බලපත්‍ර නොමැතිව ගවයින් 5ක් ප්‍රවාහනය කළ කැබ් රථයක් සහ බලපත්‍ර නීති උල්ලංඝනය කරමින් එළුවන් 20 දෙනෙකු ප්‍රවාහනය කරමින් තිබූ කුඩා ප්‍රමාණයේ ලොරි රථයක් සැකකරුවන් තිදෙනෙකු සමඟ අත්අඩංගුවට ගත් බව අනුරාධපුර කොට්ඨාස රථවාහන අංශය පවසයි.
ඊයේ (03) අලුයම මිහින්තලය නගරය ආසන්නයේ, A9 මාර්ගයේ සිදු කළ රථ වාහන පරීක්ෂාවකදී කුඩා ලොරි රථයක එළුවන් 20 දෙනෙකු, හිංසාකාරී අයුරින් ප්‍රවාහනය කරමින් තිබියදී මෙලෙස අත්අඩංගුවට ගත් බව පොලිසිය පවසයි. එම එළුවන් සෙට්ටිකුලම සිට මහනුවර ප්‍රදේශයට ප්‍රවාහනය කරමින් තිබූ අතර, අත්අඩංගුවට ගත් සැකකරුවන් දෙදෙනා අනුරාධපුර මහේස්ත්‍රාත් අධිකරණයට ඉදිරිපත් කිරීමට නියමිතව ඇත. කැකිරාව පොලිස් වසමේ A9 මාර්ගයේ, ඇලගමුව ප්‍රදේශයේදී මාර්ගයේ ගමන් කළ බොලෙරෝ වර්ගයේ කැබ් රථයක් නතර කර සිදු කළ පරීක්ෂාවක දී බලපත්‍ර කිසිවක් නොමැතිව මී ගවයින් දෙදෙනකු, එළ ගවයින් තුන්දෙනකු ප්‍රවාහනය කරමින් සිටි පුද්ගලයෙකු අත්අඩංගුවට ගත් බව පොලිසිය සඳහන් කළේය. මෙම සතුන් තිරප්පනේ, දෙමටෑව ප්‍රදේශයේ සිට පුබ්බෝගම දක්වා ප්‍රවාහනය කරමින් සිටි බවත් සිද්ධිය සම්බන්ධයෙන්, මහව, රන්දෙණිය ප්‍රදේශයේ පදිංචි පුද්ගලයකු අත්අඩංගුවට ගත් බවත් පොලිසිය පවසයි. එම සැකකරු කැකිරාව මහේස්ත්‍රාත් අධිකරණය වෙත ඉදිරිපත් කිරීමට නියමිතව ඇත.
