නීති විරෝධී පිරමිඩාකාර ගනුදෙනු කළැයි කියන සිද්ධියට අදාළ ‘ඔන්මැක්ස් ඩීටී’ පෞද්ගලික සමාගම ප්‍රවර්ධනය කරමින් තැන්පතුකරුවන්ගේ මුදල් භාර ගත් බව කියන හය දෙනකුගේ විදෙස් ගමන් තහනම් කරමින් කොළඹ ප්‍රධාන මහේස්ත්‍රාත් තිළිණ ගමගේ මහතා ඊයේ (2) නියෝගයක් නිකුත් කළේය.
මෙලෙස විදෙස් ගමන් තහනම් කරනු ලැබුවේ වෙදෙගෙදර දුම්රිය පොළ පාර සීදුව පදිංචි වෙනුකා හරින්දි ද සිල්වා, කාවන්තිස්සපුර තිස්සමහාරාමය පදිංචි රත්නවීර පටබැඳිගේ දිනුෂ් චතුරංග, කුඩාගම්මාන 3 ලුණුගම්වෙහෙර පදිංචි කට්ටඩිගේ දිනුෂ් චතුරංග, සිසිල සෙවණ රන්න නැඟෙනහිර රන්න පදිංචි ජුල්ගොඩ මානගේ මයුර දිල්ෂාන්, අංක 144 සර්මා අඟුණකොළපැලැස්ස පදිංචි දොරේ මරේ බඩල්ගේ සදුන් ඉන්දික සහ අංක 430/ඒ තිලකරත්න මාවත රත්ගම පදිංචි ජුලියන් නුවන් සමීර යන අවගේය.
මේ සිද්ධිය සම්බන්ධයෙන් මෙතෙක් කළ විමර්ශනවලදී හෙළි කරගත් කරුණු අනුව මේ පුද්ගලයන් ඔන්මැක්ස් ටීඩී නීති විරෝධී පිරමිඩාකාර ගනුදෙනු ප්‍රවර්ධනය කර තැන්පත්කරුවන්ගේ තැන්පතු භාර ගෙන ඇති බවට කරුණු අනාවරණය වී ඇතැයි අපරාධ පරීක්ෂණ දෙපාර්තමේන්තුව අධිකරණය හමුවේ කරුණු ඉදිරිපත් කළේය. ඒ අනුව මොවුන් හය දෙනා මේ විමර්ශනයට සහාය නොදී මෙරටින් පලා යෑමේ ප්‍රවණතාවක් ද මතු වීමට ඉඩප්‍රස්තා ඇති බැවින් අපරාධ නඩු විධාන සංග්‍රහ පනතේ 124 වගන්තිය ප්‍රකාරව ඔවුන්ගේ විදෙස් ගමන් තහනම් කිරීමේ නියෝගයක් නිකුත් කරන්නැයි අපරාධ පරීක්ෂණ දෙපාර්තමේන්තුව අධිකරණයෙන් ඉල්ලීය. ඔන්මැක්ස් ඩීටී පෞද්ගලික සමාගමේ සැකකාර අධ්‍යක්ෂවරුන් සන්තකයේ තිබූ රුපියල් කෝටි 100කට අධික වටිනාකමකින් යුත් ඉඩම් 31ක් සම්බන්ධයෙන් තක්සේරු වාර්තා කැඳවීම සඳහා තක්සේරු දෙපාර්තමේන්තුවටද ඊයේ (3) අධිකරණයෙන් නියෝග 9ක් නිකුත් විණි. අපරාධ පරීක්ෂණ දෙපාර්තමේන්තුව පෙරේදා (2) නඩුව යළි කැදැවූ අවස්ථාවේදී අධිකරණයෙන් කළ ඉල්ලීමකට අනුව මේ නියෝගය නිකුත් විය.
ඒ අනුව නියෝජ්‍ය ප්‍රධාන තක්සේරුකරු (ගාලුපාර කොළඹ 03), ප්‍රධාන තක්සේරුකරු (මරදාන පාර කොළඹ 10), ප්‍රධාන තක්සේරුකරු (බටහිර උතුර පළාත් කාර්යාලය ගම්පහ), ජ්‍යෙෂ්ඨ තක්සේරුකරු (දකුණු පළාත් කාර්යාලය මාතර), ප්‍රධාන තක්සේරුකරු (බටහිර මධ්‍යම කාර්යාලය දෙහිවල පාර මහරගම), ප්‍රධාන තක්සේරුකරු (ඌව පළාත් කාර්යාලය කච්චේරි සංකීර්ණය බදුල්ල), ප්‍රධාන තක්සේරුකරු (යටිනුවර වීදිය මහනුවර), ප්‍රධාන තක්සේරුකරු (මිහිඳු මාවත කුරුණෑගල), ප්‍රධාන තක්සේරුකරු (දකුණු පළාත් 2 කාර්යාලය තංගල්ල පාර අම්බලන්තොට) යන අය වෙත මේ නියෝග නිකුත් විණි.
