Home » බාලවයස්කරුවන්ට සිගරැට් විකිණූ වෙළෙඳසල් හිමියන් 8කට ඇප

බාලවයස්කරුවන්ට සිගරැට් විකිණූ වෙළෙඳසල් හිමියන් 8කට ඇප

by mahesh
February 16, 2024 1:00 am 0 comment

බළපිටිය විශේෂ ජයකාන්ත ලියනගේ

හික්කඩුව පොලිස් වසමේ ප්‍රධාන පෙළේ පාසල් අසල වෙළෙඳසල් පවත්වාගෙන යමින් බාලවයස්කරුවන්ට සිගරැට් විකුණන ලද වෙළෙඳසල් හිමියන් 08 දෙනා එක් අයෙකුට රුපියල් ලක්ෂය (1,00000/-) බැගින් ශරීර ඇපමත මුදාහැරීමට ගාල්ල අතිරේක මහේස්ත්‍රාත් ලක්මිණී විදානපතිරණ මහත්මිය පෙරේදා (14) නියෝග කළාය.

සිද්ධිය සම්බන්ධයෙන් තවදුරටත් විමර්ශනය කර ප්‍රගතිය වැඩිදුර වාර්තාවක් මඟින් අධිකරණයට කරුණු වාර්තා කරන ලෙසත් මීට අදාළ නඩුව 2024 පෙබරවාරි 26 දින නැවත කැඳවන බවත් මහේස්ත්‍රාත්වරිය හික්කඩුව පොලිසියට දැනුම් දුන්නාය.

මෙසේ ඇපමත මුදාහරින ලද්දේ ගාලු පාර, දොඩන්දූව පදිංචි සනික්කු හැන්නදිගේ සමරජිත් (62), කුරුඳුවත්ත, බටපොළ පදිංචි කාරියවසම් කංකානම්ගේ ආරියදාස (70), කුමාරකන්ද, දොඩන්දූව පදිංචි නිරෝෂා ප්‍රියදර්ශනී අබේසේකර (44), මෝදර පටුවත, දොඩන්දූව පදිංචි විතානගේ අසංග (67), හෙන්නතොට, දොඩන්දූව පදිංචි සේනාධීර පතිරණලාගේ ප්‍රදීප් (52), රන්විල, හික්කඩුව පදිංචි ලියන බඩැල්ලගේ සෝමරත්ත (73), මලෑගස්හින්න, හික්කඩුව පදිංචි තොම්ගම් ගුරුගේ රේණුකා (50) සහ බද්දේගම පාර, හික්කඩුව පදිංචි සුවාරිස්ගේ නන්දසේන (65) යන අටදෙනාය.

හික්කඩුව පොලිස් ස්ථානාධිපති ප්‍රධාන පොලිස් පරීක්ෂක ලලිත් සඳගිරි මහතාගේ උපදෙස් හා මෙහෙයවීම මත වයස අවුරුදු 17 ක් වන උපාය දූතයකු යොදවා සිගරැට් මිල දී ගැනීමට සලස්වා සැකකරුවන් අත්අඩංගුවට ගෙන තිබේ. සැකකරුවන්ගේ වෙළෙඳසල්වල තිබූ සිගරැට් තොග ද නඩු භාණ්ඩ ලෙස පොලිසියේ භාරයට ගත් බව හික්කඩුව පොලිසිය කියයි.

ශ්‍රී ලංකාවේ නීතිය අනුව වයස අවුරුදු 21ට අඩු බාලවයස්කාර දරුවන්ට සිගරැට් අලෙවිය නීතියෙන් තහනම් කර තිබෙන බවත් මෙම වෙළෙඳසල් හිමියන් පාසල් අසල පවත්වාගෙන යන පෞද්ගලික උපකාරක පන්තිවලට පැමිණෙන දරුවන් ඉලක්ක කර ගනිමින් සිගරැට් අලෙවි කරන බවත් හික්කඩුව පොලිසියේ ප්‍රකාශකයෙක් සඳහන් කළේය. දැනට ක්‍රියාත්මක යුක්තිය මෙහෙයුමට සමගාමීව පාසල් දරුවන්, ආදි සිසුන්, දෙමාපියන් හා ගුරුවරුන් ඒකාබද්ධ කර එක් එක් පාසල් ඉලක්ක කර ගනිමින් පිහිටුවා තිබෙන ‘පවුර සංසදය’වල සහාය ඇතිව මෙම මෙහෙයුම දියත් කරන ලද බවද එම ප්‍රකාශකයා වැඩිදුරටත් සඳහන් කළේය.

You may also like

Leave a Comment

Sri Lanka’s most Trusted and Innovative media services provider

Facebook

@2025 – All Right Reserved. Designed and Developed by Lakehouse IT