Home » ඉන්දීය තාක්ෂණ ආයතනයේ ශාඛාවක් ශ්‍රී ලංකාවට

ඉන්දීය තාක්ෂණ ආයතනයේ ශාඛාවක් ශ්‍රී ලංකාවට

රාජ්‍ය ඇමැති කනක හේරත් ප්‍රමුඛ දූත පිරිසක් ඉන්දියාවේදී සාකච්ඡාවක

by mahesh
February 16, 2024 12:59 am 0 comment

නෙත්මි පූජනී රත්නායක

ඉන්දියානු තාක්ෂණ ආයතනයේ ශාඛාවක් (IIT Madras Branch) මෙරට ස්ථාපිත කිරීම සම්බන්ධයෙන් රජයේ අවධානය යොමුව තිබේ.

රජයේ ප්‍රධාන අය වැය පොරොන්දුවක් වන මදුරාසියේ පිහිටි ඉන්දියානු තාක්ෂණ ආයතනයේ ශාඛාවක් (IIT Madras Branch) මෙරට පිහිටුවීම සම්බන්ධයෙන් සාකච්ඡා කිරීම සඳහා තාක්ෂණ රාජ්‍ය ඇමැති කනක හේරත් මහතා ප්‍රමුඛ ශ්‍රී ලංකා දූත පිරිසක් පසුගියදා මදුරාසියේ පිහිටි ඉන්දියානු තාක්ෂණ ආයතනයේ සංචාරයක නිරත විය.

කීර්තිමත් විද්වතුන්ගෙන් සහ කර්මාන්ත දැවැන්තයන්ගෙන් සමන්විත වූ මේ නියෝජිත පිරිසේ අරමුණ වූයේ අනාගත සහයෝගිතා අවස්ථා පිළිබඳ ගවේෂණය කිරීම සහ යෝජිත ශාඛාව පිළිබඳ විස්තර සාකච්ඡා කිරීමයි. රුහුණු විශ්වවිද්‍යාලයේ තාක්ෂණ පීඨයේ පීඨාධිපති මහාචාර්ය සුභාෂ් ජයසිංහ, මොරටුව විශ්වවිද්‍යාලයේ ඉංජිනේරු පීඨයේ මහාචාර්ය අජිත් ද අල්විස්, පේරාදෙණිය විශ්වවිද්‍යාලයේ විදුලි හා ඉලෙක්ට්‍රොනික අංශ ප්‍රධානී මහාචාර්ය බී.ජී.එල්.ටී. සමරනායක, යාපනය විශ්වවිද්‍යාලයේ ඉංජිනේරු පීඨයේ පීඨාධිපති ආචාර්ය කේ. පිරපාහරන් සහ කෘත්‍රිම බුද්ධිය පිළිබඳ ජනාධිපති කමිටුවේ සභාපති ආචාර්ය රොමේෂ් රණවන මහත්වරු මේ සංචාරයේදී ඔවුන්ගේ දායකත්වය සහ විශේෂඥතාව ලබා දුන්හ.

එමෙන්ම මදුරාසි IIT පර්යේෂණ ආයතනයේ ප්‍රධානී සහ පද්මශ්‍රී සම්මානලාභී මහාචාර්ය අශෝක් ජුන්ජුන්වාලා සහ ශ්‍රී ලංකාවේ නියෝජ්‍ය මහ කොමසාරිස් ආචාර්ය ඩී. වෙන්කේෂ්වරන් මහත්වරුන් සමඟ දූත පිරිස ඵලදායී සාකච්ඡාවක නිරත විය.

පර්යේෂණ ආයතනයේ කරන ලද සංචාරයෙන් ආයතනයේ පවතින යටිතල පහසුකම්, පර්යේෂණ හැකියාවන් සහ අධ්‍යාපනික විශිෂ්ටත්වය පිළිබඳ පැහැදිලි අවබෝධයක් ගැනීමට හැකි විය.

මේ සංචාරය ශ්‍රී ලංකා රජයේ අය වැය පොරොන්දුවක් වන මදුරාසියේ පිහිටි ඉන්දියානු තාක්ෂණ ආයතනයේ ශාඛාවක් මහනුවර පිහිටුවීම සම්බන්ධයෙන් සුවිශේෂී ඉදිරි පියවරක් සනිටුහන් කිරීමකි.

ශ්‍රී ලංකාවේ තාක්ෂණික පරිවර්තනයක් ඇති කිරීමට මෙන්ම ජාතික ප්‍රගතිය සහ සෞභාග්‍යය ඇති කිරීමට අවශ්‍ය දැනුම හා කුසලතාවලින් අනාගත පරපුර සවිබල ගැන්වීම ද මේ සහයෝගීත්වයෙන් අපේක්ෂා කෙරේ.

You may also like

Leave a Comment

Sri Lanka’s most Trusted and Innovative media services provider

Facebook

@2025 – All Right Reserved. Designed and Developed by Lakehouse IT