නිවාඩු සලකුණු නොකර සේවයට වාර්තා නොකර සිටින යුද හමුදා සාමාජිකයන් 9,770ක් පොදු සමා කාලයේ දෙසතියක් තුළ ඉවත් කර ඇති බව ශ්‍රී ලංකා යුද හමුදා මූලස්ථානය පවසයි.
ශ්‍රී ලංකා යුද හමුදාවේ නිවාඩු සලකුණු නොකර සේවයට වාර්තා නොකර සිටින සාමාජිකයන්ට නීත්‍යනුකූලව සේවයෙන් ඉවත් වීම සඳහා අප්‍රේල් 20 දින සිට මෙමස 20 දින දක්වා වූ මසක කාලය තුළ පොදු සමා කාලයක් ප්‍රකාශයට පත් කර ඇත. ප්‍රකාශිත පොදු සමා කාලසීමාවේ දෙසතියක් අවසානයේ එනම් අප්‍රේල් 20 දින සිට මැයි 4 දින දක්වා කාලය තුළ, 2023 දෙසැම්බර් 31 දින සහ ඊට පෙර නිවාඩු සලකුණු නොකර සේවයට වාර්තා නොකළ යුද හමුදා සාමාජිකයන් 9,735 දෙනකු ඔවුන් අයත් රෙජිමේන්තු මධ්‍යස්ථාන වෙතින් තාවකාලික අස්කිරීම් කටයුතු සිදු කර තිබේ.
නිවාඩු සලකුණු නොකර සේවයට වාර්තා නොකර දැනට විදේශගතව සිටින යුද හමුදා සමාජිකයන් 35 දෙනකු සඳහාද මේ කාලසීමාවේ යුද හමුදා සේවයෙන් නීත්‍යනුකූලව ඉවත් වීම සඳහා කටයුතු සිදු කර දී ඇති බව ශ්‍රී ලංකා යුද හමුදා මූලස්ථානය වැඩි දුරටත් සඳහන් කරයි.
