වෛද්‍යවරුන් වෙත නිකුත් කර ඇති නිල ලාංඡනය සහිත ස්ටිකරය වාහනවල තබාගනිමින් එය අවභාවිත කොට ඇතැම් නීතිවිරෝධී ක්‍රියාකාරකම්වල නිරතවන පුද්ගලයන් සම්බන්ධයෙන් ක්‍රියාමාර්ග ගැනීම කෙරෙහි ශ්‍රී ලංකා පොලිසියේ අවධානය යොමුව තිබේ.
රජයේ වෛද්‍ය නිලධාරීන්ගේ සංගමයේ (Government Medical Officers Association – GMOA) සභාපති විශේෂඥ වෛද්‍ය දර්ශන සිරිසේන මහතා සහ රජයේ වෛද්‍ය නිලධාරීන්ගේ සංගමයේ ලේකම් වෛද්‍ය හරිත අලුත්ගේ මහතා ඇතුළු වෛද්‍යවරුන් පිරිසක් ඊයේ (03) පොලිස් මූලස්ථානයේ දී පොලිස්පතිවරයා ඇතුළු ජ්‍යෙෂ්ඨ පොලිස් නිලධාරීන් පිරිසක් සමඟ පැවැති විශේෂ සාකච්ඡාවේ දී මේ බව අනාවරණය විය.
රජයේ වෛද්‍ය නිලධාරීන්ගේ සංගමය වෙනුවෙන් වෛද්‍යවරුන් මුහුණුපාන ගැටලු කිහිපයක් සම්බන්ධයෙන් ශ්‍රී ලංකා පොලිසියේ අවධානය යොමු කරන ලද අතර, එහිදී විශේෂයෙන්ම, රජයේ වෛද්‍ය නිලධාරී සංගමය විසින් වෛද්‍යවරුන් වෙත නිකුත් කර ඇති නිල ලාංඡනය සහිත ස්ටිකරය වාහනවල තබාගනිමින් එය අවභාවිත කර ඇතැම් නීතිවිරෝධී ක්‍රියාකාරකම්වල නිරත වන පුද්ගලයන් සම්බන්ධයෙන් ක්‍රියාමාර්ග ගැනීම, මහාමාර්ගයේ ව්‍යාජ සහතික ඉදිරිපත් කරමින් වෛද්‍යවරුන් ලෙස පෙනී සිටින පුද්ගලයින් සම්බන්ධයෙන් නෛතික ක්‍රියාමාර්ග ගැනීම, නිසි ප්‍රමිතියකින් තොර ඖෂධ, සුවඳ විලවුන් ඇතුළු විවිධ රූපලාවණ්‍ය ආලේපන වර්ග ආදිය වෙ‍ෙළඳාම් කිරීම සම්බන්ධයෙන් නෛතික ක්‍රියාමාර්ග ගැනීම, දිවයිනේ විවිධ පළාත්වල පිහිටි රෝහල්වල වෛද්‍යවරුන්ට පහරදීමේ සිද්ධීන් ඇතුළු විමර්ශන කිහිපයක් සම්බන්ධයෙන් ඉදිරි ක්‍රියාමාර්ග ගැනීම සහ මහාමාර්ගයේ දෛනිකව සිදුවන රිය අනතුරු අවම කර ගැනීම සම්බන්ධයෙන් රජයේ වෛද්‍ය නිලධාරීන්ගේ සංගමය හා ඒකාබද්ධ වැඩපිළිවෙළක් ක්‍රියාත්මක කිරීම ඇතුළු කරණු කිහිපයක් සම්බන්ධයෙන් සාකච්ඡා කර ඇත.
