ඉතා කෙටි කලක් තුළ ශ්‍රී ලංකාවේ ආර්ථිකය තුළ ඇති වී තිබෙන වර්ධනය හේතුවෙන් කටුනායක ගුවන්තොටුපොළේ දෙවැනි පර්යන්තයේ ඉදිකිරීම් කටයුතු සඳහා නැවත වරක් සහාය ලබාදීමට ජපාන ජාත්‍යන්තර සහයෝගිතා ඒජන්සිය තීරණය කර තිබේ.
‘ජයිකා’ සහන ණය වැඩපිළිවෙළ යටතේ රුපියල් කෝටි 14,500ක වියදමකින් 2020 වසරේ ආරම්භ කළ කටුනායක ගුවන්තොටුපොළේ දෙවැනි පර්යන්තයේ ඉදිකිරීම් කටයුතු පසුගිය 2022 වසරේදී නවතා දමන ලද අතර මෙයට ප්‍රධාන හේතුව වූයේ 2022 වසරේ මාර්තු මස වන විට රටෙහි ඇතිවූ ආර්ථික අවපාතය බව වරාය, නාවික හා ගුවන්සේවා අමාත්‍යාංශය පෙන්වා දෙයි.
එම ආර්ථික අවපාතය හේතුවෙන් රට බංකොලොත් බවට ප්‍රකාශ කිරීමෙන් අනතුරුව දෙවැනි පර්යන්ත ව්‍යාපෘතිය සඳහා ‘ජයිකා’ ආයතනය විසින් ලබාදුන් සහන ණය වැඩපිළිවෙළ ද නවතා දමන ලද නමුත් ඒ වන විට කොන්ත්‍රාත්කරුවන් විසින් ඉදිකිරීම් ආරම්භ කර පසුව අතහැර දමා තිබූ දෙවැනි පර්යන්තයේ අත්‍යවශ්‍ය ඉදිකිරීම් ගුවන්තොටුපොළ සමාගමේ මූල්‍ය ප්‍රතිපාදන යොදා ගනිමින් නිම කර ඇති බව ගුවන්තොටුපොළ හා ගුවන්සේවා සමාගම පවසයි.
ඒ අනුව ව්‍යාපෘතියේ ඉදිකිරීම් සියයට 6ක් පමණ මේ වන විට නිමකර තිබෙන අතර මෙම දෙවැනි පර්යන්තයේ ඉදිකිරීම් නැවත ආරම්භ කිරීම පිළිබඳව වරාය, නාවික හා ගුවන්සේවා ඇමැති නිමල් සිරිපාල ද සිල්වා මහතා නිරතුරුව ජපාන රජය සහ ‘ජයිකා’ ආයතනය සමඟ සාකච්ඡා කෙරිණි.
එහි ප්‍රතිඵලයක් ලෙස විශේෂයෙන් ‘ජයිකා’ ආයතනයේ සභාපති ටනාකා අකිහිකෝ මහතා ඇතුළු නියෝජිතයන් පිරිසක් පෙරේදා (14) පස්වරුවේ ඇමැති නිමල් සිරිපාල ද සිල්වා මහතා හමුවී මෙම ව්‍යාපෘතිය පිළිබඳ සාකච්ඡා කළ අතර මෙහිදී ඇමැති නිමල් සිරිපාල ද සිල්වා මහතා පෙන්වා දුන්නේ වර්තමානයේ ඉදිකිරීම් ක්ෂේත්‍රයේ අමුද්‍රව්‍ය, උපකරණ සහ භාණ්ඩවල පවතින මිල ගණන් ඉහළ යෑම හේතුවෙන් ‘ජයිකා’ ආයතනයෙන් ලබාදුන් ණය මුදලට අමතරව තවත් අමෙරිකානු ඩොලර් මිලියන 450ක පමණ ප්‍රතිපාදන අවශ්‍ය බවයි.
මේ පිළිබඳ දීර්ඝ වශයෙන් දෙපාර්ශ්වය සාකච්ඡා කිරීමෙන් අනතුරුව ජයිකා ආයතනයේ සභාපතිවරයා කියා සිටියේ ශ්‍රී ලංකාවේ ආර්ථිකය කෙටි කලක් තුළ වර්ධනය වෙමින් පවතින බවත් ජාත්‍යන්තර මූල්‍ය අරමුදල විසින් ක්‍රියාත්මක කර ඇති ණය ප්‍රතිව්‍යුහගත කරන ක්‍රියාවලිය අවසන් වීමෙන් අනතුරුව දෙවැනි පර්යන්තයේ ඉදිකිරීම් සඳහා සහාය ලබාදීමට ‘ජයිකා’ ආයතනය එකඟතාව පළ කළ බවයි.
මෙම සාකච්ඡාවෙන් අනතුරුව ‘ජයිකා’ ආයතනයේ සභාපති ටනාකා අකිහිකෝ මහතා ඇතුළු නියෝජිතයෝ පිරිස කටුනායක ගුවන්තොටුපොළේ දෙවැනි පර්යන්තයේ දැනට සිදුකෙරෙන ඉදිකිරීම් කටයුතු නිරීක්ෂණය කළහ.
මෙම අවස්ථාවට අමාත්‍යාංශයේ ලේකම් කේ.ඩී.එස්. රුවන්චන්ද්‍ර, ගුවන්තොටුපොළ හා ගුවන්සේවා සමාගමේ සභාපති අතුල ගල්කැටිය මහත්වරුන් ඇතුළු නිලධාරීහු පිරිසක් සහභාගි වූහ.
