හබරණ, ත්‍රිකුණාමලය මාර්ගයේ හබරණ තලපත් කන්ද ප්‍රදේශයේදී විදේශීය සංචාරකයන් ගමන් ගත් ජීප් රථයකට පෙරේදා (12) සවස වන අලියකු පහර දීමෙන් එම ජීප් රථය පෙරළී ජීප් රථයේ ගමන් ගත් විදේශිකයන් දෙදෙනකු තුවාල ලබා ජීප් රථයට ද හානි සිදු වී ඇති බව හබරණ පොලිසිය කියයි.
හබරණ හුරුළු පාරිසරික උද්‍යානයේ වන අලින් නරඹා ආපසු හබරණ නගරය දෙසට ගමන් කරමින් සිටි අවස්ථාවේ හුරුළු පාරිසරික වන උද්‍යානයේ සැරිසරන කබරයා නම් අන්වර්ථ නාමයෙන් හඳුන්වන අලියා මෙම ජීප් රථයට පහර දී ඇති බව සෆාරි ජීප් රථ රියැදුරෝ පවසා සිටිති.
මෙම වන අලියා සංචාරකයන් ගමන් ගත් ජීප් රථයට පහර දී පෙරළා දමා ඇති අතර, එහි ගමන් ගත් සංචාරකයන් දෙදෙනා දිව ගොස් වෙනත් ජීප් රථයකට නැඟී තම දිවි බේරා ගෙන ඇත.
අනතුරින් විදේශිකයන් සුළු තුවාල ලබා ඇති අතර, ඔවුන් හබරණ දිසා රෝහලට ඇතුළත් කිරීමෙන් පසු ප්‍රතිකාර ලබා පිටව ගොස් ඇති බව හබරණ පොලිසිය සඳහන් කරයි.
වන අලියා මෙම ජීප් රථයට පහර දී දිගු වේලාවක් එම ස්ථානයේ රැඳී සිටීම හේතුවෙන් අනතුරට ලක්වූ ජීප් රථය එම ස්ථානයෙන් ඉවත් කිරීමට දිගු වේලාවක් රැඳී සිටීමට අනෙකුත් සෆාරි ජීප් රථ හිමියන්ට සිදුවී ඇත.
වන අලියා පහර දීමෙන් පෙරළී අනතුරට පත්ව තිබූ ජීප් රථය අනෙකුත් සෆාරි ජීප් රථ හිමියන් එක්ව මාර්ගයට ගැනීමට කටයුතු කර ඇත.
මෙම අනතුර සම්බන්ධයෙන් හබරණ පොලිසිය හා හුරුළු පාරිසරික වන උද්‍යානයේ වනජීවී නිලධාරින් එක්ව පරීක්ෂණ සිදු කරති.
