පාකිස්තානයේ දරුවන් මිලියන 26ක් පාසල් අධ්‍යාපනයෙන් බැහැරව සිටින බවත්, ඔවුන් නැවත පාසල් කරා යොමු කිරීමට සහ බිඳ වැටී ඇති අධ්‍යාපනය නැවත නඟා සිටුවීමට කඩිනම් වැඩපිළිවෙළක් රජය විසින් ක්‍රියාත්මක කළ යුතුව ඇතැයි ප්‍රකාශ කරමින් පාකිස්තාන අගමැති ශෙබාස් ෂරීෆ් පාකිස්තානයේ අධ්‍යාපන හදිසි තත්ත්වයක් පසුගිය මාසයේ ප්‍රකාශයට පත් කළ බව එරට ඩෝන් පුවත් සේවය වාර්තා කළේය. ලොව ඉහළම තලයේ අධ්‍යාපනික ක්‍රමයක් සහිත රටක් බවට පාකිස්තානය පත් කරන බව සඳහන් කරමින් අගමැති ශෙරිෆ් වැනි පියවරක් ගනු ලැබුවද, මේ වනවිටත් එරට අධ්‍යාපනය දැඩි අර්බුදයකට ලක්වී තිබෙන බව ද එරට අධ්‍යාපන විශේෂඥවරු පෙන්වා දී ඇතැයි ද වාර්තා වේ.
මිලියන 26ක දරුවන් එරට පාසල් අධ්‍යාපනයෙන් බැහැරව සිටීම එරට සමස්ත දරුවන්ගෙන් 39%ක ප්‍රතිශතයක් බවත්, පාසල් අධ්‍යාපනය ලබන දරුවන්ගෙන් මිලියන 43කට ප්‍රමාණවත් අධ්‍යාපනයක් පාසල් තුළින් නොලැබෙන බවත් පාකිස්තානයේ අධ්‍යාපන විශේෂඥවරු සඳහන් කර ඇතැයි ද වාර්තා වේ.
දශක ගණනාවක් පුරා එරට පාසල් අධ්‍යාපනය සඳහා සිදු කරනු ලබන අඩු ආයෝජන සහ ඊට සමාජ ප්‍රතිපාදන නොමැතිවීම ඊට හේතු වී ඇතැයි ද ඔවුන් වැඩිදුරටත් ප්‍රකාශ කර ඇතැයි පාකිස්තාන මාධ්‍ය සඳහන් කළේය. වසර 2022දී පාකිස්තාන රජය එරට අධ්‍යාපනය සඳහා වැය කර ඇත්තේ 1.9%ක ප්‍රතිශතයක් බවත්, එය දකුණු ආසියාතික සෙසු රටවල් සමඟ සංසන්දනය කිරීමේදී ඉතා අඩු ප්‍රතිශතයක් බවත් පාකිස්තාන අධ්‍යාපන විශේෂඥවරු ප්‍රකාශ කර ඇතැයි එරට මාධ්‍ය වැඩිදුරටත් වාර්තා කළේය.
