රුපියල් ලක්ෂ 60ක් වටිනා ග්‍රෑම් 12 මිලිග්‍රෑම් 60ක් බරැති ගජමුතුවක් ව්‍යාපාරිකයකුට විකිණීමට අනුරාධපුර කිරලෝගම ප්‍රදේශයේ සිට දිවුලපිටියට පැමිණි පුද්ගලයකු දිවුලපිටිය නගරයේදී අත්අඩංගුවට ගැනීමට දිවුලපිටිය දූෂණ මර්දන අංශයේ නිලධාරීහු සමත් වූහ.
පොලිසියට ලද තොරතුරක් මත මෙම වැටලීම සිදු කෙරිණි. මෙම අත්අඩංගුවට ගත් සැකකරු අවුරුදු 26ක් වන අනුරාධපුරය තලාකොළවැව කිරලෝගම පදිංචිකරුවෙකි.
සැකකරු මිනුවන්ගොඩ අධිකරණයට ඉදිරිපත් කිරීමට නියමිතව තිබිණ.
මීගමුව කොට්ඨාස භාර පොලිස් අධිකාරී එරික් පෙරේරා සහ සහකාර පොලිස් අධිකාරී මීගමුව IV එදිරිසිංහ යන මහත්වරුන්ගේ අධීක්ෂණය යටතේ දිවුලපිටිය පොලිස් ස්ථානාධිපති ප්‍රධාන පොලිස් පරීක්ෂක චන්ද්‍රසිරි හිරියාදෙණිය මහතාගේ මෙහෙයවීමෙන් දූෂණ මර්දන අංශයේ ස්ථානාධිපති උප පොලිස් පරීක්ෂක නිහාල් දිසානායක, පොලිස් සැරයන් සුමේධ (49223), පොලිස් කොස්තාපල්වරුන් වන සෙනෙවිරත්න (92830), මධුෂංක (24625) යන නිලධාරීහු වැටලීමට එක්ව සිටියහ.
