යහපත් රාජ්‍ය පාලනය සඳහා වන ක්‍රමෝපාය ශ්‍රී ලංකාවේ ප්‍රවර්ධනය කිරීම සහ මහා පරිමාණ දූෂණ මැඬලීමේ දී ජාත්‍යන්තර ආධාර කණ්ඩායම්වලට පැවරී ඇති කාර්යභාරය සම්බන්ධයෙන් සාකච්ඡා කරන විශේෂ සැසියක් පසුගියදා කොළඹ දී පැවැත්විණි. පාත්ෆයින්ඩර් පදනම විසින් මෙය සංවිධාන කර තිබූ අතර, ශ්‍රී ලංකාවේ රාජ්‍ය අංශය දූෂිත ද යන්න මත පදනම් කරගෙන රටවල් ශ්‍රේණිගත කරන දූෂණ මැන බැලීමේ දර්ශකයේ ශ්‍රී ලංකාවේ සනිටුහන් වන ස්ථානය මෙහි දී අවධානයට ගැනිණි. සැලකිය යුතු ලෙස පහත වැටී ඇති දූෂිත දර්ශකයෙන් ගැලවී නැවත ස්ථාපිත වන අතර සමාජයේ සෑම තරාතිරමකම බලවත් ලෙස පැතිරී ඇති දූෂණය රටේ ප්‍රධාන ගැටලුවක් ලෙස සැලකෙන තත්ත්වය ගැන මේ සාකච්ඡාවේ දී අවධාරණය කෙරුණු අතර, දූෂිත තත්ත්වය හේතුවෙන් රාජ්‍ය පාලනය කෙරෙහි ජනතාවගේ විශ්වාසය පළුදු වන බව ද පාලන ක්‍රමවේද අසංවිධිත වන බව ද මෙහිදී අනාවරණය විය.
ශ්‍රී ලංකා ට්‍රාන්ස්පේරන්සි ඉන්ටර්නැෂනල්හි විධායක අධ්‍යක්ෂිකා නදිෂානි පෙරේරා,වෙරිටේ රිසර්ච්හි විධායක අධ්‍යක්ෂ ආචාර්ය නිෂාන් ද මෙල් හා පර්යේෂණ අධ්‍යක්ෂ සුභාෂිණී අබේසිංහ සහ පාත්ෆයින්ඩර් පදනමේ සභාපති බර්නාඩ් ගුණතිලක මහත්ම මහත්මීහු මෙහිදී කරුණු දැක්වූහ. කොළඹ පදනම් වූ රාජ්‍යතාන්ත්‍රික ප්‍රජාවේ නියෝජිතයන්, දේශීය හා විදේශීය ජාත්‍යන්තර රාජ්‍ය නොවන ආයතන, ජ්‍යෙෂ්ඨ රාජ්‍ය නිලධාරීන්, බුද්ධිමතුන් සහ පෞද්ගලික අංශයේ ජ්‍යෙෂ්ඨ නියෝජිත පිරිසක් මේ අවස්ථාවට සහභාගි වූහ.
ශ්‍රී ලංකාවට සපයන ණය, ප්‍රදාන වැනි මූල්‍ය ආධාර ලබා දීම සඳහා අත්‍යවශ්‍ය කොන්දේසි ලෙස ශක්තිමත් දූෂණ විරෝධී ක්‍රියාමාර්ග සහ වගවීම ඉල්ලීම වැදගත් බව මෙහි දී අවධාරණය කෙරිණ. ජාත්‍යන්තර භූගෝලීය දේශපාලනය තුලනය කිරීමේ අවශ්‍යතාව හේතුවෙන් ශ්‍රී ලංකාවේ පරිපාලන පරිසරය අභියෝගයට ලක්ව ඇති අතර මේ ගැටලුව සිවිල් සහ ජනතාවගේ දෘෂ්ටිකෝණයකින් සලකා බලන ලෙස විද්වත් පිරිස ජාත්‍යන්තර නියෝජිතයන්ගෙන් ඉල්ලා සිටි අතර, මේ ඉල්ලීම ඔවුන්ගේ රටවලට සන්නිවේදනය කිරීමේ වැදගත්කම ද සඳහන් කළහ.
ශ්‍රී ලංකා ට්‍රාන්ස්පේරන්සි ඉන්ටර්නැෂනල්හි විධායක අධ්‍යක්ෂිකා නදිෂානි පෙරේරා, වෙරිටේ රිසර්ච්හි විධායක අධ්‍යක්ෂ ආචාර්ය නිෂාන් ද මෙල් සහ පර්යේෂණ අධ්‍යක්ෂ සුභාෂිණී අබේසිංහ, පාත්ෆයින්ඩර් පදනමේ සභාපති බර්නාඩ් ගුණතිලක මහත්ම මහත්මීන් ඇතුළු නියෝජිතවරු මහා පරිමාන දූෂණ මැඬලීමේ දී ජාත්‍යන්තර ආධාර කණ්ඩායම්වලට පැවරී ඇති කාර්යභාරය සම්බන්ධ සාකච්ඡාවට සහභාගි වී සිටියහ.
