අමෙරිකාව සහ බ්‍රිතාන්‍ය විසින් පසුගියදා යේමනයට එල්ල කළ මාරාන්තික ප්‍රහාරයට ප්‍රතිචාර වශයෙන් රතු මුහුදේ යාත්‍රා කරමින් තිබූ අමෙරිකානු ගුවන්යානා රැගත් නෞකාවකට මිසයිල ප්‍රහාරයක් එල්ල කළ බව හවුති කැරලිකරුවන් ප්‍රකාශ කර ඇතැයි වාර්තා වේ. විදෙස් මාධ්‍ය සඳහන් කරන්නේ ඊයේ එම මිසයිල ප්‍රහාරය එල්ල කර ඇතැයි හවුති හමුදා ප්‍රකාශක යහ්යා සරී ප්‍රකාශ කළ බවය.
අමෙරිකාව සහ බ්‍රිතාන්‍ය හමුදාව යේමනයට එල්ල කළ ප්‍රහාරයෙන් පුද්ගලයන් 16 දෙනකු ජිවිතක්ෂයට පත්වූ බවත්, ඉදිරියේදී රතු මුහුදේ අමෙරිකානු හා බ්‍රිතාන්‍ය නෞකාවලට ප්‍රහාර එල්ල කරන බවත් හවුති හමුදා ප්‍රකාශක වැඩිදුරටත් සඳහන් කර ඇතැයි ද වාර්තා වේ.
යේමනයට එල්ල වූ ප්‍රහාරය පිළිබඳ හවුති පාලනයේ පවතින එරට අල් මසිරියා රූපවාහිනි නාළිකාව නිවේදනය කර ඇති අතර, සිවිල් වැසියන් තුවාල ලැබූ අයුරු දැක්වෙන වීඩියෝ පටයක් ද විකාශය කර ඇතැයි වාර්තාවේ. අමෙරිකානු සහ බ්‍රිතාන්‍ය ප්‍රහාරයෙන් සිවිල් වැසියන් 42 දෙනකු තුවාල ලැබූ බව අල් මසිරියා රූපවාහිනි නාළිකාව සඳහන් කර ඇතැයි ද වාර්තා වේ. කෙසේ වුවද පලස්තීන ජනතාව වෙනුවෙන් දක්වන යුදමය සහයෝගය එම ප්‍රහාරයෙන් වැළැක්විය නොහැකි බවද හවුති කැරලිකාර කණ්ඩායමේ නිලධාරියකු ප්‍රකාශ කර ඇතැයි විදෙස් මාධ්‍ය වාර්තා කළේය.
