නීතියේ ඇසට වැලි ගසමින් කලක සිට මහා පරිමාණයෙන් මත්ද්‍රව්‍ය ජාවාරමේ නිරත වූ පුද්ගලයකු කේරළ ගංජා කිලෝ පහයි ග්‍රෑම් දෙසීයක් සමඟ අත්අඩංගුවට ගත් බව බස්නාහිර පළාත දකුණ අපරාධ කොට්ඨාසය සඳහන් කළේය.
මෙසේ අත්අඩංගුවට ගෙන ඇත්තේ පන්නිපිටිය, හිරිපිටිය පුහුදෙල්ගහවත්ත ප්‍රදේශයේ පදිංචි (37) හැවිරිදි සංවිධානාත්මක අපරාධ කල්ලි නායකයකු ලෙස සැලකෙන දැනට විදේශගතව සැඟව සිටින ‘හඳපාන්ගොඩ හඳයා’ නමැත්තාගේ ප්‍රධාන ගෝලයකු බව පොලිසිය කියයි. බස්නාහිර පළාත් බුද්ධි කොට්ඨාසයේ පොලිස් සැරයන් (4853) චන්දන නිලධාරියාට ලද තොරතුරක් අනුව මෙම වැටලීම සිදු කර තිබුණි. ඒ අනුව සැකකරු අත්අඩංගුවට ගැනීම සඳහා විමර්ශනයක් සිදු කරමින් සිටියදී ලද තොරතුරකට අනුව හෝමාගම සතිපොළ භූමියේ රැඳී සිටි පුද්ගලයකු කේරළ ගංජා ග්‍රෑම් 200ක් සමඟ අත්අඩංගුවට ගෙන ඔහුට කේරළ ගංජා අලෙවි කරන පුද්ගලයා පිළිබඳව සිදු කළ දීර්ඝ විමර්ශනයකදී අනාවරණය වූ තොරතුරුවලට අනුව මෙසේ සැකකරුගේ නිවෙස පරීක්ෂා කර තිබේ. එම අවස්ථාවේදී සැකකරු සන්තකයේ තිබී කේරළ ගංජා කිලෝ 5 ග්‍රෑම් 200ක් භාරයට ගත් බව පොලිසිය පැවසීය.
වැටලීම සිදු කරන අවස්ථාවේදී සැකකරු පොලියට මුදල් ලබා දෙමින්, සුනඛයන් ඇති කරමින් වැදගත් ලෙස ජීවනෝපාය සලසා ගන්නා පුද්ගලයකු බවට පවසා පොලිස් නිලධාරීන් නොමඟ යැවීමට උත්සාහ කළද එය ව්‍යර්ථ කරමින් සැකකරු මත්ද්‍රව්‍ය සමඟ මෙසේ අත්අඩංගුවට ගෙන තිබේ. සැකකරු මත්ද්‍රව්‍ය ජාවාරම සඳහා අධික වටිනාකමින් යුත් ජංගම දුරකතනයක් භාවිත කරන අතර එම ජංගම දුරකතනය වැටලීම සිදුකරන අවස්ථාවේදී කොටස් ගලවා සඟවා තිබියදී පොලිසිය සොයා ගෙන තිබේ.
සැකකරු සංවිධානාත්මක අපරාධ කල්ලි නායකයකු ලෙස සැලකෙන, දැනට විදේශගතව සිටින ‘හඳපාන්ගොඩ හඳයා’ නමැත්තාගේ ප්‍රධාන ගෝලයකු බවට මේ වන විට තොරතුර ලැබී ඇති බවත්, ඔහුගේ උපදෙස් මත සැකකරු මහා පරිමාණයෙන් මත්ද්‍රව්‍ය ජාවාරම කරගෙන ගොස් ඇති බවට තොරතුරු අනාවරණය වූ බවත් පැවසේ. අත්අඩංගුවට ගත් සැකකරු අධිකරණයට ඉදිරිපත් කොට රඳවා ගැනීමේ නියෝග ලබා ගැනීම සඳහා හෝමාගම මූලස්ථාන පොලිසියට භාර දී ඇත.
සිද්ධිය සම්බන්ධයෙන් බස්නාහිර පළාත දකුණ අපරාධ කොට්ඨාසයේ අධ්‍යක්ෂක ජනක කුමාර මහතාගේ අධීක්ෂණය යටතේ ස්ථානාධිපති පොලිස් පරීක්ෂක සුමිත් ජයසිංහ මහතාගේ උපදෙස් මත, පොලිස් පරීක්ෂක මුදිත දල්පදාදු මහතාගේ මෙහෙයවීමෙන් පො.සැ (4853 ) චන්දන (56958) ප්‍රසන්න විශේෂ කාර්ය බළකායේ වීරසිංහ සහ අබේකෝන් නිලධාරීහු එක්ව වැටලීම සිදුකොට ඉදිරි පරීක්ෂණ පවත්වති.
