ජනාධිපති රනිල් වික්‍රමසිංහ මහතා පසුගිය වසරේ ජුලි මාසයේ කළ ඉන්දියානු සංචාරයේදී දෙරට අතර සබඳතා ප්‍රවර්ධනය කිරීමට දෙරට නායකයන් අතර ඇති වූ එකඟතාව අනුව ශ්‍රී ලංකාවේ ආර්ථික වර්ධනය වේගවත් කිරීමට ශ්‍රී ලංකා ඉන්දියානු හවුල්කාරීත්වය මගින් මෙරට රාජ්‍ය අංශයේ ධාරිතාව ඉහළ නැංවීමට වැඩිදුර සාකච්ඡා ඉන්දියාවේදී පසුගියදා (12) ආරම්භ විය.
නායකයන් දෙදෙනා අතර පැවති සාකච්ඡාවලදී ප්‍රධාන වශයෙන් දෙරට ජනතාව අතර සහයෝගීතාව ප්‍රවර්ධනය කිරීමේ සහ ශක්තිමත් කිරීමේ වැදගත්කම අවධාරණය කෙරුණු අතර ඒ අනුව කරන වැඩපිළිවෙළක මූලාරම්භය වශයෙන් හවුල්කාරිත්ව වැඩසටහන ක්‍රියාත්මක කෙරේ.
මේ වන විට ඉන්දියාව සිවිල් සේවාවන්හි ධාරිතාව ගොඩනැඟීමේ දැවැන්ත වැඩසටහනක් ක්‍රියාත්මක කර ඇති අතර ඉන්දියාවේ රාජ්‍ය ආයතන සමඟ බද්ධ වී ශ්‍රී ලංකාවේ රාජ්‍ය ආයතන සිය කර්තව්‍යයන් වඩාත් නව්‍යකරණයෙන් සහ කාර්යක්ෂමව කිරීම සඳහා ඉන්දීය ප්‍රධාන රාජ්‍ය ආයතන කීපයක් සමඟ ඒකාබද්ධව වැඩසටහනක් ක්‍රියාත්මක කිරීමට බලාපොරොත්තු වේ. ශ්‍රී ලංකා රජයේ ආරාධනය පරිදි ජ්‍යෙෂ්ඨ මට්ටමේ සාකච්ඡා සඳහා ඉන්දියාවේ යහපාලනය සඳහා වූ ජාතික මධ්‍යස්ථානයේ (National Center for Good Governance, India) අධ්‍යක්ෂ ජනරාල් භාරත් ලාල් මහතා ශ්‍රී ලංකාවට පැමිණ ජනාධිපති රනිල් වික්‍රමසිංහ සහ අගමැති දිනේෂ් ගුණවර්ධන මහත්වරුන් හමු වී සාකච්ඡා පැවැත්වීය.
ශ්‍රී ලංකාවේ රාජ්‍ය සේවයේ ඵලදායි වෙනසක් ඇති කිරීම සඳහා අධීක්ෂණ ක්‍රියාමාර්ග හඳුන්වාදීමෙන් රාජ්‍ය ආයතනවල කාර්ය සාධනය වැඩි දියුණු කරන ක්‍රමවේදය පිළිබඳව එහිදී දීර්ඝ ලෙස සාකච්ඡා කෙරිණි.
එම සාකච්ඡාවල ප්‍රතිඵලයක් ලෙස ශ්‍රී ලංකාවේ ඉහළ පෙළේ නිල නියෝජිත කණ්ඩායමක් ඉන්දියාවට ගොස් අදාළ ඉන්දීය ආයතන සමඟ පුළුල් වශයෙන් සාකච්ඡා කර සුදුසු ධාරිතා සංවර්ධන සහයෝගීත්ව වැඩසටහනක් සකස් කර ක්‍රියාත්මක කිරීමට තීරණය විය.
ඒ අනුව අගමැති ලේකම් අනුර දිසානායක මහතාගේ ප්‍රධානත්වයෙන් යුතුව රාජ්‍ය පරිපාලන, ස්වදේශ කටයුතු, පළාත් සභා හා පළාත් පාලන අමාත්‍යංශයේ ලේකම්, තාක්ෂණ අමාත්‍යංශයේ ලේකම්, අල්ලස් හෝ දුෂණ චෝදනා විමර්ශන කොමිෂන් සභාවේ සභාපති, ශ්‍රී ලංකා සංවර්ධන පරිපාලන ආයතනයේ අධ්‍යක්ෂ ජනරාල්,නීතිපති දෙපාර්තමේන්තුවේ නියෝජ්‍ය සොලිසිටර් ජනරාල්, ශ්‍රී ලංකා ආයෝජන මණ්ඩලයේ විධායක අධ්‍යක්ෂ ඇතුළු රාජ්‍ය නිලධාරින් 14කගෙන් සමන්විත ඉහළ පෙළේ නිලධාරීන් පිරිසක් ඉන්දියාවේ යහපාලනය සඳහා වූ ජාතික මධ්‍යස්ථානයේ මේ මස 12 -17 දින දක්වා පැවැත්වෙන වැඩසටහන්වලට සහභාගි වෙති. ඒ අනුව ශ්‍රී ලංකාවේ රාජ්‍ය ආයතන 12ක් නියෝජනය වන පරිදි ප්‍රධාන වශයෙන් විද්‍යුත් ප්‍රසම්පාදනය (e-procurement) ඇතුළු රජයේ ප්‍රමුඛ සේවාවන් සඳහා ඩිජිටල්කරණ නිරාවරණය (Digitalization Exposure in Core-functions), අලුතින් බඳවාගන්නා රාජ්‍ය සේවකයන්ගේ ධාරිතා සංවර්ධනය,දුෂණ විරෝධී පියවර (Anti-Corruption Measures), ආයෝජන පහසුකම් සැලසීම සහ ආහාර ද්‍රව්‍යවල මධ්‍යම මිලකරණ යාන්ත්‍රණය (Central Pricing Mechanism of Foods) ක්ෂේත්‍රවල අදාළ ආයතනවල ධාරිතා සංවර්ධනය කළයුතු ක්‍රමවේදය පිළිබඳ සාකච්ඡා පැවැත්වීමට අපේක්ෂිතය.
රාජ්‍ය සේවයේ ගුණාත්මක පරිවර්තනයක් සඳහා මෑත දී ක්‍රියාත්මක කරන ලද මුලාරම්භයන් හරහා ඉන්දියාව විසින් අත්පත් කරගෙන ඇති ප්‍රගතිය හා අදාළ ඉන්දීය රාජ්‍ය ආයතන විසින් ආර්ථිකයේ වර්ධනය අරභයා සාර්ථකව ක්‍රියාත්මක කර ඇති ප්‍රතිපත්තිමය, ආයතනික හා මෙහෙයුම් වැඩි දියුණු කිරීම් පිළිබඳව අවබෝධයක් ලබා ගැනීමටත් ආර්ථික වශයෙන් තිරසාර වශයෙන් ස්ථාවරවීම සඳහා පියවර ගන්නා අතරතුර ශ්‍රී ලංකාවේ ආර්ථික වර්ධන ප්‍රවේශයේ දී ඊට දායක වන රාජ්‍ය ආයතනවල ධාරිතා සංවර්ධන ප්‍රමුඛතා පෙළ ගස්වා ගැනීමත් අදාළ ඉන්දීය ආයතන සමඟ ඇති කර ගත හැකි ආයතනික සහයෝගීතාවන් හඳුනා ගැනීමත් මේ ශ්‍රී ලංකා නිල නියෝජිත කණ්ඩායමේ අභිප්‍රායයි.
