සකුරා මල් පිපෙන ජපානය, ශ්‍රී ලංකාවේ බොහෝ දෙනකුගේ සිහින රාජ්‍යය බවට පත්වී ඇත. ඒ අනුව ජපානයේ ඉහළ වැටුපක් ලැබීමට අවකාශය සලසා දෙන SSW ( Specified Skilled Worker) Visa ව්‍යාපෘතිය මඟින් ජපන් සිහින සැබෑ කර ගැනීමට වෙර දරන ඔබට කදිම අවස්ථාවක් උදාවී ඇත. ඒ සඳහා ඔබ කළ යුත්තේ මේ මස 20 සහ 21 දෙදින මන්නාරම නගර සභා ක්‍රීඩාංගණයේ පැවැත්වෙන “ජයගමු ශ්‍රී ලංකා” වැඩසටහනට පැමිණීම බව විදේශ රැකියා සහ කම්කරු ඇමැති මනූෂ නානායක්කාර මහතා පවසයි.
නීත්‍යනුකූල ක්‍රමවේද කිහිපයක් හරහා ජපන් සිහිනය සැබෑ කර ගැනීමට අවස්ථාව උදාකර දී ඇති අතර, එහිදී ශ්‍රී ලාංකිකයන්ට සුවිශේෂ වීසා පදනමක් යටතේ ජපානයේ රැකියා අවස්ථාවන්ට ප්‍රවේශ වීමට අවස්ථාව දී තිබේ. SSW (Specified Skilled Worker) Visa ව්‍යාපෘතිය මඟින් දැන් ඔබටත් ජපානයේ රැකියා සඳහා ඉල්ලුම් කිරීමේ හැකියාව පවතී.
ශ්‍රී ලංකාව හා ජපානය අතර සිදු කරන ඒකාබද්ධ පරීක්ෂණයක් මඟින් කුසලතා සහ ජපන් භාෂා ප්‍රවීණතාව තහවුරු කෙරේ. එම පරීක්ෂණය සමත් වන්නන් සඳහා වසර පහක (5) කාලයක් ජපානයේ රැකියාවේ නිරත වීමේ අවස්ථාව උදාකර දී ඇත. SSW වැඩසටහන යටතේ ජපානය විසින් රැකියා ක්ෂේත්‍ර 14ක් ප්‍රකාශයට පත් කර ඇති අතර, ඒ අතරින් දැනට ක්ෂේත්‍ර 6ක් සඳහා ශ්‍රී ලංකාවට අනුමැතිය ලබා දී ඇත.
හෙද සාත්තු සේවාව (Nursing Caregiving ), ආහාර සේවා කර්මාන්තය (Food Service industry), කෘෂිකර්මාන්තය (Agriculture), ඉදිකිරීම් අංශය (Construction), ගොඩනැඟිලි පිරිසුදු කිරීම (Building Cleaning), ගුවන් ක්ෂේත්‍රය (Aviation Firld) පවතින අතර මේ අතරින් දැනට හෙද සාත්තු සේවාව, ආහාර සේවා කර්මාන්තය, කෘෂිකර්මාන්තය හා ගුවන් ක්ෂේත්‍ර සඳහා කුසලතා පරීක්ෂණ දැනට ශ්‍රී ලංකාවේ පවත්වයි. තවද රාජ්‍ය අංශය මඟින් සම්මුඛ පරීක්ෂණ පවත්වා මේ අංශ සඳහා ජපානය වෙත පිටත් කර යැවීම සිදු කරයි. ජපානයේ රැකියාවකට යොමුවීම සඳහා ප්‍රධාන වශයෙන් අවශ්‍ය වන මූලික සුදුසුකම් වන්නේ වයස අවුරුදු 18ත් 45ත් අතර ශ්‍රී ලාංකික පුරවැසියකු වීමයි.
ජපන් භාෂා ප්‍රවීණතාවය ලබා තිබීම. මේ සඳහා ජපන් භාෂා ප්‍රවීණතාවය තහවුරු කිරීම සඳහා ජපන් රජයෙන් පවත්වනු ලබන විභාගය JFT (Japanese Foundation Test ) හෝ JLPT N 4 ( Japanese Language Proficiency Test) ජපන් භාෂා ප්‍රවීණතා මට්ටම සමත් වී තිබිය යුතුය.
මීට අමතරව තෝරාගත් රැකියා ක්ෂේත්‍රයට අදාළව පවත්වනු ලබන කුසලතා පරීක්ෂණය සමත් වී තිබිය යුතුය. මෙහිදී හෙද සාත්තු සේවය සඳහා කුසලතා පරීක්ෂණ දෙකක් සමත් විය යුතුව ඇත. හෙද සාත්තු සේවය පිළිබඳ තාක්ෂණික දැනුම සඳහා කුසලතා පරීක්ෂණය Skill Evaluation Test ඉංග්‍රීසි භාෂාවෙන් හෝ ජපන් භාෂාවෙන් පෙනී සිටිය හැකිය. මීට අමතරව හෙද තාක්ෂණය පිළිබඳව ජපන් භාෂා දැනුම පරීක්ෂා කිරීමේ පරීක්ෂණය Japanese Language Evaluation Test සඳහාද පෙනී සිටිය යුතුය. ඉහත මූලික පරීක්ෂණයන්ට අමතරව පහත සඳහන් සුදුසුකම් ද සපුරා තිබිය යුතුය. හොඳ සෞඛ්‍ය තත්ත්වයකින් යුක්ත වීම, ශරීරයේ ටැටූ (Tattoo) නොමැති වීම.
