ඉන්දියාවේ නව අගමැතිවරයා ලෙස හිටපු අගමැති තුන්වැනි වරටත් හෙට (9) දිව්රුම් දෙමින් ඉන්දියාවේ 18 වැනි පාර්ලිමේන්තුවේ වැඩකටයුතු ආරම්භ කරන බව එරට මාධ්‍ය වාර්තා කළේය. ඉන්දියාවේ නව රජයක් පිහිටුවීමට ඊයේ එරට ජනාධිපතිනිය ද්‍රව්පදි මුර්මු නිල වශයෙන් භාරතීය ජනතා පක්ෂයේ සහ ජාතික ප්‍රජාතන්ත්‍රවාදී සන්ධානයේ නායක නරේන්ද්‍ර මෝදිට ඇරියුම් කළ බවද එරට මාධ්‍ය වැඩිදුරටත් වාර්තා කළේය. හෙට පස්වරු 6.00ට එම දිව්රුම් දීමේ උත්සවය නවදිල්ලි නුවර රාෂ්ට්‍රපති භවාන් නිල ජනාධිපති මන්දිරයේදී සිදු කිරීමට නියමිත බව එම සන්ධානයේ ජ්‍යෙෂ්ඨ නායකයකු ප්‍රකාශ කළ බව විදෙස් මාධ්‍ය සඳහන් කළේය. අගමැති මෝදිගේ දිව්රුම් දීමේ උත්සවය අතරතුර නව රජයේ කැබිනට් මණ්ඩලයත් දිව්රුම් දිමට නියමිතය.
මෙවර ඉන්දීය මහමැතිවරණයේදී තනි පක්ෂයක් ලෙස භාරතීය ජනතා පක්ෂය ආසන 240ක ජය තහවුරු කරගත් අතර, රජයක් පිහිටුවීමට අවශ්‍ය ආසන 272ක සම්පූර්ණ කිරීමට භාරතීය ජනතා පක්ෂය සමඟ සන්ධානගත වූ චන්ද්‍රබාබු නායිදුගේ නායකත්වයෙන් යුතු තෙළිඟු දේසම් පක්ෂය සහ නිතිෂ් කුමාර්ගේ නායකත්වයෙන් යුතු ජනතා දාල් (එක්සත්) පක්ෂය ඇතුළු පක්ෂ කිහිපයක සහාය ලැබී ඇතැයි වැඩිදුරටත් වාර්තා වේ. අාන්ද්‍රා ප්‍රාන්තයෙන් ආසන 16ක් ජයගත් තෙළිඟු දේසම් පක්ෂයට නව රජයේ අමාත්‍යධුර 5ක් අවශ්‍ය බවට සහ ආසන 12ක් ජයගත් ජනතා දාල් (එක්සත්) පක්ෂයට අමාත්‍යධුර 3ක් අවශ්‍ය බවට එම පක්ෂවල නායකයන් අගමැතිවරයාගෙන් ඉල්ලා සිටි බවත්, දෙදිනක් පුරා පැවැති සාකච්ඡා වට කිහිපයකින් පසු එම ගැටලුව විසඳා ගැනීමට පක්ෂ නායකයන්ට හැකි වූ බවත් වැඩිදුරටත් වාර්තා වේ.
