විපක්ෂ නායක සජිත් ප්‍රේමදාස වතුකරයේ දේශපාලන පක්ෂ නියෝජිතයන් සමඟ ගිවිසුමකට
වතු ජනතාව ව්‍යවසායකයන් ලෙස සවිබල ගැන්වීමේ සුවිශේෂී සමාජ ගිවිසුමකට එළැඹීමට හැකියාව ලැබුණු බව විපක්ෂ නායක සජිත් ප්‍රේමදාස මහතා පවසයි. අප රටට ඉමහත් සම්පතක් වූ උඩරට, පහතරට ප්‍රජාවගේ ජනජීවිතය, ජීවනෝපාය ඇතුළු සමාජ, ආර්ථික, දේශපාලන ව්‍යූහය ශක්තිමත් කිරීමට වතු ක්ෂේත්‍රයේ ප්‍රජාව සමඟ වැදගත් සමාජ ගිවිසුමකට එළැඹීමට හැකි වුණා. සමඟි ජන බලවේග රජයක් යටතේ ජනාධිපති කාර්යසාධන බළකායක් වෙනමම ස්ථාපිත කර උඩරට, පහතරට වතු ප්‍රජාව මුහුණ දෙන ගැටලු ඇතුළු යටිතල ක්ෂේත්‍රයේ තිබෙන්නා වූ ගැටලු ප්‍රශ්නවලට විසඳුම් දෙන සම්මුතියකට ගිවිසුම් ගත වූ බවත් විපක්ෂ නායකවරයා පැවැසීය.
විපක්ෂ නායක සජිත් ප්‍රේමදාස මහතා මේ බව කියා සිටියේ පෙරේදා (14) සමගි ජන බලවේග පක්ෂ කාර්යාලයේදී උඩරට හා පහතරට වතු ප්‍රජාවගේ අයිතීන් ආරක්ෂා කර දෙන බවට වන ප්‍රතිඥාවක් දෙමින් වතුකරයේ දේශපාලන පක්ෂ සහ නියෝජිතයන් රැසක් සමඟ සමාජ ගිවිසුමකට අත්සන් තබමිනි.
ලක්ෂ ගණනක් උඩරට හා පහතරට වතු ප්‍රජාව රටේ ජීවනාලියට දායකත්වයක් දෙන බැවින් ඔවුන් හැමදාම කම්කරු තනතුරේ තබා ගැනීම නොව ඔවුන්ට වගා භූමියේ හා නිවසක අයිතිය මෙන්ම වතු ක්ෂේත්‍රයේ වතු ව්‍යවසායකයන් ලෙස කටයුතු කිරීමේ ඉමහත් අවස්ථාව මේ තුළින් උදා වන බවත් මෙතෙක් කල් දෙවැනි, තුන්වැනි පන්තියේ කුඩම්මාගේ සැලකිලි ලැබුණු මේ ප්‍රජාවට වචනයට සීමා වූ සටන් පාඨ නොව කාලවකවානු සහිතව මේ ජනතාව ශක්තිමත් කරන්න පැහැදිලි සමාජ සම්මුතියකට එන බවත් විපක්ෂ නායකවරයා පැවැසීය.
සමගි ජන බලවේග රජයක් පිහිටවූ පළමු දිනයේ සිට මේ සියලු කරුණු කාරණා සාකච්ඡා කරන්න නොව මේ සමාජ ගිවිසුම මහපොළොවේ යථාර්ථයක් බවට පත් කරන්න කටයුතු කරන බවත් මෙරට ප්‍රජාතන්ත්‍රවාදී ඉතිහාසයේ වැදගත් සංධිස්ථානයක් ලෙස මෙය හැඳින්විය හැකි බවත් පැවැසූ විපක්ෂ නායකවරයා දිනෙන් දින සදාකාලිකව දේශපාලන ඇන්දවීම්වලට, රැවටීම්වලට ලක්වූ උඩරට, පහතරට වතු ප්‍රජාවට ආර්ථික හා සමාජීය නිදහස උදාකරන වැදගත් ගමනක් යෑම සමගි ජන සන්ධානයේ ප්‍රමුඛතම කාර්යභාරයක් වන බව පැවැසීය.
මේ ගිවිසුම සඳහා සමගි ජන බලවේගය නියෝජනය කරමින් විපක්ෂ නායක සජිත් ප්‍රේමදාස, දමිළ ප්‍රගතිශීලී සන්ධානය නියෝජනය කරමින් ප්‍රජාතන්ත්‍රවාදී ජනතා පෙරමුණේ නායක පාර්ලිමේන්තු මන්ත්‍රී මනෝ ගනේෂන්, ජාතික කම්කරු පෙරමුණේ නායක පලනි දිගම්බරම්, කඳුරට ජනතා පෙරමුණේ නායක වී.රාධාක්‍රිෂ්ණන්, කෑගල්ල දිස්ත්‍රික් සමගි ජන බලවේග පාර්ලිමේන්තු මන්ත්‍රී සුජිත් සංජය පෙරේරා, මහනුවර දිස්ත්‍රික් සමඟි ජන බලවේග පාර්ලිමේන්තු මන්ත්‍රී එම්. වේලුකුමාර් සහ නුවරඑළිය දිස්ත්‍රික් සමගි ජන බලවේග පාර්ලිමේන්තු මන්ත්‍රී එම්. උදයකුමාර් මහත්වරු අත්සන් තැබූහ.
