සුළු වැසි තත්ත්වයකදී පවා පිඟාඔය පිටාර ගැලීම සිදුවන අතර ඒ හේතුවෙන් අකුරණ නගරය අවට පදිංචිකරුවන්ට මෙන්ම ව්‍යාපාරිකයන්ට වසර ගණනාවක සිට ගැටලු රැසකට මුහුණදීමට සිදුව තිබේ. මේ ගැටලුවලට විසඳුම් සෙවීමේ අරමුණින් ගංවතුර තත්ත්වය පාලනය කිරීමට නව වැඩසටහනක් ක්‍රියාත්මක කිරීමට සැලසුම් සකස් කරමින් පවතී. මේ සම්බන්ධව සාකච්ඡාවක් මධ්‍යම පළාත් ආණ්ඩුකාර ලලිත් යූ.ගමගේ මහතාගේ ප්‍රධානත්වයෙන් ඉකුත් 29 වැනිදා ආණ්ඩුකාර කාර්යාලයේදී පැවත්විණි. මෙහිදී අකුරණ නගර සංවර්ධන සැලැස්මට අනුව දිගුකාලීන, මධ්‍යකාලීන හා කෙටිකාලීන ක්‍රමවේදයකට අනුව ස්ථිර විසඳුමක් ලබා දීම වෙනුවෙන් කරුණු රැසක් සාකච්ඡා කරනු ලැබීය. ශ්‍රී ලංකා ඉඩම් ගොඩකිරීමේ සංස්ථාව, ශ්‍රී ලංකා ඉඩම් සංවර්ධනය කිරීමේ සංස්ථාව හා ආයතන රැසක් මඟින් මෙම ගැටලුව නිරාකරණය කර ගැනීම පිළිබඳව සිදු කරන ලද පරීක්ෂණ හා අධ්‍යයන යෝජනාවල තොරතුරු, යෝජිත ජල විද්‍යා අධ්‍යයනය සහ වැසි ජල අපවහන සැලැස්ම ඇතුළත් ගංවතුර තත්ත්වය අවම කිරීමේ යෝජනාවල කරුණු ද මෙහිදී ඉදිරිපත් කරනු ලැබීය. ඒ අනුව ජල ගැලීම් පාලනය කිරීමට කානු පද්ධතිය වැඩිදියුණු කිරීම, ඔයේ තැන්පත්ව ඇති රොන්මඩ හා වැලි ඉවත් කිරීමට කටයුතු යෙදීම, ජලය බැස යෑමේ වේගය වැඩි කිරීමට පියවර ගැනීම, අක්‍රමවත් ඉදිකිරීම් ඇළ මාර්ගයෙන් ඉවත් කිරීම, නව තාක්ෂණික ක්‍රමවේද යොදා ගනිමින් නැවත පිඟාඔය පිටාර ගැලීම වළක්වාලීම වෙනුවෙන් ගත යුතු ඉදිරි පියවර ගැනද මෙහිදී සාකච්ඡාවට බඳුන් විය. රාජ්‍ය අංශය, පෞද්ගලික අංශය ඒකාබද්ධව මෙන්ම පිඟාඔය සම්බන්ධ වන හාරිස්පත්තුව, අකුරණ, පූජාපිටිය හා පාතදුම්බර ප්‍රාදේශීය ලේකම් කොට්ඨාස හතර ඒකාබද්ධව සහයෝගයෙන් වැඩසටහනක් ක්‍රියාත්මක කිරීමට ද මෙහිදී යෝජනා විය.
මධ්‍යම පළාත් ප්‍රධාන ලේකම් අජිත් ප්‍රේමසිංහ, මහනුවර දිස්ත්‍රික් ලේකම් චන්දන තෙන්නකෝන්, ආණ්ඩුකාර ලේකම් මංජුලා මඩහපොළ මහත්ම මහත්මීන් ඇතුළු පිරිසක් මේ අවස්ථාවට සහභාගි වූහ.
