ඉංගිරිය, බෝධිනාගල ප්‍රදේශයේ කුලී පදනම මත නවාතැන් සපයන ස්ථානයකට කාන්තාවක් සමඟ පැමිණි පුද්ගලයෙකු එම කාන්තාවගේ ගෙල කපා, එම පිහියෙන්ම තමාගේ ගෙල ද කපා සියදිවි හානි කර ගැනීමට තැත්කිරීමේ පුවතක් ඊයේ (18) වාර්තා විය.
සිද්ධියෙන් දෙදෙනාටම බරපතළ තුවාල සිදුව ඇති අතර, ඔවුන් දෙදෙනා 1990 ගිලන් රථ සේවය මඟින් මේ වනවිට හොරණ රෝහල වෙත ඇතුළත් කර ඇත.
සිද්ධියට මුහුණ දුන් කාන්තාව 43 හැවිරිදි වියේ පසුවන ඉංගිරියට නුදුරු පෝරුවදණ්ඩ, පනංගලවත්ත ප්‍රදේශයේ පදිංචිකාරියක් වන අතර, 48 හැවිරිදි 
පිරිමි පුද්ගලයා පිළියන්දල ප්‍රදේශයේ පදිංචිකරුවෙකි.
අනියම් ඇසුරක් මෙම සිද්ධියට මුල්ව ඇති බව මෙතෙක් සිදුකළ පරීක්ෂණ වලදී අනාවරණය වී ඇති අතර, ඊයේ (18) උදෑසන 10ට පමණ අදාළ කාමර කුලියට ලබාදෙන ස්ථානයට පළමුව පිරිමි පුද්ගලයා පැමිණ ඇති බවත්, ඔහු කාමරයක් ලබාගෙන සුළු වේලාවකින් පසු කාන්තාව දෙවනුව එම ස්ථානයට පැමිණ ඇති බවත් ලද තොරතුරු මත පොලිසිය පවසා සිටී.
පැයක පමණ කාලයක් ගතවද්දී එම කාමරය දෙසින් කාන්තාවකගේ කෑගැසීම් ශබ්දයක් ඇසුණු බවත්, නවාතැන්පොළේ සේවකයින් එම කාමරයේ දොරට ගැසූමුත් එය විවෘත නොවූ තැන ඔවුන් එහි කළමනාකාරවරයා හට සිද්ධිය දැනුම්දීමට ගොස් ඇති බවත්, ඒ මොහොතේම වහා කාමරයේ දොර විවර කළ පිරිමි පුද්ගලයා ඉන් පිටතට පැන තමා පැමිණි යතුරුපැදියේ නැඟී ඉංගිරිය – හොරණ ප්‍රධාන මාර්ගය ඔස්සේ හොරණ දෙසට වේගයෙන් ගමන් කර ඇති බවත් හෙළිව තිබේ.
පසුව බවුන්ඩර් පෙදෙස නම් ප්‍රදේශයේ පිහිටි නාන තොටුපළක් වෙත පැමිණ ඇති මෙම පුද්ගලයා, පැමිණි යතුරුපැදිය එම ස්ථානයේ අතහැර දමා පිහියකින් සිය ගෙලද කපාගෙන සියදිවි හානි කර ගැනීමට උත්සාහ කර ඇත.
විවෘත වූ කාමරයට ඇතුළු වූ නවාතැන්පළෙහි සේවකයින් ඇතුළු කාර්ය මණ්ඩලයට ගෙලට, උදරයට ඇතුළුව ශරීරයේ විවිධ ස්ථානවල බරපතළ කැපුම් තුවාල සහිතව අදාළ කාන්තාව කාමරයේ වැටී සිටිනු දක්නට ලැබී ඇති අතර, පසුව එම කාන්තාවත් ගෙලෙහි කැපුම් තුවාල සහිතව නාන තොටුපළ අසල වැටී සිටි පිරිමි පුද්ගලයාත් වහා රෝහල් ගත කිරීමට කටයුතු කර තිබේ. අනියම් ඇසුරක් මත සිදුවූ ආරවුලක් මෙම සිද්ධියට හේතුවන්නට ඇති බවට මේ වනවිට සැකකරන අතර, ඉංගිරිය පොලිස් ස්ථානාධිපති ප්‍රධාන පොලිස් පරීක්ෂක වසන්ත චන්ද්‍රලාල් මහතාගේ මෙහෙයවීමෙන් වැඩිදුර පරීක්ෂණ ක්‍රියාත්මක වේ.
