එළැඹෙන යල කන්නයේදී, හෙක්ටයාර 500ක කීරි සම්බා විශේෂ වගා ව්‍යාපෘතියක් ක්‍රියාත්මක කිරීමට කෘෂිකර්ම හා වැවිලි කර්මාන්ත අමාත්‍යාංශය තීරණය කර ඇත.
මෙම ව්‍යාපෘතිය වී අලෙවි මණ්ඩලය, ගොවිජන සංවර්ධන දෙපාර්තමේන්තුව හා ගොවි භාරකාර අරමුදල ඒකාබද්ධව ක්‍රියාත්මක කරනු ලබන අතර දැනට කීරි සම්බා වගා නොකරන ප්‍රදේශවල මේ ව්‍යාපෘතිය ක්‍රියාත්මක කිරීමට කටයුතු සැලසුම් කරන ලෙස කෘෂිකර්ම හා වැවිලි කර්මාන්ත අමාත්‍ය මහින්ද අමරවීර මහතා අමාත්‍යාංශ නිලධාරීන්ට උපදෙස් දී තිබේ.
ඒ අනුව හම්බන්තොට දිස්ත්‍රික්කයේ හා රත්නපුර දිස්ත්‍රික්කයේ උඩවලව කලාපයේ තෝරා ගන්නා කුඹුරු හෙක්ටයාර 500ක මෙම කීරි සම්බා වගාව සිදු කරන අතර එම වගාව සඳහා තෝරා ගන්නා ගොවීන්ට බිත්තර වී ඇතුළු පහසුකම් නොමිලයේ ලබා දීමට පියවර ගැනේ.
එමෙන්ම කීරි සම්බා ආදර්ශ ව්‍යාපෘතියක් ලෙස මෙය ක්‍රියාත්මක කෙරෙන අතර පැරෂුට් තාක්ෂණය උපයෝගි කර ගනිමින් වගා කිරීමට නියමිතය. කෘමිනාශක හා වල්නාශක මෙන්ම පොහොර යෙදීම ද ඩ්‍රෝන තාක්ෂණය උපයෝගි කර ගනිමින් සිදු කෙරේ.
අගුණකොළපැලැස්ස මැටිගත්වල ප්‍රදේශයේ අක්කර 100ක සිදු කරන ලද කීරි සම්බා වගාව සාර්ථක වීම නිසා මෙම ව්‍යාපෘතිය ආරම්භ කරන බවත් දැනට වැඩි ගොවීන් පිරිසක් රතු කැකුළු වී වර්ග වගා කිරීම මඟින් එම වී බහුල වීම නිසා ඔවුන්ට අලෙවි කර ගැනීමේ අපහසුතාවක් පැනනැඟී ඇති බවත් පෙන්වා දෙන ඇමැතිවරයා එයට විකල්පයක් ලෙස ගොවීන් කීරි සම්බා වගාවට යොමු කෙරෙන බව ද අවධාරණය කරයි.
මේ වන විට දේශීය වෙළෙඳපොළේ කීරි සම්බා සඳහා ඉහළ මිලක් පවතින අතර මිල ගණන් තීරණය කිරීම ගොවීන් අතට පත්ව තිබීම සුබදායි තත්ත්වයක් බව ද ඇමැතිවරයා පෙන්වා දෙයි.
