නාත්තන්ඩිය මාදම්පේ ප්‍රධාන මාර්ගයේ ගමන් ගත් ලොරි රථයක් මාර්ගයෙන් ඉවතට පැන ගසක ගැටී සිදු වූ අනතුරකින් පුද්ගලයන් දෙදෙනෙක් මියගොස් තවත් අයකු බරපතළ තුවාල ලබා මාරවිල මූලික රෝහලට ඇතුළත් කොට ඇති බව මාරවිල පොලිසියේ රථවාහන අංශය පවසයි. පෙරේදා (02) පස්වරුවේ මෙම අනතුර සිදුව ඇත.
සිද්ධියෙන් මියගොස් ඇත්තේ හලාවත ජයබිම ප්‍රදේශයේ පදිංචිව සිටි වයස අවුරුදු 45ක් වූ මෙහොමඩ් අරූෂ් සහ අවුරුදු 33ක් වූ මොහොමඩ් ෂබීක් නැමති දෙදෙනායි.
අනතුරෙන් බරපතල ලෙස තුවාල ලැබූ අය මාරවිල මූලික රෝහලේ දැඩිසත්කාරක ඒකකයේ ප්‍රතිකාර ලබයි.
නාත්තන්ඩිය ප්‍රදේශයේ සිට පැමිණි තහඩු ප්‍රවාහනය කරමින් තිබූ ලොරි රථය රියැදුරුට නින්දයාම හේතුවෙන් මාර්ගයෙන් ඉවතට ගොස් ගසක ගැටී මෙම අනතුර සිදුව ඇත. ලොරි රථයට බරපතළ හානි සිදුවී තිබේ. මාරවිල පොලිසියේ රථවාහන අංශය පරීක්ෂණ සිදු කරයි.
