මහා සංඝරත්නය ඇතුළු රැස්ව සිටි පිරිස
ජනාධිපතිවරුන් හතර දෙනකු යටතේ නිම කිරීමට නොහැකි වූ සාපලත් යුද්ධය සියලු අභියෝග සහ බලපෑම් හමුවේ නිම කරන්නට ශ්‍රේෂ්ඨ ජන නායකයා වූ මහින්ද රාජපක්ෂ මහතා පියවර ගත් බව උතුරු නැඟෙනහිර සමථ බලමණ්ඩල ප්‍රධාන අධිකරණ සංඝනායක ධුරයෙන් අභිනවයෙන් පිදුම් ලද අම්පාර මහාවාපි විහාරාධිපති, අරන්තලාව ජාත්‍යන්තර බෞද්ධ මධ්‍යස්ථානාධිපති, ශාස්ත්‍රපති කිරිඳිවැල සෝමරතන නාහිමියෝ පැවැසූහ.
උන්වහන්සේ මෙලෙස සඳහන් කළේ අධිකරණ සංඝනායක පදවිය ලැබීම හේතුවෙන් අරන්තලාව ජාත්‍යන්තර බෞද්ධ මධ්‍යස්ථානයේ පැවැති උත්සවයකදීය.
මෙහි ප්‍රධාන ආරාධිතයා ලෙස හිටපු ජනපති මහින්ද රාජපක්ෂ මහතා පැමිණි අතර, මුලසුනෙහි මල්වතු පාර්ශ්වයේ අනුනායක නියංගොඩ විජිතසිරි හිමියෝ වැඩ සිටියහ.
අභිනවයෙන් නායක පදවිය ලැබූ කිරිඳිවැල සෝමරතන හිමියන්ට සිය නායක පදවිය පිළිබඳ සන්නස හිටපු ජනාධිපති මහින්ද රාජපක්ෂ මහතා විසින් පිරිනමන ලද අතර, විජිනිපත පිළිගැන්වීම දිගාමඬුල්ල දිස්ත්‍රික් පාර්ලිමේන්තු මන්ත්‍රි ඩබ්. ඩී. වීරසිංහ මහතා විසින් සිදු කරනු ලැබීය.
එහිදී අනුශාසනාවක් කරමින් කිරිඳිවැල සෝමරතන හිමියෝ මෙලෙස පැවැසූහ.
“යුද්ධය ඉවර කරන්න බෑ කියලා විවිධ පුද්ගලයන් කිව්වා. විරුද්ධවාදීන් ආයුධ නෑ කිව්වා. රටට ද්‍රෝහීකම් කළ අය යුද්ධය ඉවර කරන්න බෑ කිව්වා. විවිධ රටවලින් බලපෑම් ආවා. ජනාධිපතිවරුන් හතර දෙනකුට ඉවර කන්න බැරි වුණු යුද්ධය මහින්ද රාජපක්ෂ ජන නායකයා නිම කළා.
දැන් එකඑක හමුදාපතිවරුන් කියනවා මමයි මේක කළේ, අපි තමයි මේක කළේ කියලා. ඒ අය පුරසාරම් දෙඩෙව්වත් එදා මේ යුද්ධය ඉවර කරන්න කියලා අණ දුන්නු සේනාධිනායකයා මහින්ද රාජපක්ෂ මහතා බව රටම දන්නවා. අද මේ රටේ සිංහල, මුස්ලිම්, දෙමළ ජනතාව ජීවත් වෙන්නේ ඔබතුමාට පින්සිද්ධ වෙන්න. මේ ගම්වල මිනිස්සු හතරට පහට දරුවොත් අරන් කැලෑ වදිනවා. මේ පාර හැන්දෑවේ පහට වහනවා. ඊට පසුදා උදේ නවයට පාර අරින්නේ. කොළඹ යන ජනතාවට මුරපොළවල් 18ක බහින්න සිද්ධ වෙනවා, ආරක්ෂක අංශවල පරික්ෂාවට ලක් කරන්න. එක ගෙදර දූ දරුවෝ, අම්මා, තාත්තා වාහනයක ගියේ නෑ. මේ ත්‍රස්තවාදය කොහොමහරි නිම කළ නිසා ජනතාව අදත් බියෙන් සැකෙන් තොරව ජීවත් වෙනවා. ඒ ගෞරවය අපි කවදත් ඔබතුමාට දෙනවා.
හෑගොඩ ශ්‍රී ඉන්ද්‍රසාර හිමියන් ඇතුළු භික්ෂූන් වහන්සේලා ඝාතනය කළ මේ අරන්තලාව භූමිය ගොඩනගන්න සහාය දුන්නේ ඔබතුමයි. මගෙන් බොහෝ දෙනෙක් ඇහුවා, ඇයි මහින්ද රාජපක්ෂ මහත්තයා මේ උත්සවයට ගෙන්වන්නේ කියලා. මම කිව්වා රට බේරා දුන් නායකයා මහින්ද රාජපක්ෂ, අද මේ රටේ මිනිස්සු යුද බිය නැතුව ජීවත් වෙන්නේ මහින්ද රාජපක්ෂ නිසයි කියලා. ඒ නිසා මේ උත්සවයට එතුමාට ආරාධනා කළා කියලා.”
මෙහිදී මල්වතු පාර්ශ්වයේ අනුනායක යක්කල දේශීය වෛද්‍ය විද්‍යාලයේ කුලපති, රාජකීය පණ්ඩිත නියංගොඩ ධර්මකීර්ති ශ්‍රී සංඝරක්ඛිත විජිතසිරි හිමි, ඇතුල්කෝට්ටේ ශ්‍රී මහින්දාරාමාධිපති, ශ්‍රී ලංකා නිපෝන් ආයතනයේ මහලේකම්, ශ්‍රී ජයවර්ධනපුර කෝට්ටේ ප්‍රධාන සංඝනායක මීගහතැන්නේ චන්ද්‍රසිරි හිමි, අධ්‍යපන අමාත්‍යාංශයේ පිරිවෙන් අධ්‍යාපන දෙපාර්තමේන්තුවේ අධ්‍යක්ෂ ජනරාල්, ආචාර්ය කුඹල්ගොඩ ධම්මාලෝක හිමි ආදීහු මෙම උත්සව සභාව ඇමතූහ.
මල්වතු පාර්ශ්වයේ කාරක සංඝ සභාවේ නියෝජ්‍ය ලේඛකාධිකාරි, පේරාදෙණිය විශ්වවිද්‍යාලයේ කථිකාචාර්ය, දර්ශනපති මහාවෙල රතනපාල හිමියන් සංඝනායක පදවිය පිළිබඳව ශ්‍රී සන්නස් පත්‍රය කියවනු ලැබීය.
අධ්‍යාපන සහ පිරිවෙන් පිළිබඳ රාජ්‍ය ඇමැති විජිත බේරුගොඩ, දිගාමඬුල්ල පාර්ලිමේන්තු මන්ත්‍රි ඩබ්.ඩී. වීරසිංහ, හිටපු ඇමැති පී. දයාරත්න, නැඟෙනහිර ආණ්ඩුකාර සෙන්දිල් තොණ්ඩමන්, නැඟෙනහිර පළාත් සභාවේ සභාපති චන්ද්‍රදාස ගලප්පත්ති, අම්පාර දිසාපති චින්තක අබේවික්‍රම, නැඟෙනහිර ජ්‍යෙෂ්ඨ නියෝජ්‍ය පොලිස්පති අජිත් රෝහණ, අම්පාර නියෝජ්‍ය පොලිස්පති දමයන්ත ශ්‍රී විජය, අම්පාර කොට්ඨාස භාර පොලිස් අධිකාරි නන්දන ජයපත්ම යන මහත්වරුන් ඇතුළු විශාල පිරිසක් මෙම අවස්ථාවට සහාභාගි වූහ.
