නඩු ප්‍රමාදය වැළැක්වීමේ එක් ක්‍රමවේදයක් ලෙස සමථ මණ්ඩල ක්‍රමය ව්‍යාප්ත කිරීම සාර්ථක වී ඇතැයි අධිකරණ,බන්ධනාගාර කටයුතු හා ආණ්ඩුක්‍රම ව්‍යවස්ථා ප්‍රතිසංස්කරණ ඇමැති ජනාධිපති නීතිඥ ආචාර්ය විජයදාස රාජපක්ෂ මහතා පැවසීය.
සමථ මණ්ඩල ක්‍රමයේ සිදු කළ විවිධ ප්‍රතිසංස්කරණ හරහා මේ වන විට නඩු විසඳීමේ ප්‍රතිශතය 70%ක ප්‍රතිශතයකින් ඉහළ ගොස් ඇති බව ද ඇමැතිවරයා කීය.
ඇමැතිවරයා මේ අදහස් පළකළේ සමථ මණ්ඩල කොමිෂන් සභාවේ කාර්ය භාරය හා 2024 අංක 02 දරණ සමථ මණ්ඩල(සංශෝධන) පනත පිළිබඳව ඊයේ(15) අධිකරණ අමාත්‍යාංශයේ දී පැවති මාධ්‍ය දැනුවත් කිරීමේ විශේෂ ප්‍රවෘත්ති සාකච්ඡාවකට එක්වෙමිනි.
එහිදී ඇමැතිවරයා සඳහන් කළේ අධිකරණය පිළිබඳ විශ්වාසය අඩුවීමට එක් හේතුවක් වන්නේ අධිකරණයන්හි සිදුවන නඩු ප්‍රමාදවීම බවයි.
ශ්‍රී ලංකාවේ අධිකරණවල නඩු කටයුතු ඉදිරියට ගෙනයෑමේදී ජනතාවට වැයවන විශාල වියදම, කාලය සැලකිල්ල්ට ගෙන නඩු කටයුතු කඩිනමින් ඉදිරියට ගෙනයෑමට භාවිතා කළ ක්‍රමවේද අතර ඉතාමත් සාර්ථක ක්‍රමවේදයක් වන්නේ සමථ මණ්ඩල ක්‍රමයයි.සමථ මණ්ඩල ක්‍රමය ප්‍රචලිත කිරීමට මේ වන විටත් කටයුතු කර අධිකරණවල නඩු ගොඩගැසීම වැළැක්වීමට අවශ්‍ය මූලික පියවර ගෙන තිබෙනවා. 1988 අංක 72 පනත මගින් සමථ මණ්ඩල පනත මගින්, සමථ මණ්ඩල කොමිෂන් සභාව පිහිටුවීමෙන් අනතුරුව 2015 පමණ කාලය වන විට ශ්‍රී ලංකාවේ පැවති නඩු කටයුතුවලින් සියයට හතළිස් පහක් පමණ ප්‍රමාණයක් විසඳීමට හැකිවුණා. සමථ මණ්ඩල ක්‍රමයේ කරන ලද විවිධ ප්‍රතිසංස්කරණ හරහා මේ වන විට නඩු විසඳීමේ ප්‍රතිශතය සියයට හැත්තෑවක පමණ ප්‍රමාණයකින් ඉහළ ගොස් තිබෙනවා.
ඒතුළින් අධිකරණවල නඩු විභාගවීමට නියමිතව තිබූ ආරවුල් විශාල ප්‍රමාණයක් සමථයට පත්කර ගැනීමට හැකිවූවා සේම අධිකරණයන්හි ගොඩගැසීමට නියමිතව තිබූ නඩු අවම කර ගැනීමට හැකිවීමත් සමථකරණ ක්‍රියාවලියෙන් සිදුවී තිබෙනවා’යැයිද ඇමැතිවරයා මෙහිදී කීය.
