අධිකරණය අමාත්‍ය විජයදාස රාජපක්ෂ මහතාට ශ්‍රී ලංකා නිදහස් පක්ෂයේ සභාපති ධුරයේත්, නීතිඥ කීර්ති උඩවත්ත මහතාට ලේකම් ධුරයේත් කටයුතු කිරීමට බාධා කිරීම වළක්වා ලමින් පනවා තිබූ වාරණ නියෝගය ඉවත් කිරීමට කඩුවෙල දිසා විනිසුරු දුලානි එස්. වීරතුංග මහත්මිය ඊයේ (31) දින නියෝග කළාය. එසේම විජයදාස රාජපක්ෂ මහතා සහ කීර්ති උඩවත්ත මහතා අදාළ තනතුරවලට පත් කිරීම සඳහා පැවැත්වූ විධායක සභා රැස්වීම නීත්‍යනුකූල නොවන බවද මෙහිදී අධිකරණය මඟින් තීරණය කරන ලදි. ශ්‍රි ලංකා නිදහස් පක්ෂයේ විධායක සභිකයන් වන ඉසුරු අබේවර්ධන සහ සුමිත් සොයිසා මහත්වරුන් විසින් තම පක්ෂයේ විධායක සභාව මඟින් සභාපතිවරයා ලෙස විජයදාස රාජපක්ෂ මහතා සහ ලේකම් ලෙස කීර්ති උඩවත්ත මහතා පත් කරගෙන ඇති බැවින් ඒ සඳහා බාධා පැමිණවීම වළක්වන ලෙස ඉල්ලා කඩුවෙල දිසා අධිකරණය වෙත ඉල්ලීමක් කර තිබූ අතර, ඒ අවස්ථාවේදී අදාළ බාධා කිරීම් නොකරන ලෙස කඩුවෙල දිසා අධිකරණය මගින් ඉකුත් 15 දින වාරණ නියෝගයක් පැනවිණි. මේ අතරතුර වග උත්තරකාර පාර්ශ්වය මඟින් අදාළ වාරණ නියෝගය ඉවත් කරන ලෙස දිසා අධිකරණය වෙත පෙත්සමක් ඉදිරිපත් කර තිබිණි.
අදාළ පෙත්සම සලකා බැලූ අධිකරණය මේ නියෝගය දුන් අතර, මේ සම්බන්ධයෙන් වූ ඉදිරි නඩු විභාගය ජූලි මස 9 දා යළි කැඳවීමට නියමිත වේ.
