ශ්‍රී ලාංකික කාන්තා සංක්‍රමණික සේවිකාවන් දැනුවත් කිරීමේ වැඩසටහනක් සිංගප්පූරුවේ ශ්‍රී ලංකා මහකොමසාරිස් කාර්යාලය මඟින් සංවිධාන කර තිබේ. සිංගප්පූරුවේ කරිටාස් ගම්මානයේ දී මෙය සංවිධාන කර තිබෙන අතර, ශ්‍රී ලාංකික කාන්තා සංක්‍රමණික සේවිකාවන් යම් යම් ක්ෂේත්‍ර පිළිබඳව දැනුවත් කරමින් ඔවුන් සවිබල ගැන්වීම, ශ්‍රමිකයන් සහ මහකොමසාරිස් කාර්යාලය අතර ශක්තිමත් සබඳතාවක් ඇතිකර ගැනීම මෙමඟින් අරමුණු කරන බව විදේශ කටයුතු අමාත්‍යාංශය පවසයි.
මේ අවස්ථාවට ශ්‍රී ලාංකික සංක්‍රමණික කාන්තාවන් 200ක් පමණ සහභාගි වී තිබෙන අතර, සිංගප්පූරුවේ ශ්‍රී ලංකා ව්‍යාපාරික සංගමයේ සහයෝගයෙන් මේ වැඩසටහන සංවිධාන කර තිබේ. 2023 වසරේ සැප්තැම්බර් මාසයේ සිට මහකොමසාරිස් කාර්යාලය විසින් සංවිධාන කරන ලද දෙවන උත්සවය මෙයයි. සිංගප්පූරුවේ ශ්‍රී ලංකා මහ කොමසාරිස් සෙනරත් දිසානායක මහතා ශ්‍රී ලංකාවේ ආර්ථිකයට සංක්‍රමණික ශ්‍රම බළකාය දුන් සුවිශේෂී දායකත්වය අගය කර තිබෙන අතර සංක්‍රමණික ශ්‍රම බළකාය සවිබල ගැන්වීමේ වැදගත්කම සහ ඔවුන්ගේ ප්‍රමිතීන් හා කාර්යක්ෂමතාව පවත්වා ගැනීමේ වැදගත්කම ද අවධාරණය කර තිබේ.
සිංගප්පූරුවේ සිටින ශ්‍රී ලාංකික සංක්‍රමණික ශ්‍රමිකයන්ගේ සුබසාධනය සහ ආරක්ෂාව වෙනුවෙන් මහකොමසාරිස් කාර්යාලයේ කම්කරු අංශය කැපවී සිටින බවත් සහය සඳහා පැය විසිහතර පුරාම සම්බන්ධ කර ගත හැකි බවත් මහ කොමසාරිස් දිසානායක මහතා පවසා ඇත. මේ අතර ශ්‍රී ලංකා ව්‍යාපාරික සංගමයේ සභාපති ලක්ෂාන්ති ප්‍රනාන්දු මහත්මිය විදේශගත ශ්‍රමිකයන් දැනුවත් කිරීමේ වැදගත්කම පෙන්වා දී තිබෙන අතර, මෙවර උත්සවයේ සාර්ථකත්වය පිළිබඳව සතුට පළ කර තිබේ.
සිංගප්පූරුවේ ශ්‍රී ලංකා මහකොමසාරිස් කාර්යාලයේ උපදේශක සහ කම්කරු අංශයේ ප්‍රධානී නිපුන තිබ්බටුමුණුව මහතා උත්සවයේ වැදගත්කම අවධාරණය කර තිබෙන අතර, උත්සවයේ මූලික අරමුණ සමඟ සමපාත වෙමින් තම ජීවිතය පිළිබඳ වටිනා අවබෝධයක් ලබා ගන්නා ලෙස සහභාගිවන්නන්ගෙන් ඉල්ලා ඇත. සිංගප්පූරුවේ මිනිස්බල අමාත්‍යාංශය, සිංගප්පූරු පොලිස් බළකාය සහ සමාජ ආධාර සහ පුහුණුව සඳහා වන විදේශ ගෘහ සේවක සංගමයේ සම්පත් දායකයන් විසින් ඔවුන්ගේ විශේෂිත ක්ෂේත්‍ර පිළිබඳව කරුණු ඉදිරිපත් කරමින් සහභාගි වන්නන් දැනුවත් කර තිබේ.
