විවිධ හේතූන් මත සාගර මත්ස්‍ය සම්පත හීන වීමෙන් මතුවන ගැටලු ජයග්‍රහණය කිරීමට ජලජීවී වගාව මෙන්ම මුහුදු ජීවීන් වගා ක්ෂේත්‍ර තවතවත් සංවර්ධනය කිරීමට තම අවධානය යොමු වී ඇතැයි ධීවර ඇමැති ඩග්ලස් දේවානන්දා මහතා පැවැසීය.
අප රටට ඉන්දියන් සාගරයේ වැදගත් ස්ථානයක් හිමි වන බැවින් සාගරයේ ආරක්ෂාව පිළිබඳ අභියෝගවලට ද අප මුහුණපාන අතර නීති විරෝධී මිනිස් ජාවාරම, මත්ද්‍රව්‍ය ජාවාරම්, මුහුදු කොල්ලකෑම් වැනි තර්ජන එයින් ප්‍රධාන වන බව ද ඇමැතිවරයා කීය.
ඇමැතිවරයා මේ බව පැවසුවේ කොළඹ සිනමන් ග්‍රෑන්ඩ් හෝටලයේදී පසුගියදා (15) පැවැති පාත් ෆයින්ඩර් සංවිධානය හා මානුෂීය සාකච්ඡා පිළිබඳ මධ්‍යස්ථානය සංවිධානය කළ කාලගුණ විපර්යාස හා කළමනාකරණ හා පොදු ප්‍රතිපත්ති පිළිබඳ පැවති වටමේස සමුළුවේදීය.
අඩුවක් නැතිව සම්පත් ලබාදෙන මහ මුහුද, අභියෝග ද අඩුවක් නැතිව ලබා දෙන බව පැවැසූ ඇමැති දේවානන්දා මහතා එහිදී මෙම අදහස් ද පළ කළේය.
ලාංකික ධීවරයන්, විශේෂයෙන් කුඩා පරිමාණ ධීවරයන් මුහුදේදී මුහුණපාන ඛේදවාචකයන් සම්බන්ධව මෙම සමුළුවේදී අවධානයට යොමු කිරීම ගැන මා ස්තූතිය පුද කරනවා. අපගේ රටට කීර්තිමත් හා පෞරාණික ඉතිහාසයක් පවතිනවා. වැඩි වශයෙන් මත්ස්‍ය සම්පත අපගේ ධීවර ජනතාව ලබා දෙන නමුත් විවිධ අභියෝගයන්ට ද අප ධීවරයන්ට මුහුණ පෑමට සිදුවනවා. මේ පිළිබඳ විශේෂ අවධානයකින් ක්‍රියාකළ යුතුයි. විශේෂයෙන් මසුන් වැඩි වශයෙන් ඇල්ලීම, මුහුද අධික උෂ්ණත්වයක් තිබීම, මුහුදේ වෙනස් වීම දේශගුණය විනාශ වීම, වාර්තා නොකළ නීති විරෝධී පන්න ක්‍රම කටයුතු මෙයින් ප්‍රධාන කොටසක් වන බව එක්සත් ජාතීන්ගේ ආහාර හා කෘෂිකර්ම සංවිධානය (FAO) වර්තා අපට පෙන්වා දී තිබෙනවා. මේ නිසා අප ධීවරයන්ගේ ජීවනෝපායට හානියක් ඇති වනවා පමණක් නොව සාගර පැවැත්මට ද හානි ඇති කරනවා. මෙම ගැටලුව ජයග්‍රහණය කිරීමට තමා ජලජීවී වගාව හා මුහුදු ජීවීන් වගාව හරහා මත්ස්‍ය නිෂ්පාදනය වැඩි කිරීමට පියවර ගෙන තිබෙන අතර එම නිසා මුහුදු ආහාර නිපදවීම වැඩි වී තිබෙනවා.
මීට අමතරව පසුගිය වර්ෂවල අපගේ ධීවර අංශය නො‍ෙයකුත් මහාපරිමාණ ගැටලුවලට මුහුණ දුන්නා. විශේෂයෙන් උතුරු පළාතේ මුහුදේ ඉන්දීය බොටම් ට්‍රෝලින් නීති විරෝධී ක්‍රියාකාරිත්වය වැඩි වී තිබෙනවා. මේ නිසා සාගරය විනාශ වීම, මුහුදු ජීවීන් විනාශ වීම, මත්ස්‍යන්ගේ බිත්තර විනාශ වීම, කොරල්පර විනාශ වීම පමණක් නොව ශ්‍රී ලංකා ධීවරයන්ගේ ධීවර යාත්‍රා හා ධීවර උපකරණවලට ද හානි ඇති වනවා. මහා පරිමාණ ඉන්දීය ට්‍රෝලර් යාත්‍රාවල පැමිණීම නිසා ධීවරයන්ගේ ජීවනෝපාය ද විනාශ වන අතර ඉන්දීය ධීවරයන් මසුන් හා ඉස්සන් ඇල්ලීමේදී මත්ස්‍ය පැටවුන් ද විනාශ වනවා.
තවද අප රටට ඉන්දියන් සාගරයේ වැදගත් ස්ථානයක් තිබෙන නිසා සාගරයේ ආරක්ෂාව පිළිබඳ අභියෝගවලට ද අප මුහුණ දෙනවා. නීති විරෝධී මිනිස් ජාවාරම, මත්ද්‍රව්‍ය ජාවාරම්, මුහුදු කොල්ලකෑම් වැනි තර්ජනවලට අප මුහුණ දෙනවා. අවාසනාවන්ත විදියට මානව සම්පත් හා අනෙකුත් සම්පත් අඩු වීම නිසා මේ පිළිබඳ අපට හරියාකාරව ක්‍රියා කිරීමට නොහැකි තත්ත්වයක් පවතිනවා. කාලගුණ විපර්යාසයද අප සාගරය ලක්වන තවත් අභියෝගයක්. සාගරයේ උෂ්ණත්වය වැඩි වීම සාගරයේ තත්ත්වයට හානි ඇති කරනවා. ස්ථිර ධීවර කටයුතු තහවුරු කිරීමටත්, මුහුදු ඛාදනය නැවැත්වීමටත් නිවැරදි ක්‍රියාකාරි සැලසුම් අවශ්‍යයි. ශ්‍රී ලංකා ආර්ථිකයේ කොඳුනාරටිය ලෙස ධීවර අංශය පරිවර්තනය කිරීමට නිල් ආර්ථික ව්‍යාපෘතිය හඳුන්වා දීමට අපි ප්‍රතිපත්ති සකස් කරදී තිබෙනවා. ඒ වෙනුවෙන් විශේෂ විද්වත් කණ්ඩායමක්ද අප පත්කර තිබෙනවා. නීති විරෝධී ධීවර ක්‍රමය නවත්වා දැමීමට මාගේ අමාත්‍යාංශය නව ධීවර පනත් කෙටුම්පතක් සකස් කර තිබෙනවා. ‘යැයිද අමාත්‍යවරයා පැවසීය.
ධීවර අමාත්‍යාංශය විසින් සකස් කළ නව ධීවර පනත් කෙටුම්පතේ පිටපතක් අමාත්‍යවරයා විසින් පාත් ෆයින්ඩර් ආයතනයේ සභාපති බර්නාඩ් ගුණතිලක මහතාට මේ අවස්ථාවේදී ලබා දෙන ලදි.
