අපරික්ෂාකාරී ලෙස මෝටර් රථයක් දුම්රිය හරස් මාර්ගයට ඇතුළු කොට දුම්රියේ හැපීමට සලස්වා දුම්රිය දෙපාර්තමේන්තුවට කරන ලද අලාභය වෙනුවෙන් රුපියල් දහ අට ලක්ෂ තිස්පන් දහස් හත්සිය හැත්තෑ අටයි ශත විසි අටක (රු.1835778.28) මුදලක් ගෙවන ලෙස ගාල්ල අතිරේක මහේස්ත්‍රාත් ලක්මිණි විදානගමගේ මහත්මිය ඊයේ (15) රුසියානු ජාතික සංචාරකයකුට නියෝග කළාය.
මෙසේ දඩ නියම වූයේ ලොස්කුටෝ ඇලෙක්සැන්ඩර් (Loskuto Alexander) නමැති රුසියානු ජාතිකයකුටය. මොහු සංචාරයක් සඳහා පැමිණ අහංගම ප්‍රදේශයේ නිවෙසක නතරව සිට 2014 ජනවාරි 23 වැනි දින තවත් අයකු සමඟ මෝටර් රථයකින් ගමන් කරමින් සිටියදී අහංගම ගොවියාපාන ජයසුමනාරාම දුම්රිය හරස් මාර්ගයට ඇතුළු කිරීමේදී බෙලිඅත්ත සිට මහව බලා ධාවනය වෙමින් තිබූ රජරට රැජින සීග්‍රගාමී දුම්රියේ හැපී ඇති අතර එහිදී දුම්රිය එංජිමට සහ මෝටර් රථයට බරපතළ අලාභ සිදුවී ඇත.
මෙහිදී සුලු තුවාල ලැබූ රුසියන් ජාතිකයා සහ ඔහුගේ මිතුරා කරාපිටිය රෝහලට ඇතුළු කර තිබිණි. මේ අතර මෝටර් රථයේ වැරදි සම්බන්ධයෙන් පොලිසිය විසින් නඩු පවරා ඇති අතර දුම්රිය දෙපාර්තමේන්තුව දුම්රිය එංජිමට සහ විදුලි සංඥා පෙට්ටියට සිදුවූ අලාභය වෙනුවෙන් නඩු පවරා තිබිණ.
ඒ අනුව ඊයේ නඩුව කැඳවූ අවස්ථාවේ සැකකරු වෙනුවෙන් පෙනී සිටි නීතිඥවරුන් කියා සිටියේ මෙම විදේශිකයා මෙම මස 29 වැනි දින ලංකාවෙන් පිටව යෑමට සිටින නිසා සියලු චෝදනාවලට වරද පිළි ගන්නා බවය. ඒ අනුව වරද පිළිගත් සැකකරුට මෝටර් රථ වරද සඳහා රුපියල් 56,000ක දඩයක් ද දුම්රිය දෙපාර්තමේන්තුවට සිදුවූ අලාභය වෙනුවෙන් රුපියල් 1,779,778.28ක මුදලක් ගෙවන ලෙස අතිරේක මහේස්ත්‍රාත්වරිය නියෝග කළාය.
අහංගම පොලිස් ස්ථානාධිපති ප්‍රධාන පොලිස් පරීක්ෂක නාලක ජයවීර, උප පොලිස් පරීක්ෂක චන්දන, සැරයන් අරුණ (15921)
යන මහත්වරු පැමිණිල්ල මෙහෙයවූහ. සැකකාර විදේශිකයා වෙනුවෙන් නීතිඥ පමුදි වීරසූරිය මෙනෙවිය සමඟ ජ්‍යෙෂ්ඨ නීතිඥ සිසිර වීරසූරිය මහතා පෙනී සිටියේය.
