ආචාර්ය හර්ෂ ද සිල්වා මහතා මුදල් පිළිබඳ කාරක සභාවෙන් පන්නාගන්න කිසිවකුට වුවමනාවක් නැතැයි සභානායක, අධ්‍යාපන ඇමැති ආචාර්ය සුසිල් ප්‍රේමජයන්ත මහතා පාර්ලිමෙන්තුවේදී ඊයේ (7) පැවසීය. පාර්ලිමේන්තු මන්ත්‍රී හර්ෂ ද සිල්වා මහතා විසින් කරන ලද ප්‍රකාශයකට පිළිතුරු දෙමින් ඒ මහතා මේ බව කීවේය. වත්මන් ජනාධිපති රනිල් වික්‍රමසිංහ මහතා අගමැති වශයෙන් සිටියදී පත් කරන ලද මුදල් පිළිබඳ කාරක සභාව තුළින් සුවිශේෂ කාර්යභාරයක් ඉටු වන බවත්, විෂයය සම්බන්ධ ප්‍රාමාණික දැනුමක් ඇති හර්ෂ ද සිල්වා මහතා වැනි අයකු ඒ තනතුරට සුදුසු බවත් ප්‍රේමජයන්ත මහතා පැවසීය. එවන් උත්සාහයක් සම්බන්ධයෙන් තමා නොදන්නා බවද කී ඒ මහතා,
“විශාල කාර්යභාරයක් මෙතුමන්ලාට පැවරිලා තිබෙනවා. වත්මන් ජනාධිපතිතුමාම තමයි අලුතෙන් ඔය මුදල් කමිටුව නිර්මාණය කළේ. මේ ආර්ථික ප්‍රශ්නයක් තිබෙන වෙලාවක මේ කමිටුවේ අගය දැඩිව දැනෙනවා. ඒ නිසා අප විශේෂයෙන් මේ ගැන සලකා බලා මුදල් කාරක සභාවේ කටයුතු කරගෙන යන්න සම්පත් ටික දෙන්න ඕනෑ. අප සම්පූර්ණ සහයෝගය දෙනවා. මේක ඉතා දුෂ්කර කාර්යයක්. ඔබතුමා පන්නගන්න අප කාටවත් ඕනෑ නෑ. ඔබ විෂයය ගැන දන්නවා; පර්යේෂණ කරනවා,” යැයිද කීවේය.
