හෙල්මට් අලුත්වැඩියා කිරීමෙන් සහ අලුත් හෙල්මට් ඇතුළු යතුරුපැදි සඳහා අවශ්‍ය ආරක්ෂිත උපකරණ අලෙවි කිරීමෙන් ජීවිතය ජයගත් දිරිය කාන්තාවක් ගාල්ල ලබුදූවේ දී අපට හමුවිය. ඇය අක්මීමන තලගහ පදිංචි ආර්.ඒ. ඉන්ද්‍රානිය(39). ඇය දරුවන් තිදෙනකුගේ මවකි.
තම ව්‍යාපාරය පිළිබඳව ඇය තම කටහඬ මෙසේ අවදි කළාය. මතුගම අපේ මාමා කෙනෙක් ළඟ මම හෙල්මට් නිපදවීමේ කර්මාන්තයක නිරත වුණා. මේ කර්මාන්තය පිළිබඳව අත්දැකීම් මම ඒ තුළින් ලබා ගත්තා. පසුව මම ගාල්ලට පැමිණ 2019 වර්ෂයේ හෙල්මට් අලුත්වැඩියාව පටන් ගත්තා. දැන් මේ කර්මාන්තය පටන් ගෙන වසර හතරක් පමණ වෙනවා. මේ වන විට කර්මාන්තය කරගෙන යෑමට මම කුඩා ප්‍රමාණයේ වෑන් රථයක් ද මිල දී ගත්තා. දැන් මගේ සියලු ව්‍යාපාර කටයුතු කෙරෙන්නේ එම කුඩා ලොරියේය. පරණ හෙල්මට් අලුත්වැඩියා කිරීම අලුත් හෙල්මට් විකිණීම සහ යතුරුපැදිවලට අවශ්‍ය ජැකට් ඇතුළු ආරක්ෂිත උපකරණ මේ ස්ථානයෙන් ගනුදෙනුකරුවන්ට ලබා ගත හැකියි. ඉතා සහනදායී මුදලකට කාර්යක්ෂම සේවාවක් මේ ස්ථානයේ දී ගනුදෙනුකාර භවතුන්ට ලබා ගත හැකියි.
මට දරුවන් තිදෙනකු සිටිනවා. වැඩිමල් පුතා විශ්වවිද්‍යාලයක අධ්‍යාපනය ලබනවා. දෙවැනි පුතා උසස් පෙළ විභාගයට සූදානම් වෙනවා. තුන්වන පුතා 10 ශ්‍රේණියේ ඉගෙන ගන්නවා. මගේ මහත්තයා ක්‍රීඩා නිලධාරියකු ලෙස සේවය කරනවා. මගේ ව්‍යාපාරය දියුණු කර ගැනීමට මා පසුපස සෙවණැල්ලක් මෙන් සිටින්නේ මගේ මහත්තයා කීවොත් එය නිවැරදියි. ගෙදර දොර කටයුතුවලට මෙන්ම මේ ව්‍යාපාරයටත් ඔහුගෙන් ලැබෙන පිටිවහල අතිවිශිෂ්ටයි.
සෑමදාම අපේ කුඩා ලොරිය ලබුදූවට පදවාගෙන පැමිණ මේ ස්ථානයේ ගාල් කරන්නේ මගේ සැමියා. ඉන්පසු ඔහු රැකියාවට යනවා.
මගෙන් මේ සේවාව ලබා ගැනීමට බොහෝ පිරිසක් එනවා. ඒ සෑම දෙනාම සතුටින් රස්තියාදු නොකර ආ කටයුත්ත කරදීම මගේ වගකීමයි. මේ ව්‍යාපාරයෙන් මට දෛනිකව සැලකිය යුතු ආදායමක් ලැබෙනවා. අනුන්ට අත නොපා ජීවත්වීමට මේ මඟින් මට හැකියි. පිරිමින්ට පමණක් සීමා වී තිබුණු මේ ව්‍යාපාරය කාන්තාවන් වන අපටත් කිරීමට හැකිවීම ගැන මම නිහතමානීව ආඩම්බරයි.
ලංකාවේ අනෙක් කාන්තාවන්ටත් තම ජීවිතය සාර්ථක කරගැනීමට ඉන්ද්‍රානී ආදර්ශයක්.
