වෙළෙඳපොළේ අඩු මිලට විකිණීමට ඇති ප්‍රමිතියෙන් තොර ආනයනික ප්ලාස්ටික් ලයිටර් වර්ගයක් හේතුවෙන් දේශීය ගිනිපෙට්ටි නිෂ්පාදන කර්මාන්තය කඩා වැටී එම කර්මාන්තයේ නියුතු 10000 කගේ පමණ රැකියා අවිනිශ්චිත තත්ත්වයකට පත්ව තිබෙන බව පවසමින් ගිනිපෙට්ටි කර්මාන්ත ශාලා හිමිකරුවන් සහ සේවකයන් තුන්දහසක් පමණ ඊයේ (13) මහනුවර නගරයේ දී උද්ඝෝෂණයක නිතර වූහ.
බදු වංචා කරමින් විදෙස් රටවලින් මෙරටට ගෙන්වන මේ ප්ලාස්ටික් ලයිටර් වෙළෙඳපොළේ අඩු මිලට විකිණීම හේතුවෙන් පාරිභෝගික ජනතාව ගිනිපෙට්ටි භාවිතය අත්හැර ඒවා මිල දී ගැනීමට යොමු වෙමින් සිටින බවත් මේ හේතුවෙන් ගිනිපෙට්ටි තොග විශාල ප්‍රමාණයක් විකුණා ගැනීමට නොහැකිව කර්මාන්ත ශාලාවල ගොඩගසා තිබෙන බවත් ගිනිපෙට්ටි නිෂ්පාදන කර්මාන්තකරුවෝ පවසති. උද්ඝෝෂණයට එක් වූ පිරිස මහනුවර ජෝර්ජ්.ඊ ද සිල්වා උද්‍යානය ඉදිරිපිට පැයක පමණ කාලයක් උද්ඝෝෂණයේ නිරත වීමෙන් පසු දළදා වීදිය, ඩී.එස්. සේනානායක වීදිය හා රජ වීදිය ඔස්සේ පාගමනින් ආණ්ඩුකාර කාර්යාලය වෙත ගමන් ගත්හ. උද්ඝෝෂකයන්ට ආණ්ඩුකාර කාර්යාල පරිශ්‍රයට ඇතුළුවීමට නොහැකි වන ලෙස පොලිසිය රජ විදිය ඉහළ කෙළවරින් මාර්ග බාධක දමා නියෝජිතයන් පස් දෙනෙකුට ආණ්ඩුකාරවරයා හමුවීමට අවස්ථාව ලබා දුන්නේය.
තම කර්මාන්තවලට ඇතිවී තිබෙන ගැටලු සම්බන්ධයෙන් ආණ්ඩුකාරවරයාට ලිපියක් භාර දෙමින් ඒ සම්බන්ධයෙන් අවධානය යොමු කර දේශීය ගිනිපෙට්ටි කර්මාන්තය ආරක්ෂා කරදීමට කටයුතු සලසා දෙන ලෙස ඔවුහූ ඉල්ලා සිටියහ.
මධ්‍යම පළාත් ආණ්ඩුකාර නීතිඥ ලලිත් යූ. ගමගේ මහතා ඒ අවස්ථාවේ දුරකතනයෙන් කර්මාන්ත ඇමැති රොමේෂ් පතිරණ මහතා සම්බන්ධ කර ගනිමින් ගැටලුව ඉදිරිපත් කිරීමේ අවස්ථාව නියෝජිත පිරිසට ලබා දුන්නේය.
විදේශ රටවලින් මෙරටට ගෙනෙන ප්ලාස්ටික් ලයිටර් වර්ගයක් රුපියල් 25ක පමණ මුදලකට දේශීය වෙළෙඳපොළේ අලෙවි කෙරෙන බවත් මේ හේතුවෙන් ගිනිපෙට්ටි මිලදී ගැනීමට පාරිභෝගිකයන් තුළ පැවැති උනන්දුව පහත වැටී තිබෙන බවත් ජෙට් ගිනිපෙට්ටි කර්මාන්ත ආයතනයේ සභාපති අයිදර් අලී මහතා පැවසීය.
පසුගිය කාලයේ දී සියලු භාණ්ඩ මිල ඉහළ යද්දී ලයිටර් මිල ද සැලකිය යුතු අගයකින් ඉහළ ගිය නමුත් මේ වනවිට එහි මිල ආර්ථික අර්බුදය පැමිණීමට පෙර පැවැති මිලට ද වඩා පහත වැටී තිබෙන බවත් බදු වංචාකර මේවා මෙරටට ගෙන එන බවට මෙය හොඳම සාක්ෂියක් බවත් ගිනිපෙට්ටි කර්මාන්ත සංගමයේ නියෝජිතයෝ පැවසූහ.
රජයට බදු නොගෙවා නොයෙකුත් කූට ක්‍රම මගින් ගෙන එන මේ ප්ලාස්ටික් ලයිටර් පරිසරයට මුදා හැරීමෙන් බරපතළ පරිසර හානියක් ද සිදුවන බව එම පිරිස පෙන්වා දුන්හ.
ඇතැම් රේගු නිලධාරීන්ගේ ද සහාය ඇතිව මේ ලයිටර් රජයට අයවිය යුතු බදු මුදල් ද නොගෙවා රට තුළට ගෙන එන බවට තොරතුරු අනාවරණය වී තිබෙන බවත් මේ සම්බන්ධව ඇමැති රංජිත් සියඹලාපිටිය මහතා ද දැනුවත් කර කඩිනමින් පියවරක් ගන්නා බවත් ඇමැතිවරයා පැවසීය.
මේ සම්බන්ධයෙන් ඇමැතිවරයා සමඟ සාකච්ඡාවක් ලබාදීමට පියවර ගන්නා බව මෙහි දී ආණ්ඩුකාරවරයා ප්‍රකාශ කළේය.
