දෙදිනක් තිස්සේ බීමතින් නිරාහාරව මහ මඟ නිදා සිටි පුද්ගලයකු ප්‍රදේශවාසීන් විසින් බුලත්සිංහල රෝහලට ඇතුත් කළ පසු මියගොස් තිබේ.
බුලත්සිංහල, පරගොඩ මාර්ගයේ ඉකුත් දා (06) සවස බීමතින් වැටී සිටි 43 හැවිරිදි පුද්ගලයකු ඊයේ (07) උදෑසන මෙසේ මියගොස් සිටි බව බුලත්සිංහල පොලිසිය පැවසීය.
මෙසේ මියගොස් ඇත්තේ බුලත්සිංහල ගලහේනවත්ත ප්‍රදේශයේ පදිංචි 43 හැවිරිදි තංගවේලු ඉලංකෝවන් නමැති පුද්ගලයෙකි. මෙම පුද්ගලයා ඉකුත් (06) දා අධික බීමතින් බුලත්සිංහල පරගොඩ මාර්ගයේ මාර්ගය මැද ඇද වැටී සිටින අවස්ථාවේ බුලත්සිංහල ප්‍රාදේශීය සභාවේ සේවකයන් දෙදෙනකු විසින් මේ පුද්ගලයාව මාර්ගයෙන් ඉවතට කරනු ලැබ තිබිණ. පසුව එම පුද්ගලයා එම ස්ථානයේම රැඳී සිට ඇති අතර, ඊයේ (07) උදෑසන වන විටත් මෙම පුද්ගලයා එම ස්ථානයේම රැඳී සිටිනු දැක ප්‍රදේශවාසීන් විසින් රෝහල්ගත කිරීමට කටයුතු කර තිබේ.
රෝහල්ගත කිරීමේදී මෙම පුද්ගලයා මියගොස් සිටි බව පොලිසිය පවසයි. මියගිය පුද්ගලයාගේ හදිසි මරණ පරීක්ෂණය බුලත්සිංහල හදිසි මරණ පරීක්ෂක චිරාත් භාරත මහතා විසින් සිදු කරනු ලැබ වැඩිදුර පරීක්ෂණ සඳහා සිරුර හොරණ මූලික රෝහලේ අධිකරණ වෛද්‍යවරයා වෙත යොමු කර ඇත.
මෙම පුද්ගලයා දීර්ඝකාලීනව මත්ද්‍රව්‍ය භාවිතයට හුරු වූ පුද්ගලයකු බව පොලිසිය පවසයි. බුලත්සිංහල වැඩබලන පොලිස් ස්ථානාධිපති ප්‍රධාන පොලිස් පරීක්ෂක ගුණසේකර මහතාගේ උපදෙස් මත පොලිස් සැරයන් (62904) ගුණරත්න මහතා මේ පිළිබඳව වැඩිදුර පරීක්ෂණ සිදු කරයි.
