2024, අප්‍රේල් – ශ්රී ලංකාවේ පුද්ගලික අංශයේ ප්‍රමුඛතම සෞඛ්‍ය සේවා සපයන්නා වන නවලෝක රෝහල් සමූහය පසුගියදා කොළඹ සිනමන් ග්‍රෑන්ඩ් හෝටලයේදී පැවති 2024 Best Management Practices Company Awards හිදී කුසලතා සම්මානයෙන් පිදුම් ලැබීමට සමත් විය.
ශ්රී ලංකා වරලත් වෘත්තීය කළමනාකරුවන්ගේ ආයතනය (CPM Sri Lanka) විසින් වාර්ෂිකව සංවිධාන කරනු ලබන මෙම Best Management Practices Company Awards සම්මාන උලෙළ තුළින් රාජ්‍ය අංශයේ මෙන්ම පෞද්ගලික අංශයේ ආයතනයන්හි වර්ධනය හා සාර්ථකත්වය පිළිගැනීමට ලක් කරනු ලබයි. 2023 වසර පුරා ඒ ඒ සමාගම් විසින් ප්‍රදර්ශනය කරන ලද ආදර්ශවත් නායකත්වය, ප්‍රතිඵත්ති උපායමාර්ග, පුද්ගල කළමනාකරණ, සබඳතා, සම්පත්, ක්‍රියාවලි සහ කාර්යසාධනය වැනි සාධකයන් මෙම සම්මානයන් තුළින් ඇගයීමට ලක් කරයි.
මෙම පිළිගැනීම සම්බන්ධයෙන් අදහස් දක්වමින් නවලෝක රෝහල් සමූහයේ සභාපති ආචාර්ය ජයන්ත ධර්මදාස මහතා සඳහන් කර සිටියේ “සෞඛ්‍ය ක්ෂේත්‍රයේ ඉහළම කළමනාකරණ භාවිතයන් අනුගමනය කිරීම වෙනුවෙන් නවලෝක රෝහලේ කැපවීම මෙම සම්මානය තුළින් යළිත් තහවුරු වනවා. ඒ වගේම අපගේ වෘත්තීයභාවය හා කාර්යක්ෂම මෙහෙයුම් සඳහා ඉහළම ප්‍රමිතීන්ට අනුව කටයුතු කරමින් රෝගීන් වෙනුවෙන් උපරිම සත්කාරයක් ලබා දීම සඳහා වන අපගේ කැපවීමද මෙම සම්මානය තුළින් මනාව පිළිබිඹු වනවා” යනුවෙනි.
නවලෝක රෝහල වැනි ආයතනයන් වෙත සිය කළමනාකාරීත්ව භාවිතයන් ඇගයීමට ලක් කිරීම හා වැඩිදියුණු කිරීම වෙනුවෙන් Best Management Practices Company Awards සුවිසල් පිටිවහලක් වන අතර මෙම සම්මානය දිනා ගැනීම තුළින් දේශීය හා ජාත්‍යන්තර ව්‍යාපාරයන්හි සිය විශිෂ්ටත්වය සනිටුහන් කිරීමට ද නවලෝක රෝහල් සමූහය සමත් විය.
