මොරටුව විශ්වවිද්‍යාලයේ සිසුවකු තාවකාලිකව නවාතැන් ගෙන සිටින කාමරේදී හදිසියේ රෝගාතුරව පිළියන්දල දිසා රෝහලට ඇතුළත් කිරීමෙන් අනතුරුවම මියගොස් ඇතැයි පිළියන්දල පොලිසිය කියයි.
මෙලෙස මියගොස් ඇත්තේ මොරටුව, මෝල්පේ, ජයමාවත ප්‍රදේශයේ තාවකාලිකව පදිංචිව සිටි හාලිඇළ, උණුගොල්ලවත්ත, අඟුරුමලේ කොටසේ පදිංචිව සිටි සතාසිවම් විනෝද් නමැති වාස්තු විද්‍යා පීඨයේ අවසන් වසරේ අධ්‍යාපනය ලැබූ සිසුවෙකි.
මියගිය සිසුවා තවත් සිසුන් හය දෙනකු සමඟ බෝඩිං කාමරයේ නවාතැන් ගෙන සිටින අතර මධ්‍යම රාත්‍රී 12.30ට පමණ තවත් මිතුරන් දෙදෙනකු සමඟ බෝඩිම ආසන්නයේ ආපණශාලාවකට ගොස් කිරි තේ පානය කර විනාඩි පහළොවකින් පමණ බෝඩිම කරා පැමිණ ඇති බව පොලිස් විමර්ශනවලදී අනාවරණය වී ඇත. මඳ වේලාවකදී සිසුවා ඔහුගේ ඇඳ මත ජංගම දුරකතනය ක්‍රියාත්මක කරමින් සිට ඇති අතර, එක්වරම ඔහුගේ අතක් වෙව්ලන අයුරු අනෙක් සිසුන් දෙදෙනා දැක තිබූ බව පොලිසිය කියයි. ඔවුන් එම අතට යකඩ කැබැල්ලක් දුන්නද ඒ රෝගී තත්ත්වය අඩු නොවීම හේතුවෙන් වහා ක්‍රියාත්මක වූ මිතුරන් ඔහුව පිළියන්දල දිසා රෝහලට රැගෙන විත් තිබූ අතර, ඒ වන විටත් සිසුවා මියගොස් තිබූ බව පොලිසිය කියයි.
කැස්බෑව ප්‍රාදේශීය ලේකම් කොට්ඨාසයේ ස්ථිර හදිසි මරණ පරීක්ෂක අජිත් විජේසිංහ මහතා පිළියන්දල රෝහලේ මෘත ශරීරාගාරය වෙත පැමිණ මළ සිරුර පරීක්ෂා කිරීමෙන් අනතුරුව මූලික විමර්ශන පවත්ව මරණ පරීක්ෂණය සඳහා මළ සිරුර කළුබෝවිල ශික්ෂණ රෝහල කරා රැගෙන යන ලෙස පිළියන්දල පොලිසියට නියෝග කළේය. පිළියන්දල පොලිසියේ ස්ථානාධිපති (ප්‍ර.පො.ප) දිනේෂ් අත්තරගම මහතාගේ උපදෙස් මත මොරටුමුල්ල පොලිසියේ (උ.පො.ප) සමරසිංහ (පො.සැ) 52351 කින්ස්ලි මහත්වරු පරීක්ෂණ පවත්වයි.
