දේවාලයක් පවත්වාගෙන යන කාන්තාවක් දේවාරූඪ වීමෙන් පසු, එම දේවාලය පවත්වාගෙන යන නිවසේ කාමරයක ඉපැරණි රන් කාසි තැන්පත් කර ඇති නිධානයක් තිබෙන බවට පැවසීමෙන් පසු, කාමරය තුළ අඩි 15ක් පමණ ගැඹුරට කැණීම් සිදු කරමින් නිදන් සෙවූ මෙම දේවාලය පවත්වාගෙන යන කාන්තාව ඇගේ පුත්‍රයා ඇතුළු හතරක්, කැණීම් උපකරණ සහ පූජා භාණ්ඩ සමඟ ඉකුත් 13 වැනිදා අත්අඩංගුවට ගත් බව අනුරාධපුර කොට්ඨාස අපරාධ විමර්ශන අංශය පවසයි.
මෙලෙස අත්අඩංගුවට පත්ව ඇත්තේ අනුරාධපුර තරියන්කුලම ප්‍රදේශයේ දේවාලයක් පවත්වාගෙන යන කාන්තාවක්, ඇගේ පුත්‍රයා, කුරුන්දන්කුලම අටේ කොටස පදිංචි පුද්ගලයෙකු සහ ගල්කුලම ප්‍රදේශයේ පදිංචි සහල් ව්‍යාපාරිකයකු බව පොලිසිය පවසන්නේ.
කවරක්කුලම පොලිස් වසමේ තරියන්කුලම ප්‍රදේශයේ නිවසක සිදු කළ වැටලීමේදී සැකකරුවන් සමඟ මෙම භාණ්ඩ අත්අඩංගුවට ගත් බව අනුරාධපුර කොට්ඨාස අපරාධ විමර්ශන අංශය සඳහන් කළේය.
සැකකාර කාන්තාව දේවාරූඪ වීමෙන් අනතුරුව නිවසේ එම කාමරයේ පොළව යට රන්කාසි සහිත නිදන් වස්තු තැන්පත් කර තිබෙන බවට පැවසීම හේතුවෙන් එම නිධානය ගොඩ ගැනීම සඳහා මෙම කැණීම සිදු කර ඇති බව පොලිසිය පවසයි.
වැටලීම සිදු කරන අවස්ථාවේදී එම ස්ථානයේ තිබී වතුර මෝටරයක්, පාෂාණ විදින යන්ත්‍රයක්, පිකස් එකක්, උදැල්ලක්, ඇම්පියර් 15 වර්ගයේ වයර් රෝලක්, එල්. ඊ. ඩී. බල්බ්, මල්ටි ප්ලග් එකක්, පාට හතරක මල් අඩංගු පීරිසියක්, මල් මාලා තුනක් ඇතුළු පූජා භාණ්ඩ තම භාරයට ගත් බව පොලිසිය සඳහන් කළේය.
අත්අඩංගුවට ගත් සැකකාරිය සහ සැකකරුවන් තිදෙනා අනුරාධපුර මහේස්ත්‍රාත් අධිකරණයට ඉදිරිපත් කිරීමට නියමිතව තිබුණි.
