ඉන්දියාවේ නව අගමැතිවරයා ලෙස තුන්වැනි වරටත් පත් වූ නරේන්ද්‍ර මෝදිට අමෙරිකාවේ ජනාධිපති ජෝ බයිඩ්න් දුරකතන ඇමතුමක් ලබා දී සුබ පතා ඇතැයි ද, ඉන්දියාව සහ අමෙරිකාව අතර සහයෝගිතාව ගෝලීය යහපත උදෙසා අඛණ්ඩ බලපෑමක් වන බව ප්‍රකාශ කර ඇතැයි ද විදෙස් මාධ්‍ය වාර්තා කළේය. පසුගියදා නිමාවට පත්වූ ඉන්දීය මහමැතිවරණයෙන් භාරතීය ජනතා පක්ෂය ඇතුළු ජාතික ප්‍රජාතන්ත්‍රවාදී සන්ධානය පාර්ලිමේන්තුවේ බහුතරය අත්කර ගත්තේය.
ඉන්දීය ප්‍රජාතන්ත්‍රවාදය අමෙරිකානු ජනාධිපතිවරයාගේ පැසසුමට ලක්වීම ඉහළින් අගය කරන බව බයිඩ්න් සමඟ පැවැති දුරකතන සංවාදයෙන් පසු එක්ස් සමාජ මාධ්‍යජාලයේ සටහනක් තබමින් නරේන්ද්‍ර මෝදි ප්‍රකාශ කර ඇති අතර, දෙරට අතර සහයෝගීතාව මනුෂ්‍ය යහපත වෙනුවෙන් ගෝලීය බලයක් බවට පත්වනු ඇතැයි ඔහු අපේක්ෂා කරන බව සඳහන් කර ඇතැයි විදෙස් මාධ්‍ය වැඩිදුරටත් වාර්තා කළේය. ඉදිරි වසර කිහිපයේදී අමෙරිකාව සහ ඉන්දියාව අතර සම්බන්ධතාව තවදුරටත් ශක්තිමත් කිරීමට අවශ්‍ය පියවර ගැනීමට නියමිත බවද වාර්තා වේ.
