පසුව ඉදිරිපත් කළේ කුමන හේතුවක් මත ද?
උප පොලිස් පරීක්ෂකවරයා:-
අනතුර සිදු වූ දිනයේ රියැදුරා වතුපිටිවල මූලික රෝහලේ වෛද්‍යවරියක් වෙත ඉදිරිපත් කර ඔහු මත්පැන් පානය කර නැති බවට අනාවරණය වීම හේතුවෙන් ඔහු මුදා හැර තිබුණා.
අධිකරණය:-
සැකකාර රියැදුරා නලින් බණ්ඩාර පාර්ලිමේන්තු මන්ත්‍රීවරයාගේ කාර්ය මණ්ඩල රියැදුරකු වන නමුත් පළමුව ඉදිරිපත් කරන ලද බී වාර්තාවේ ඒ බව සඳහන් කිරීමකින් තොරව මන්ත්‍රීවරයා එම ජීප් රථයේ සිට පිටව ගිය බව සඳහන් කර නැත්තේ ඇයි?
උප පොලිස් පරීක්ෂකවරයා:-
එදින පරීක්ෂණ කටයුතු සිදු කොට ඇත්තේ සැරයන්වරයායි. ඔහු ඒ බව සඳහන් කර නැහැ.
අධිකරණය:-
සැකකාර රියැදුරා වෛද්‍යවරියක වෙත එදා ඉදිරිපත් කළා නම් කෝ ඒ පිළිබඳ වෛද්‍ය වාර්තාව.
උප පොලිස් පරීක්ෂකවරයා:-
ඉදිරි දිනයක ඉදිරිපත් කළ හැකි වනවා.
අධිකරණය:-
රියැදුරන් මත්පැන් පානය කර තිබේදැයි පරීක්ෂා කරන නළ පොලිසිය තුළ නැති ද?
උප පොලිස් පරීක්ෂකවරයා:-
නැහැ. පසුගිය අප්‍රේල් මාසයේ සිට නැහැ.
මෙහිදී මහේස්ත්‍රාත්වරයා තවත් කරුණු ගණනාවක් පිළිබඳ ප්‍රශ්න කිරීමෙන් අනතුරුව අනතුර සම්බන්ධව කර ඇති පරීක්ෂණ අපක්ෂපාතීව කර ඇද්ද යන්න පිළිබඳ අධිකරණයට ප්‍රශ්නයක් මතු වන හෙයින් ඒ පිළිබඳ විධිමත් පරීක්ෂණයක් පවත්වා වාර්තා එවන ලෙසට සම්පූර්ණ නඩු වාර්තාවේ පිටපතක් පොලිස්පතිවරයාට යවන ලෙසට අධිකරණයේ රෙජිස්ට්‍රාර්වරියට නියෝග කළේය.
පෙර ඇප මත මුදා හැර සිටි සැකකාර රියැදුරාට එම ඇපවලට අමතරව ග්‍රාම සේවා සහතික සහිත ළඟම ඥාතීන් දෙදෙනකු අත්සන් කළ යුතු රුපියල් ලක්ෂ දහය බැගින් වූ ශරීර ඇප දෙකක් නියම කළේය. ඔහුගේ රියැදුරු බලපත්‍රය තාවකාලිකව අත්හිටුවීමට ද නියෝග කෙරිණි. විදේශගත වීම ද තහනම් කෙරිණි. විදේශගත වීමේ තහනම වහාම ක්‍රියාත්මක වන පරිදි ආගමන විගමන පාලකවරයා වෙත දන්වා යැවීමට ද අධිකරණයේ රෙජිස්ට්‍රාර්වරියට නියෝග කෙරිණි. නැවත කැඳවීම නොවැම්බර් මස 13 වැනිදාට කල් තැබීය. සැකකාර රියැදුරා වෙනුවෙන් නීතිඥ සචින්ත කරුණානායක මහතා පෙනී සිටියේය.
නිට්ටඹුව පොලිසියේ රථ වාහන අංශයේ උප පොලිස් පරීක්ෂක ජී.ඩී. මංජුල රාජපක්ෂ මහතා පැමිණිල්ල මෙහෙයවිය.
