මියන්මාරයේ නව ශ්‍රී ලංකා තානාපතිනි ප්‍රභාෂිණී පොන්නම්පෙරුම මහත්මිය ධුරයේ රාජකාරි කටයුතු නිල වශයෙන් ආරම්භ කර තිබේ. යැංගෝන්හි පිහිටි ශ්‍රී ලංකා තානාපති කාර්යාලයේ දී පොන්නම්පෙරුම මහත්මිය වැඩ භාරගෙන ඇති බව විදේශ කටයුතු අමාත්‍යාංශය පවසයි.
රාජකාරී ආරම්භ කිරීමෙන් පසු තානාපති කාර්යාල කාර්ය මණ්ඩලය අමතමින් නව තානාපතිනිය ප්‍රකාශ කළේ ශ්‍රී ලංකා – මියන්මාර දිගුකාලීන මිත්‍රත්වය ශක්තිමත් කිරීමට තමන් කැප වන බවයි. ශ්‍රී ලංකාව සහ මියන්මාරය අතර සබඳතා ථෙරවාදී බුදුදහම මත පදනම් වන බව ද ඒ මහත්මිය සඳහන් කර ඇත. අන්‍යෝන්‍ය ප්‍රතිලාභ සඳහා දෙරට අතර ආර්ථික, දේශපාලනික සහ සංස්කෘතික සබඳතාව වැඩිදියුණු කිරීමේ අවශ්‍යතාව ද ඇය අවධාරණය කර තිබේ.
තානාපතිනි ප්‍රභාෂිනී පොන්නම්පෙරුම මහත්මිය විදේශ කටයුතු අමාත්‍යාංශයේ සහ විදේශයන්හි ශ්‍රී ලංකා දූත මණ්ඩලවල විවිධ තනතුරු දැරූ ශ්‍රී ලංකා විදේශ සේවයේ වසර 21කට වැඩි සේවා කාලයක් සහිත වෘත්තීය විදේශ සේවා නිලධාරිනියක් මෙන්ම ශ්‍රී ලංකාවේ කීර්තිමත් රාජ්‍ය තාන්ත්‍රික නිලධාරිනියකි.
