එන්එස්එල් සිව්දින ක්‍රිකට් තරගාවලියේදී වාර්තාගත ලකුණු පුවරුවක් නිර්මාණය කිරීමට ගාල්ල කණ්ඩායම සමත් විය.
කොළඹ ආර්. ප්‍රේමදාස ක්‍රීඩාංගණයේදී යාපනය කණ්ඩායමට එරෙහිව පැවැත්වෙන මේ තරගය දෙවැනි දිනයට නතර කරන විට ගාල්ල කණ්ඩායම පළමු ඉනිම සඳහා කඩුලු 9ක් දැවී ලකුණු 711ක් රැස් කර තිබිණි. මෙය වසර 16කට පසුව ශ්‍රී ලංකා කණ්ඩායමක් පළමු පෙළ තරගයක වාර්තා කළ දෙවැනි වැඩිම ලකුණු සංඛ්‍යාව ලෙස මෙය සටහන් වෙයි. මින් පෙර දකුණු අප්‍රිකානු ‘ඒ’ පිලට එරෙහිව 2008 වසරේ පොච්ෆ්ස්ට්රූම්හිදී පැවති නිල නොවන සිව්දින ටෙස්ට් තරගයේදී ශ්‍රී ලංකා ‘ඒ’ පිල කඩුලු 5ක් දැවී රැස් කළ ලකුණු 749 ඉහළම පළමු පෙළ ඉනිම ලෙස සටහන් වෙයි.
මේ තරගයේ ගාල්ල පළමු ඉනිමේදී සිය පළමු පෙළ ක්‍රිකට් තරග දිවියේ හොඳම ඉනිම ක්‍රීඩා කිරීමට 24 හැවිරිදි පසිඳු සූරියබණ්ඩාර ඊයේ සමත් විය. ඔහු ලකුණු 242ක් රැස් කළ අතර, පන්දු 346කින් ගොඩනැඟූණු ඔහුගේ ඉනිම හතරේ පහර 17කින් වර්ණවත් විය.
කොළඹ රාජකීය විදුහලෙන් ක්‍රිකට් පිටියට පිවිසි පසිඳු ඊයේ රැස් කළේ දෙවැනි පළමු පෙළ ද්විත්ව ශතකය වන අතර, ඉන් පෙර පසුගිය වසරේ පැවති එන්එස්එල් සිව්දින තරගාවලියේ අවසන් පූර්ව තරගයකදී මහනුවර පිලට එරෙහිව ගාල්ල පිල නියෝජනය කරමින් ඔහු ලකුණු 214 රැස් කර තිබිණි. ඒ පන්දු 341කදී හතරේ 18ක් සමඟිනි.
පසිඳුට අනගි සහායක් දුන් ලක්ෂාන් එදිරිසිංහ ලකුණු 122ක් වාර්තා කළ අතර, දෙදෙනා එක්ව සිව්වැනි කඩුල්ලට ලකුණු 250ක සබඳතාවක් පිහිටුවූහ. අනතුරුව පසිඳු සමඟ එක්ව 5 වැනි කඩුල්ලට ලකුණු 135ක් එක් කිරීමට විෂාද් රන්දික (66) සමත් විය.
මේ තරගයේදී යාපනය පන්දු යවන්නන් අතිරේක ලකුණු 62ක් ලබාදුන් අතර, එය පළමු පෙළ තරගයකදී කණ්ඩායමක් ලබාදුන් තෙවැනි ඉහළම අතිරේක ලකුණු සංඛ්‍යාවයි. 1998/99 පළමු පෙළ තරගාවලියේදී පාණදුර කණ්ඩායම විසින් සීසීසී පිලට ලකුණු 69ක්, 1999/00 තරගාවලියේදී එස්එස්සි පිල විසින් ගාල්ල කණ්ඩායමට ලකුණු 64ක් ලබාදී තිබේ.
ගාලු පළමු ඉනිම – 711/9 (ඕවර 172) පසිඳු සූරියබණ්ඩාර 242, ලක්ෂාන් එදිරිසිංහ 122, විෂාද් රන්දික 66, ශෙහාන් ප්‍රනාන්දු 56, සංගීත් කුරේ 49, අතිරේක 62 (ජනිත් ලියනගේ 86/2, කල්හාර සේනාරත්න 145/2)
මහනුවර ලකුණු 225ක් ඉදිරියෙන්
මේ අතර දඹුල්ලේ පැවැත්වෙන තරගය දෙවැනි දිනයට නතර කරන විට දඹුලු පළමු ඉනිමට වඩා ලකුණු 225ක් ඉදිරියෙන් සිටීමට මහනුවර ක්‍රීඩකයෝ සමත්ව සිටියේ කඩුලු 6ක් ද අතැතිවය.
මේ තරගයේ පළමුව පන්දුවට පහරදුන් මහනුවර පිල පළමු ඉනිම වෙනුවෙන් රැස් කළ ලකුණු 276ට පිළිතුරු ලෙස දඹුලු ක්‍රීඩකයන්ට ලබාගත හැකි වූයේ ලකුණු 207ක් පමණි. ඒ අනුව ලකුණු 69ක් ඉදිරියෙන් දෙවැනි ඉනිම ඇරඹූ මහනුවර පිල ඊයේ තරගය නතර කරන විට කඩුලු 4ක් දැවී ලකුණු 156ක් රැස් කර තිබිණි.
සිතාර ගිම්හාන ලකුණු 58ක් රැස් කළ අතර, රවීන් යසස් ලකුණු 17ක් රැස් කරමින් නොදැවී කඩුල්ලේ රැඳී සිටියේය.
පළමු දිනය නිමාවන විට කඩුලු 3ක් දැවී ලකුණු 60ක් ලබා සිටි දඹුලු පිලට ඊයේ තවත් එක්කරගත හැකි වූයේ ලකුණු 147ක් පමණි. ලකුණු 42ක් රැස් කළ රිසිර වීරසූරිය ඉනිමේ වැඩිම ලකුණුලාභියා වූ අතර, පන්දු යැවීමේදී සිතුම් දිසානායක සහ නිම්සර අතරගල්ල කඩුලු 3 බැගින් දවා ගත්හ.
මහනුවර පළමු ඉනිම – 276 (ඕවර 72.4) අහන් වික්‍රමසිංහ 64, රොෂාන් ජයතිස්ස 50 (ලක්ෂාන් ගමගේ 19/3, මුර්වින් අබිනාෂ් 40/2, මොහොමඩ් ශිරාස් 49/2) සහ දෙවැනි ඉනිම – 156/4 (ඕවර 42.2) සිතාර ගම්හාන 58 (සොනාල් දිනූෂ 16/2)
දඹුල්ල පළමු ඉනිම – 207 (ඕවර 58.5) (සිතුම් දිසානායක 43/3, නිම්සර අතරගල්ල 53/3, රොෂාන් ජයතිස්ස 36/2)
