- ක්‍රීඩා ප්‍රශ්න විසඳීමට දුක්ගන්නාරාල කෙනෙක්
- පරිපාලනයට සම්බන්ධ නව රෙගුලාසි 38ක් එයි
ජාතික ඔලිම්පික් කමිටුවේ හෝ ජාතික සංගමයක තනතුරු දැරීමේදී හා නාමයෝජනා ලබාදීමේදී අනුගමනය කළ යුතු නව නීති මාලාවක් හදුන්වා දෙමින් ක්‍රීඩා ඇමැති හරීන් ප්‍රනාන්දු මහතා ක්‍රීඩා පනත අනුව ලැබී ඇති බලතල ප්‍රකාරව අති විශේෂ ගැසට් නිවේදනයක් ප්‍රකාශ කිරීමට කටයුතු යොදා ඇත.
ඒ අනුව ක්‍රීඩා සංගම් පරිපාලනයට සම්බන්ධ රෙගුලාසි 38ක් නව ගැසට් නිවේදනයෙන් ප්‍රකාශයට පත්වන අතර, එම නව නීති අනුව යම් නිලධාරියකුට ප්‍රධාන තනතුරක කටයුතු කළ හැකි උපරිම ධුර කාලය වසර 8ක් වන අතර, එය වසර 4 බැගින් අවස්ථා දෙකක් ලෙස සඳහන් වේ.
කුමන හෝ ප්‍රධාන තනතුරක ධුර දැරිය හැකි උපරිම කාලය වසර 2 බැගින් වසර 4ක් බව මෙතෙක් තිබූ නීතිය වන අතර, එමඟින් වැඩක් කිරීමට කාලයක් නැති බවට ක්‍රීඩා ක්ෂේත්‍රයේ මතයක් ගොඩනැගුණි. එබැවින් විවිධ පාර්ශවවල ඉල්ලීම් සලකා එම නීතිය ඇතුළු නීති ගණනාවක් සංශෝධනය කිරීමට ක්‍රීඩා ඇමැති හරීන් ප්‍රනාන්දු මහතා කටයුතු කර ඇත.
“ක්‍රීඩාව සම්පූර්ණයෙන්ම දේශපාලනයෙන් ඈත් කරනවා. දේශපාලනඥයෙකුට ක්‍රීඩා සංගමයක හෝ ප්‍රාදේශීය සංගමයක හෝ නිලතල දරන්න බෑ. ඒ සම්බන්ධ ක්‍රියාමාර්ග ගැනීමට ක්‍රීඩා අධ්‍යක්ෂවරයාට බලතල පවරා තියෙනවා. ක්‍රීඩාවේ තියෙන ප්‍රශ්න විසඳන්න ‘ඔම්බඩ්ස්මන්වරයෙක්’ දුක්ගන්නාරාල කෙනෙක් පත් කරන්න කටයුතු කළා. තව තවත් දැඩි නීති ගෙනත් තියෙනවා” ඇමැතිවරයා පැවැසීය.
ක්‍රීඩා ‘ඔම්බඩ්ස්මන්වරයා’ වසර 3ක කාලයකට පත්වන අතර, ක්‍රීඩාව සම්බන්ධයෙන් ඇති දුක්ගැනවිල්ල ඔහු වෙත ඉදිරිපත් කිරීමෙන් අනතුරුව ඔහු විසින් ක්‍රීඩා ඇමැතිවරයාගේ අභියාචනා උපදේශන කමිටුවට නිර්දේශ ඉදිරිපත් කිරීම සිදුවේ. කලින් ක්‍රීඩාවට සම්බන්ධ ගැටලු රුපියල් 15000ක් ගෙවා ක්‍රීඩා අමාත්‍යාංශයේ අභියාචනා උපදේශන කමිටුවට ඉදිරිපත් විය. මේ නව නියෝග පසුගිය 3 වැනිදා සිට බලාත්මක කිරීම උදෙසා කටයුතු කොට ඇත.
