මහනුවර ටොරින්ටන් වෙළෙඳ සංගමය විසින් රාත්‍රී කාලයේ ඉබි යතුරු දමා වසා තබන මහනුවර ජෝර්ජ් ඊ. ද සිල්වා උද්‍යානයේ ඇති බුදු මැඳුරට ඇතුළු වන ගේට්ටුවේ අගුළු කඩා බුදු මැඳුරට අලාභහානි කිරීම සම්බන්ධනේ මහනුවර පොලිසියේ විවිධ පැමිණිලි අංශය මඟින් යකඩයා නමින් හඳුන්වන යාචකයකු අත්අඩංගුවට ගෙන තිබේ.
දරුවන් පස් දෙනෙකුගේ පියකු වන සැකකරු ඔහුගේ දරුවන් සිඟමනේ යොදවා උපයා ගන්නා මුදලින් මත්කුඩු පානය කරන බව පොලිස් පරීක්ෂණ මඟින් අනාවරණය වී ඇත. මෙම පුද්ගලයාගේ දරුවන් සිව් දෙනකුම මේ වන විට පරිවාස භාරයේ පසුවන බව පොලිසිය පවසයි.
බුදු මැඳුර රාත්‍රී කාලයේ යාකචකයන්ගේ පාරාදීසයක් බවට පත්වීම නිසා දිවා කාලයේ වැඳුම් පිදුම් කිරීමට පවා නොහැකි ලෙස එම ස්ථානය අපිරිසිදු වී තිබෙන බැවින් රාත්‍රී කාලයේ බුදු මැඳුරට ඇතුළු වීමට නොහැකි ලෙස එහි ගේට්ටුවට ඉබි යතුරු දැමූ බව ටොරින්ටන් වෙළෙඳ සංගමය පවසයි.
සැකකරුට එරෙහිව අයුතු ඇතුළු වීම සහ අනර්ථය යටතේ නඩු පවරන බව පොලිසිය පවසයි. මහනුවර පොලිසියේ විවිධ පැමිණිලි අංශයේ ස්ථානාධිපති ප්‍රධාන පොලිස් පරීක්ෂක දිසානායක මහතාගේ මෙහෙයවීමෙන් පරීක්ෂණ පවත්වයි.
