ශ්‍රී ලංකා බැඩ්මින්ටන් ආයතනයේ අනුබද්ධිත පුත්තලම දිස්ත්‍රික් බැඩ්මින්ටන් සංගමය මෙහෙයවනු ලැබූ සමස්ත ලංකා පුත්තලම දිස්ත්‍රික් විවෘත බැඩ්මින්ටන් තරගාවලියේ විවෘත පිරිමි ඒකල ශූරතාව දිනා ගැනීමට ශෙනුක් සමරරත්න සමත් වූ අතර, කාන්තා ඒකල ශූරතාව රශ්මි භාග්‍යා දිනා ගත්තාය.
වෙන්නප්පුව ශ්‍රීමත් ඇල්ෆ්‍රඩ් එෆ්. පීරිස් ගෘහස්ථ ක්‍රීඩාංගණයේදී පසුගියදා පැවති මේ තරගාවලියේ විවෘත පිරිමි ඒකල අවසන් මහා තරගයේදී තිළිණ රාජකරුණා ලකුණු 21-19ක්, 19-21ක් සහ 21-16ක් ලෙස පරාජය කිරීමට ශෙනුක් සමත් වූ අතර, රශ්මි භාග්‍යා හමුවේ ලකුණු 21-11ක් සහ 21-17ක් ලෙස ජනනුවනි ද අල්විස් පරාජයට පත්වූවාය.
ශ්‍රී ලංකා බැඩ්මින්ටන් දෙවැනි මට්ටමේ ක්‍රීඩක ක්‍රීඩිකාවන් ශ්‍රේණිගත කිරීමේ තරගාවලියක් ලෙස පැවති මේ තරගාවලියේ විවෘත පිරිමි යුගල ශූරතාව ලකුණු 21-17ක් සහ 21-16 ලෙස රොෂාන් පද්මකුමාර සහ සුපුන් ලක්රංග පියරත්න පරාජයට පත් කළ මධුක දුලාංජන සහ ළහිරු මධුෂාන් වීරසිංහ දිනාගත් අතර, රශ්මි භාග්‍යා සහ වරංගනා ජයවර්ධන ලකුණු 21-16ක් සහ 21-7 ලෙස නිලාසි බාලසූරිය සහ ජනනුවනි අමන්දා ද අල්විස් පරාජය කරමින් විවෘත කාන්තා යුගල ශූරතාව දිනා ගත්හ.
ලකුණු 21-14ක් සහ 21-14ක් ලෙස විදූ මන්දීව් ලියනගේ සහ නිලාසි බාලසූරිය පරාජය කළ ළහිරු මධුෂාන් වීරසිංහ සහ ඉරූෂි අමන්දි විවෘත මිශ්‍ර ශූරතාව දිනා ගැනීමට සමත් වූහ.
අවුරුදු 19න් පහළ ඉසව්වේදී බාලක ඒකල ශූරතාව තිළිණ රාජකරුණාටත්, බාලිකා ශූරතාව සඳති දෙව්මිණිටත් හිමි වූ අතර, එහි අනුශූරතා පිළිවෙළින් රෙෂාන් හරිත් සහ රුක්ෂිකා බාස්කරන්ට හිමි වූහ. එහි බාලක යුගල ශූරතාව රිතිර සෙන්දිල් අබේගුණවර්ධන සහ තෙනුල් රන්සජ ගනේවත්ත දිනා ගත්හ.
කනිෂ්ඨ, ජ්‍යෙෂ්ඨ, අවුරුදු 110ට වැඩි ඒකාබද්ධ වයස් කාණ්ඩ තරග, විවෘත තරග සහ පළඟ කාණ්ඩයේ තරග ඇතුළත් සමස්ත ලංකා පුත්තලම දිස්ත්‍රික් විවෘත බැඩ්මින්ටන් ශූරතාවලියේ ජයග්‍රාහක ජයග්‍රාහිකාවන්ට රුපියල් ලක්ෂ පහක මුදල් ත්‍යාග, පදක්කම් සහ සහතිකපත් බෙදා දුන්හ.
