ජෛව විවිධත්ව දිනය යෙදී ඇති මේ මස 22 වැනි දිනට සමගාමීව, රැකව අභය භූමියේ කැස්බෑ සංරක්ෂණය ආශ්‍රිත සංචාරක කටයුතු ආරම්භ කිරීමට වනජීවී සංරක්ෂණ දෙපාර්තමේන්තුව සැලසුම් කර ඇත.
රැකව අභය භූමිය කේන්ද්‍ර කරගනිමින් කපුහේන්වල පිහිටි වනජීවී කාර්යාලයේ මූලිකත්වයෙන් කැස්බෑ සංරක්ෂණ වැඩසටහනක් ආරම්භ කර තිබේ. මෙම වෙරළ තීරයට පැමිණෙන කැස්බෑවුන් දමනු ලබන බිත්තර අනාරක්ෂිත ලෙස පවතින අවස්ථාවලදී එම බිත්තර බිජුලන ස්ථානයෙන් පරිබාහිරව සංරක්ෂණය සිදුකර පැටවුන් නිදහස් කිරීම සිදු කෙරේ.
බිත්තර දැමීමට ශ්‍රී ලංකාවට එන කැස්බෑ විශේෂ පහ අතරින් රැකවදී හතර දෙනෙක්‌ම ප්‍රධාන වශයෙන් දැකගත හැකි වේ. ඒ කොළ කැස්‌බෑවා (Chelonia mydas), බටු කැස්‌බෑවා (Olive Ridley turtle), දාර කැස්‌බෑවා (Dermochelys coriacea), ඔළුගෙඩි කැස්‌බෑවා Logger-head Turtle (Caretta caretta) යන විශේෂයි. දාර කැස්‌බෑවා මුහුදු කැස්බෑවන් අතර විශාලතම කැස්‌බෑවා වේ. කැස්බෑවන් සාමාන්‍යයෙන් තමන් උපන් වෙරළටම බිත්තර දැමීමට පැමිණීම සිරිතකි.
රැකව වෙරළ තීරය ජාත්‍යන්තර වශයෙන් ප්‍රසිද්ධියට පත් වෙරළ තීරයක් වන අතර කැස්බෑ නිජබිමක් වශයෙන් ද ප්‍රසිද්ධ වී ඇත. ලංකාවේ කැස්‌බෑවන්ගේ පාරාදීසය විදිහට සලකනු ලැබේ. ලංකාවේ ප්‍රථම කැස්බෑ අභය භූමිය වන්නේත් රැකව අභය භූමිය වන අතර මේ අභය භූමියේ විශාලත්වය අක්‌කර 677ක් වේ. කැස්බෑවන් සංරක්ෂණය කිරීම ආශ්‍රිතව සංචාරක කර්මාන්තය ඇති කීරීම සඳහා සුදුසු වටපිටාවක් පවතින ප්‍රදේශයක් ලෙස මේ වෙරළ තීරය හඳුනාගෙන ඇත. ඒ අනුව සංචාරකයන් සඳහා සංරක්ෂණය කරන ලද කැස්බෑ පැටවුන් මුහුදට මුදා හැරීම, කැස්බෑවන් බිජුලන අවස්ථා සජීවීව නිරීක්ෂණය කිරීම, රාත්‍රී වෙරළ තීරයේ ගමන් කිරීමට අවස්ථාව සලසා දීම හා කඳවුරු බිම් ඇති කිරීම සඳහා ඉදිරියේ දී අවස්ථාව ලබාදීමට සැලසුම් කර ඇත.
