සංචාරක ඇෆ්ගනිස්තානය හා ශ්‍රී ලංකාව අතර පළමු විස්සයි20 තරගය නවීකරණය කරන ලද රංගිරි දඹුලු ජාත්‍යන්තර ක්‍රීඩාංගණයේදී අද රාත්‍රී 7ට ආරම්භ වෙයි. නවීන තාක්ෂණයෙන් යුත් නව විදුලි ආලෝක ධාරා පද්ධතියක් යටතේ පැවැත්වෙන මේ තරගයේ සියලු ප්‍රවේශපත්‍ර මේ වන විටත් අලෙවි වී ඇත.
ඇෆ්ගනිස්තාන පිල මේ සංචාරයේ මුහුණදුන් ටෙස්ට් තරගය දිනයක් ඉතිරිව තිබියදී කඩුලු 10කින් පරාජය වූ අතර, එක්දින තරග තුනම පරාජය වීමෙන් පසු මේ විස්සයි20 තරගාවලියට පිවිසේ. එබැවින් සංචාරයේ තරගයක් හෝ ජයගෙන අවමන්සහගත පරාජයෙන් වැළකීමට ඇෆ්ගනිස්තානය ප්‍රබල උත්සාහයක නිරත වනු ඇත.
දෙරට අතර විස්සයි20 තරග ඉතිහාසයේ මෙතෙක් තරග 5ක් පවත්වා එයින් තරග 3ක් ශ්‍රී ලංකාව ජයගෙන ඇති අතර, ඇෆ්ගනිස්තානය තරග 2ක් ජයගෙන සිටී. එලෙස ඇෆ්ගනිස්තානය ජයගත් තරග වන්නේ ශ්‍රී ලංකා දෙවැනි පෙළ කණ්ඩායමක් සහභාගි වූ චීනයේ පැවති ආසියානු ක්‍රීඩා උලෙළේ විස්සයි20 තරගය හා ඩුබායිහි පැවති ආසියා කුසලාන තරගයේදීය.
කෙසේ වුවද රංගිරි දඹුල්ල ජාත්‍යන්තර ක්‍රීඩාංගණයේ තණතිල්ල පිතිකරුවන් වඩාත් ප්‍රිය එකක් බැවින් ලකුණු අතර සිටින ශ්‍රී ලංකා ඉදිරි පෙළ ක්‍රීඩකයන් දක්ෂතා දක්වනු ඇතැයි විශ්වාස කෙරේ. පන්දු යවන්නන්ට සුළු උපකාරයක් සමඟින්, පිතිකරුවන්ට ඔවුන්ගේ අවස්ථාවෙන් උපරිම ප්‍රයෝජන ගැනීමට සහ ලකුණු පුවරුවේ විශාල ලකුණු සංඛ්‍යාවක් තැබීමට මේ ක්‍රීඩාංගණයේදී හැකියාව ලැබේ. එබැවින් කාසියේ වාසිය දිනා පළමුව පන්දුවට පහර දීමට තීරණය කිරීම බුද්ධිමත් තීරණයක් විය හැකි බව ක්‍රිකට් විචාරක මතය වී තිබේ.
දුෂ්මන්ත චමීර එක්දින තරගාවලියේදී ආබාධයකට ලක් වීම හේතුවෙන් 2022 වසරේ ඔක්තෝබර් මාසයෙන් පසුව විස්සයි20 ජාත්‍යන්තර තරගයකට ක්‍රීඩා කර නැති වමතින් වේග පන්දු යවන බිනුර ප්‍රනාන්දු සංචිතයට කැඳවා ඇත. සිම්බාබ්වේ සමඟ තරගාවලියේදී යළි විස්සයි20 පිටියට එක්වූ ඇන්ජලෝ මැතිව්ස් හා හිටපු නායක දසුන් ශානක ඇෆ්ගනිස්තානයට එරෙහි ශ්‍රී ලංකා විස්සයි20 සංචිතයේ සිටිති.
ඊබ්‍රහිම්
සද්‍රාන්
මෙවර ලෝක කුසලානයට ශක්තිමත්ව සූදානම් වීමේ අරමුණින් ශ්‍රී ලංකාව සමඟ පැවැත්වෙන තරග තුනකින් සමන්විත විස්සයි20 තරගාවලිය සඳහා 16 දෙනකුගෙන් යුත් සංචිතයක් ඇෆ්ගනිස්තානය ප්‍රකාශයට පත් කළ බව එහි කළමනාකාරීත්වය ප්‍රකාශ කළේය. නිත්‍ය විස්සයි20 නායක රෂීඩ් ඛාන් තවමත් කොන්දේ සැත්කමකින් සුවය ලබමින් සිටින බැවින් ඊබ්‍රහිම් සද්‍රාන් නායකත්වය උසුලනු ඇත. රෂීඩ් ඛාන්ගේ අඩුව එක්දින තරගාවලිය පුරා කැපී පෙනෙන ලෙස දැනුණු අතර, මේ විස්සයි20 තරගාවලියේදී ද එවැනිම ඉරණමකට ඇෆ්ගනිස්තානය පත්ව සිටී.
තරගය පිළිබඳ අදහස් දැක්වූ නායක වනිඳු හසරංග පන්දු යවන්නන් 4ක් හා තුන් ඉරියව් ක්‍රීඩකයන් දෙදෙනකු හා පිතිකරුවන් 5ක් අද තරගයට ක්‍රීඩා කරනු ඇතැයි පැවසීය.
“එක්දින තරගාවලියේදී අපි හොඳින් කළා. හොඳ තණතිලිවල ක්‍රීඩා කරන කොට අපි දන්නවා මොකක්ද කළ යුත්තේ කියා. මම ඕවර 4ක් දාන නිසා තණතිලිවලට අනුව කණ්ඩායම හදා ගන්නවා. ලෝක කුසලානය ඉදිරියේ තියන නිසා ඒ ගැනත් කල්පනා කරන්න වෙනවා. දඹුල්ල පිටිය ඉතා හොඳයි. ක්‍රීඩාලෝලීන් ගොඩක් එනවා”
“විස්සයි20 ක්‍රීඩාවේදී හොඳින් පන්දු යවන කණ්ඩායම ජය ගන්නවා. අපේ දක්ෂ පන්දු යවන්නන් ඉන්නවා. වේග පන්දු යවන බිනුර, මතීෂ හා නුවන්, මධුෂංක අපට ඉන්නවා. හොඳ 6ක් 7ක් අපට ඉන්නවා. තණතීරුව කොහොමද හැසිරෙන්නේ කියලා බලන්න වෙනවා. අපට තව තරග 6ක් තියෙනවා ලෝක කුසලානයට පෙර. මේ තරග හයේදී ලෝක කුසලානය පැවැත්වෙන රටට සමාන තණතිලි ලැබෙනවා. පන්දු රැකීමේ තත්ත්වය උඩට ගන්න අවශ්‍යයි. කණ්ඩායමෙන් මා බලාපොරොත්තු වෙන්නේ හොඳ පන්දු රැකීමක්” වනිඳු හසරංග පැවසීය.
ඉදිරි විස්සයි20 තරග දෙක මේ මස 19 සහ 21 යන දිනවල රංගිරි දඹුල්ල ජාත්‍යන්තර ක්‍රිකට් ක්‍රීඩාංගණයේදී පැවැත්වේ.
ශ්‍රී ලංකා විස්සයි20 සංචිතය:
වනිඳු හසරංග (නායක), චරිත් අසලංක (උප නායක), පැතුම් නිශ්ශංක, කුසල් මෙන්ඩිස්, ධනංජය ද සිල්වා, කුසල් ජනිත් පෙරේරා, ඇන්ජලෝ මැතිව්ස්, දසුන් ශානක, සදීර සමරවික්‍රම, කමිඳු මෙන්ඩිස්, මහීෂ් තීක්ෂණ, අකිල ධනංජය, මතීෂ පතිරණ, ඩිල්ෂාන් මධුශංක, නුවන් තුෂාර, බිනුර ප්‍රනාන්දු.
ඇෆ්ගනිස්තාන විස්සයි20 සංචිතය:
ඊබ්‍රහිම් සද්‍රාන් (නායක), රහ්මනුල්ලා ගුරුබාස්, ඉෂාක් රහිමි, හසරතුල්ලා සාසායි, ගුල්බඩන් නබී, මොහොමඩ් නබී, නජිබුදුල්ලා සද්‍රාන්, අසමතුල්ලා ඔමර්සියා, කරීම් ජනට්, සරෆුඩීන් අෂ්රාෆි, ෆසල්හක් ෆාරුකි, ෆරීඩ් අහමඩ්, මොමාන්ඩ්, ක්වයිස් අහමඩ්.
