කටුනායක ප්‍රදේශයට මත්ද්‍රව්‍ය සැපයීම සහ බෙදාහැරීම සිදු කරන ප්‍රධාන ජාවාරම්කරු සමඟ ඔහු සන්තකයේ තිබූ රුපියල් ලක්ෂ 25ක් පමණ වටිනා මත්ද්‍රව්‍ය තොගයක් පෙරේදා (17) රාත්‍රී කටුනායක පොලිසියේ අපරාධ විමර්ශන අංශයේ විදේශ නිලධාරීන් පිරිසක් විසින් සිදු කළ මෙහෙයුමකදී අත්අඩංගුවට ගෙන තිබේ.
ඔහු ජා – ඇළ, කණුවන ප්‍රදේශයේ අඹ සෙවන අවන්හල පවත්වාගෙන යමින් සිටි ව්‍යාපාරික හිමිකරුවා වන අතර, ඔහු 44 හැවිරිදි දෙදරු පියෙකි. ඔහු ජා – ඇළ, කණුවන ප්‍රදේශයේ මහල් නිවාසයක සුඛෝපභෝගී ජීවිතයක් ගෙවමින් සිටි පුද්ගලයකු බව මොහු අත්අඩංගුවට ගැනීමට ගොස් සිටි පොලිස් නිලධාරීහු පැවසූහ.
ඔහු කොරෝනා වසංගත සමයට පෙර ප්‍රදේශයේ දැවැන්ත ප්‍රවාහන ව්‍යාපාරයක් පවත්වාගෙන ගොස් තිබූ අතර, එම වසංගත සමයේදී එම ව්‍යාපාරය බංකොලොත් වීම නිසා මේ නව ව්‍යාපාරය ආරම්භ කර පවත්වාගෙන ගොස් ඇති බව පොලිසිය සිදු කළ මූලික විමර්ශනවලදී අනාවරණය කරගෙන තිබුණි .
යුක්තිය මෙහෙයුමට සමගාමීව මේ මෙහෙයුම ක්‍රියාත්මක කර තිබුණි. අත්අඩංගුවට ගන්නා අවස්ථාවේ ඔහුගේ නිවෙසෙහි සඟවා තිබූ කේරළ ගංජා කිලෝ ග්‍රෑම් 02ක්, අයිස් මත්ද්‍රව්‍ය ග්‍රෑම් 50ක්, එම මත්ද්‍රව්‍ය සූක්ෂම ලෙස කිරාගැනීමට භාවිත කරන මයික්‍රෝ ඉලෙක්ට්‍රොනික් තරාදියක් සමඟ මේ මත්ද්‍රව්‍ය අලෙවි කිරීමෙන් උපයා තිබූ රුපියල් දෙලක්ෂ දහ අට දහස් අට සිය පනහක් ද පොලිසිය විසින් අත්අඩංගුවට ගෙන තිබුණි.
මොහු දැනට විදේශගතව සැඟව සිටිමින් මෙරට මිනීමැරුම්, අපරාධ සහ මත්ද්‍රව්‍ය බෙදාහැරීමේ ජාලයක් මෙහෙයවන සංවිධානාත්මක අපරාධ කල්ලි නායක සංඛ නමැත්තාගේ ප්‍රධානතම ගෝලයෙකි.
මීට සති කිහිපයකට පෙර කටුනායක ප්‍රදේශයේ, වෙරළබඩ පාරේ පදිංචි මත්ද්‍රව්‍යවලට ඇබ්බැහිවී සිටි පුද්ගලයන් දෙදෙනකු අත්අඩංගුවට ගෙන රඳවාගෙන දීර්ඝ ලෙස ප්‍රශ්න කිරීම්වලදී මොහු පිළිබඳ අනාවරණය කර ගත් තොරතුරු මත මෙම අත්අඩංගුවට සිදු කර තිබේ.
මෙසේ අත්අඩංගුවට ගත් මත්ද්‍රව්‍ය තොගය, මුදල් සහ තරාදිය මීගමුව මහේස්ත්‍රාත් අධිකරණයට ඊයේ (18 ) ඉදිරිපත් කිරීමට නියමිතව තිබුණි.
මේ පිළිබඳ වැඩිදුර විමර්ශන කටයුතු මීගමුව පොලිස් අධිකාරී එරික් පෙරේරා මහතාගේ උපදෙස් මත, සහකාර පොලිස් අධිකාරී රත්නායක මහතාගේ අධීක්ෂණයෙන්, කටුනායක පොලිසියේ ස්ථානාධිපති ප්‍රධාන පොලිස් පරීක්ෂක අජිත් නිශ්ශංක, අපරාධ විමර්ශන අංශයේ ස්ථානාධිපති උප පොලිස් පරීක්ෂක දහම් මාරසිංහ, උප පොලිස් පරීක්ෂක මොහොමඩ් නිෂ්මි, පොලිස් සැරයන්වරුන් වන 31371 සුනිල්, 25906 අනුර, පොලිස් කොස්තාපල්වරුන් වන 33249 අනුෂ්ක, 93015 කරුණානායක, 37627 කුමාර, 96820 සඳමාල්, 100255 සෙනෙවිරත්න සහ 102289 මධුසංඛ නිලධාරී මහත්වරුන් විසින් සිදු කරයි.
