ලෝක උරුම සිංහරාජය නැරඹීමට පැමිණෙන විදේශීය සංචාරකයින් ප්‍රමාණය වැඩිවෙමින් ඇතැයි වාර්තා වන අතර
කලවාන කුඩව පිවිසුමෙන් පසුගිය වසරේ (2023) සිට මේ දක්වා දෙස් විදෙස් සංචාරකයන් විසි හත්දහස් හාරසියය විසි හතක් පැමිණ ඇති අතර ප්‍රවේශ පත්‍ර නිකුත් කර කෝටි දෙකකට ආසන්න ආදායමක් ලබාගෙන ඇති බව සිංහරාජ අඩවි වන පාලක කාර්‍යාලය පවසයි.
සිංහරාජ අඩවි වන නිලධාරී මංගල කුලරත්න මහතා ප්‍රකාශ කළේ කොරෝනා වසංගතයෙන් පසුව සංචාරකයන්ගේ පැමිණීම ක්‍රමයෙන් වැඩි වී සංචාරකයන්ගේ පැමිණීම යහපතක් මට්ටමක පවතින බවයි. පසුගිය වසරේ දේශීය සංචාරකයන් දහතුන් දහස් එකසිය අසූ දෙකක් (13182)ක් පැමිණ ඇති අතර විදේශීය සංචාරකයන් හාරදහස් එකසිය විසි අටක් (4128)ක් පැමිණ තිබේ. එමෙන්ම මේ වසරේ මේ දක්වා දේශීය සංචාරකයන් හයදහස් අටසිය දහසයක් හා විදේශීය සංචාරකයන් තුන් දහස් තුන්සිය එකක් පැමිණ ඇති අතර පසුගිය වසර සිට දෙස් විදෙස් සංචාරකයන් විසි හත්දහස් හාරසිය විසිහතක් පැමිණ ඇති අතර ප්‍රවේශ පත්‍ර අලෙවි කිරීමෙන් එක් කෝටි හැටපන් ලක්ෂ තිස් හතර දහස් නවසිය හැටතුනක් (16,534,963) ආදායම් ලබා ඇති බවය. සිංහරාජ වනාන්තරය මේ කාලයේ වර්ෂාපතනය ලැබීමත් සමඟ නැවුම් වී ඇති අතර වියළි කාලයේදී දක්නට නොලැබෙන දිය ඇලි, සත්ත්වයන් රැසක් දක්නට ලැබෙන බැවින් සිංහරාජ වනාන්තරය නැරඹීමට පාසල් දරුවන්ට හා සංචාරකයන්ට ආරාධනා කරන බවද ඒ මහතා ප්‍රකාශ කළේය. සිංහරාජයේ වැද්දාගල තුඩව ප්‍රදේශයේ සන්නිවේදන ගැටලුවලට විසඳුම් ලබා දීමටද කටයුතු කරමින් තිබේ.
